ಐಸಿಸಿ ವಿಡಿಯೊ ಚಾನೆಲ್: 165 ಕೋಟಿ ವೀಕ್ಷಣೆ
2020ರ ವರ್ಷದ ಮೊದಲಾರ್ಧದ ದತ್ತಾಂಶ
ದುಬೈ: ಅಂತರರಾಷ್ಟ್ರೀಯ ಕ್ರಿಕೆಟ್‌ ಕೌನ್ಸಿಲ್‌ನ (ಐಸಿಸಿ) ವಿಡಿಯೊ ಚಾನೆಲ್ ಈ ವರ್ಷದ ಮೊದಲಾರ್ಧದಲ್ಲಿ ಫೇಸ್‌ಬುಕ್‌ನಲ್ಲಿ 165 ಕೋಟಿ ವೀಕ್ಷಣೆಗಳನ್ನು ಗಳಿಸಿದೆ.
ವಿಶ್ವದ ಇತರ ಕ್ರೀಡಾ ಫೆಡರೇಷನ್‌ಗಳ ವಿಡಿಯೊ ವಾಹಿನಿಗಳಿಗೆ ಲಭಿಸಿದ ಮನ್ನಣೆಗಿಂತ ಇದು ಎರಡು ಪಟ್ಟು ಹೆಚ್ಚು ಎಂದು ಮಂಡಳಿ ಶುಕ್ರವಾರ ಹೇಳಿದೆ.
ಫೇಸ್ಬುಕ್ ಒಡೆತನದ ‘ಕ್ರೌಡ್‌ಟ್ಯಾಂಗಲ್ಸ್‌‘ ವಿಶ್ಲೇಷಣೆಯ ಮೂಲಕ ಈ ಫಲಿತಾಂಶವನ್ನು ಪಡೆಯಲಾಗಿದೆ.
ಈ ಹಿಂದಿನ 12 ತಿಂಗಳುಗಳಲ್ಲಿ, ಫೇಸಬುಕ್‌ ಚಾನೆಲ್ ತನ್ನ ವಿಭಾಗದಲ್ಲಿ ಹೆಚ್ಚು ತೊಡಗಿಸಿಕೊಂಡ ಪೇಜ್‌ ಎಂದುಐಸಿಸಿ ಹೇಳಿಕೊಂಡಿದೆ.
‘19 ವರ್ಷದೊಳಗಿನವರ ಟ್ವೆಂಟಿ–20 ವಿಶ್ವಕಪ್‌ ಟೂರ್ನಿಯಲ್ಲಿ ಭಾರತ ಮತ್ತು ಬಾಂಗ್ಲಾದೇಶ ತಂಡಗಳ ನಡುವಣ ಫೈನಲ್‌ ಪಂದ್ಯವನ್ನು 44 ಲಕ್ಷ ಜನ ವೀಕ್ಷಿಸಿದ್ದಾರೆ. ಇದು ದಿನವೊಂದರಲ್ಲಿ ದಾಖಲಾದ ಅತಿ ಹೆಚ್ಚು ವೀಕ್ಷಣೆ‘ ಎಂದು ವಿಶ್ವ ಕ್ರಿಕೆಟ್‌ ಮಂಡಳಿ ತಿಳಿಸಿದೆ.
ಈ ಹಣಾಹಣಿಯಲ್ಲಿ ಬಾಂಗ್ಲಾದೇಶದ ಕಿರಿಯರು ಭಾರತವನ್ನು ಸೋಲಿಸಿ ಚಾಂಪಿಯನ್‌ ಆಗಿದ್ದರು.
‘ಮಾರ್ಚ್‌ ತಿಂಗಳಲ್ಲಿ ನಡೆದ ಐಸಿಸಿ ಮಹಿಳಾ ಟ್ವೆಂಟಿ–20 ವಿಶ್ವಕಪ್‌ ಟೂರ್ನಿಯಲ್ಲಿ ತನ್ನ ವಿಡಿಯೊ ಚಾನೆಲ್‌ಗಳು ಒಟ್ಟು 101 ಕೋಟಿ ವೀಕ್ಷಣೆ ಗಳಿಸಿವೆ. 2018ರ ಆವೃತ್ತಿಯ ಪ್ರಮಾಣಕ್ಕಿಂತ ಇದು ಶೇ 1900ರಷ್ಟು ಹೆಚ್ಚು‘ ಎಂದು ಐಸಿಸಿ ಹೇಳಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.