ಬಾಂಗ್ಲಾ ಎದುರು ಟಿ–20 ಸರಣಿ ಆಡಲಿರುವ ಆಸ್ಟ್ರೇಲಿಯಾ

ಢಾಕಾ: ಆಸ್ಟ್ರೇಲಿಯಾ ತಂಡವು ಬಾಂಗ್ಲಾದೇಶದ ಎದುರು ಮುಂದಿನ ತಿಂಗಳು ಐದು ಟ್ವೆಂಟಿ–20 ಪಂದ್ಯಗಳಲ್ಲಿ ಆಡಲಿದೆ ಎಂದು ಬಾಂಗ್ಲಾದೇಶ ಕ್ರಿಕೆಟ್‌ ಮಂಡಳಿ (ಬಿಸಿಬಿ) ಗುರುವಾರ ತಿಳಿಸಿದೆ.

ಢಾಕಾದ ಮೀರ್‌ಪುರದ ಶೇರ್–ಎ–ಬಾಂಗ್ಲಾ ರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಆಗಸ್ಟ್ 3–9ರವರೆಗ ಈ ಪಂದ್ಯಗಳು ನಿಗದಿಯಾಗಿವೆ.

2017ರ ಬಳಿಕ ಮೊದಲ ಬಾರಿಗೆ ಆಸ್ಟ್ರೇಲಿಯಾ ತಂಡವು ಬಾಂಗ್ಲಾದೇಶ ಪ್ರವಾಸ ಕೈಗೊಳ್ಳುತ್ತಿದೆ. ಜುಲೈ 29ಕ್ಕೆ ಪ್ರವಾಸಿ ತಂಡವು ಢಾಕಾಗೆ ಬಂದಿಳಿಯಲಿದೆ.

‘ಕೋವಿಡ್ -19 ಪಿಡುಗಿನ ಬಿಕ್ಕಟ್ಟಿನಿಂದಾಗಿ ಸರಣಿ ನಡೆಸುವುದು ಸಹಜವಾಗಿಯೇ ಒಂದು ಸವಾಲು. ಏಕೆಂದರೆ ಆರೋಗ್ಯ ಮತ್ತು ಸುರಕ್ಷತೆಯನ್ನು ಖಾತರಿಪಡಿಸುವುದು ಈ ಸಮಯದಲ್ಲಿ ಅಗತ್ಯವಾಗಿದೆ. ಸರಣಿಯ ಮಾರ್ಗಸೂಚಿಗಳನ್ನು ಖಚಿತಪಡಿಸಲು ಬಾಂಗ್ಲಾ ಕ್ರಿಕೆಟ್ ಮಂಡಳಿ ಮತ್ತು ಕ್ರಿಕೆಟ್‌ ಆಸ್ಟ್ರೇಲಿಯಾ ಮಾತುಕತೆ ನಡೆಸುತ್ತಿವೆ‘ ಎಂದು ಬಿಸಿಬಿ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ನಿಜಾಮುದ್ದೀನ್‌ ಚೌಧರಿ ಹೇಳಿದ್ದಾರೆ.

‘ತಂಡಗಳಿಗೆ ಬಯೋಸೆಕ್ಯೂರ್ ವಾತಾವರಣವನ್ನು ಕಲ್ಪಿಸುವ ಕುರಿತೂ ಚಿಂತನೆ ನಡೆಸಲಾಗುತ್ತಿದೆ‘ ಎಂದು ಅವರು ತಿಳಿಸಿದರು.