ಭಾರತ ತಂಡಗಳಿಗೆ ನಿರಾಸೆ

ಗೋಲ್ಡ್‌ ಕೋಸ್ಟ್‌: ಭಾರತದ ಪುರುಷರ ಮತ್ತು ಮಹಿಳೆಯರ ಬ್ಯಾಸ್ಕೆ ಟ್‌ಬಾಲ್‌ ತಂಡದವರು ಕಾಮನ್‌ವೆಲ್ತ್‌ ಕ್ರೀಡಾಕೂಟದಲ್ಲಿ ಗುರುವಾರ ನಿರಾಸೆ ಕಂಡರು.

ಮಹಿಳೆಯರ ‘ಬಿ’ ಗುಂಪಿನ ಪ್ರಾಥಮಿಕ ಸುತ್ತಿನ ಪಂದ್ಯದಲ್ಲಿ ಭಾರತ 57–66 ಪಾಯಿಂಟ್ಸ್‌ನಿಂದ ಜಮೈಕಾ ತಂಡಕ್ಕೆ ಶರಣಾಯಿತು.

ಆರಂಭದಿಂದಲೇ ಆಕ್ರಮಣಕಾರಿ ಆಟ ಆಡಿದ ಭಾರತದ ವನಿತೆಯರು ಮೊದಲ ಕ್ವಾರ್ಟರ್‌ನಲ್ಲಿ ಎದು ರಾಳಿಗಳಿಗೆ ಪ್ರಬಲ ಪೈಪೋಟಿ ನೀಡಿ 14 ಪಾಯಿಂಟ್ಸ್‌ ಹೆಕ್ಕಿದರು. ಎರಡು ಮತ್ತು ಮೂರನೆ ಕ್ವಾರ್ಟರ್‌ಗಳಲ್ಲೂ ಭಾರತ ಮಿಂಚಿತು. ಹೀಗಿದ್ದರೂ ಮುನ್ನಡೆ ಗಳಿಸಲು ಆಗಲಿಲ್ಲ. ನಾಲ್ಕನೆ ಕ್ವಾರ್ಟರ್‌ನಲ್ಲಿ ಪ್ರಾಬಲ್ಯ ಮೆರೆದ ಜಮೈಕಾ ತಂಡ ಒಂಬತ್ತು ಪಾಯಿಂಟ್ಸ್‌ಗಳ ಅಂತರದಿಂದ ಗೆಲುವು ಸಾಧಿಸಿತು.

ಪುರುಷರ ವಿಭಾಗದ ‘ಬಿ’ ಗುಂಪಿನ ಮೊದಲ ಹಣಾಹಣಿಯಲ್ಲಿ ಭಾರತ 87–96 ಪಾಯಿಂಟ್ಸ್‌ನಿಂದ ಕ್ಯಾಮರೂನ್‌ ವಿರುದ್ಧ ಸೋತಿತು.