IPL 2021: ಧೋನಿ, ರೋಹಿತ್ ಎಲೀಟ್ ಪಟ್ಟಿಗೆ ಸೇರಿದ ರೈನಾ

ನವದೆಹಲಿ: ಇಂಡಿಯನ್ ಪ್ರೀಮಿಯರ್ ಲೀಗ್‌ ಟ್ವೆಂಟಿ-20 ಕ್ರಿಕೆಟ್ ಟೂರ್ನಿಯಲ್ಲಿ 200 ಪಂದ್ಯಗಳನ್ನು ಆಡಿದ ಗೌರವಕ್ಕೆ ಸುರೇಶ್ ರೈನಾ ಪಾತ್ರರಾಗಿದ್ದಾರೆ.

ಈ ಮೂಲಕ ಮಹೇಂದ್ರ ಸಿಂಗ್ ಧೋನಿ, ರೋಹಿತ್ ಶರ್ಮಾ ಹಾಗೂ ದಿನೇಶ್ ಕಾರ್ತಿಕ್ ಅವರ ಜೊತೆಗೆ ಎಲೀಟ್ ಪಟ್ಟಿಗೆ ಸೇರ್ಪಡೆಯಾಗಿದ್ದಾರೆ.

ಐಪಿಎಲ್‌ನಲ್ಲಿ 200 ಪಂದ್ಯವನ್ನಾಡಿದ ನಾಲ್ಕನೇ ಆಟಗಾರ ಎಂಬ ಗೌರವಕ್ಕೆ ರೈನಾ ಭಾಜನರಾಗಿದ್ದಾರೆ. ಐಪಿಎಲ್‌ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಹಾಗೂ ಗುಜರಾತ್ ಲಯನ್ಸ್ ತಂಡಗಳನ್ನು ರೈನಾ ಪ್ರತಿನಿಧಿಸಿದ್ದಾರೆ.

ರೈನಾ ಹಿಂದಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನಾಯಕ ವಿರಾಟ್ ಕೊಹ್ಲಿ 199 ಪಂದ್ಯಗಳನ್ನು ಆಡಿದ್ದಾರೆ. ಅಲ್ಲದೆ 200 ಪಂದ್ಯಗಳ ಮೈಲಿಗಲ್ಲು ತಲುಪಲು ಇನ್ನೊಂದು ಪಂದ್ಯ ಆಡಬೇಕಾದ ಅಗತ್ಯವಿದೆ. ಸೋಮವಾರದಂದು ವಿರಾಟ್ ಈ ದಾಖಲೆ ತಲುಪುವ ನಿರೀಕ್ಷೆಯಿದೆ.

200 ಐಪಿಎಲ್ ಪಂದ್ಯಗಳನ್ನು ಆಡಿರುವ ರೈನಾ 33,26ರ ಸರಾಸರಿಯಲ್ಲಿ ಒಟ್ಟು 5,489 ರನ್ ಕಲೆ ಹಾಕಿದ್ದಾರೆ. ಇದರಲ್ಲಿ ಒಂದು ಶತಕ ಹಾಗೂ 39 ಅರ್ಧಶತಕಗಳು ಸೇರಿವೆ.

ಐಪಿಎಲ್‌ನಲ್ಲಿ ಅತಿ ಹೆಚ್ಚು ಪಂದ್ಯವನ್ನಾಡಿದ ಟಾಪ್ 5 ಆಟಗಾರರ ಪಟ್ಟಿ:
1. ಮಹೇಂದ್ರ ಸಿಂಗ್ ಧೋನಿ: 211
2. ರೋಹಿತ್ ಶರ್ಮಾ: 207
3. ದಿನೇಶ್ ಕಾರ್ತಿಕ್: 203
4. ಸುರೇಶ್ ರೈನಾ: 200
5. ವಿರಾಟ್ ಕೊಹ್ಲಿ: 199