ಮುಖ್ಯಸ್ಥರ ಆಯ್ಕೆ: ಇಂದು ಐಸಿಸಿ ಸಭೆ

ದುಬೈ: ಅಂತರರಾಷ್ಟ್ರೀಯ ಕ್ರಿಕೆಟ್ ಸಮಿತಿಯ (ಐಸಿಸಿ) ಮಂಡಳಿ ಸಭೆ ಸೋಮವಾರ ನಡೆಯಲಿದ್ದು ಮುಖ್ಯಸ್ಥರ ಆಯ್ಕೆಗೆ ಸಂಬಂಧಿಸಿ ನಾಮಪತ್ರ ಸಲ್ಲಿಕೆ ಚಟುವಟಿಕೆಗೆ ಅಂತಿಮ ರೂಪ ನೀಡಲಿದೆ.

ಆನ್‌ಲೈನ್ ಮೂಲಕ ನಡೆಯಲಿರುವ ಸಭೆಯ ಕಾರ್ಯಸೂಚಿಯಲ್ಲಿ ಈ ಒಂದಂಶ ಮಾತ್ರ ಇದ್ದು ಚುನಾವಣೆಯಾಗಲಿ, ಅವಿರೋಧ ಆಯ್ಕೆಯಾಗಲಿ ನಾಲ್ಕು ವಾರಗಳ ಒಳಗೆ ನಡೆಸಲು ಐಸಿಸಿ ನಿರ್ಧರಿಸಿದೆ ಎನ್ನಲಾಗಿದೆ.

‘ನಾಮಪತ್ರ ಸಲ್ಲಿಕೆಗೆ ಎರಡು ವಾರಗಳ ಕಾಲ ಅವಕಾಶ ನೀಡುವ ಸಾಧ್ಯತೆ ಇದೆ. ಈ ಬಾರಿ ಮುಖ್ಯಸ್ಥರ ಆಯ್ಕೆಗೆ ಸರಳ ಬಹುಮತ ಪರಿಗಣಿಸಲು ಅವಕಾಶ ನೀಡುವಂತೆ 17 ಸದಸ್ಯರ ಮಂಡಳಿ ಆಗ್ರಹಿಸಿದೆ’ ಎಂದು ಸದಸ್ಯರೊಬ್ಬರು ತಿಳಿಸಿದರು.