’ಎಲ್‌ಬಿಡಬ್ಲ್ಯು ಆಗಿರಲಿಲ್ಲ; ಹೊರ ನಡಿಯೆಂದಿದ್ದ ಆಸ್ಟ್ರೇಲಿಯನ್ನರು‘
1981ರ ಪಂದ್ಯದ ಪ್ರಸಂಗ ನೆನಪಿಸಿಕೊಂಡ ಸುನಿಲ್ ಗಾವಸ್ಕರ್
ಮೆಲ್ಬರ್ನ್: ’ಅವತ್ತು ಮೆಲ್ಬರ್ನ್ ಟೆಸ್ಟ್‌ ಪಂದ್ಯದಲ್ಲಿ ನಾನು ಎಲ್‌ಬಿಡಬ್ಲ್ಯು ಆಗಿರಲಿಲ್ಲ. ಆದರೆ, ಆಸ್ಟ್ರೇಲಿಯಾ ಆಟಗಾರರು ಹೊರ ನಡಿ ಎಂದು ಕೂಗಿದ್ದರು. ಆದ್ದರಿಂದ ಸಿಟ್ಟಿನಿಂದ ಹೊರನಡೆದೆ‘ ಎಂದು ಭಾರತ ತಂಡದ ಮಾಜಿ ಕ್ರಿಕೆಟಿಗ ಸುನಿಲ್ ಗಾವಸ್ಕರ್ ನೆನಪಿಸಿಕೊಂಡಿದ್ದಾರೆ.
1981ರಲ್ಲಿ ಮೆಲ್ಬರ್ನ್ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆದಿದ್ದ ಪಂದ್ಯದಲ್ಲಿ ಡೆನಿಸ್ ಲಿಲ್ಲಿ ಎಸೆತವು ಗಾವಸ್ಕರ್ ಪ್ಯಾಡ್‌ಗೆ ಬಡಿದಿತ್ತು. ಅಂಪೈರ್ ರೆಕ್ಸ್‌ ವೈಟ್‌ಹೆಡ್ ಅವರು ಔಟ್ ನೀಡಿದ್ದರು. ಆದರೆ, ಚೆಂಡು ಪ್ಯಾಡ್‌ಗೆ ತಗುಲುವ ಮುನ್ನ ತಮ್ಮ ಬ್ಯಾಟ್‌ಗೆ ತಗುಲಿತ್ತು ಎಂದು ಗಾವಸ್ಕರ್ ಅಸಮಾಧಾನ ವ್ಯಕ್ತಪಡಿಸಿದ್ದರು. ತಮ್ಮ ಪ್ಯಾಡ್‌ಗೆ ಬ್ಯಾಟ್‌ನಿಂದ ತಟ್ಟಿ ಕ್ರೀಸ್‌ ಪಕ್ಕ ನಿಂತು ಪ್ರತಿಭಟನೆ ವ್ಯಕ್ತಪಡಿಸಿದ್ದರು.
ಆಗ ಗಾವಸ್ಕರ್ ಮತ್ತು ಆಸ್ಟ್ರೇಲಿಯಾ ಆಟಗಾರರ ನಡುವೆ ಮಾತಿನ ಚಕಮಕಿ ನಡೆದಿತ್ತು.
’ಅಂಪೈರ್ ತೀರ್ಮಾನವು ನನಗೆ ಬಹಳ ಬೇಸರ ಮೂಡಿಸಿತ್ತು. ಬ್ಯಾಟಿನ ಒಳ ಅಂಚನ್ನು ಚೆಂಡು ಸವರಿತ್ತು. ಶಾರ್ಟ್‌ ಲೆಗ್ ಫೀಲ್ಡರ್‌ಗೂ ಅದು ಕಾಣುತ್ತಿತ್ತು. ಆದರೂ ಡೆನಿಸ್ ಬಂದು ನಿನ್ನ ಪ್ಯಾಡ್‌ಗೆ ಚೆಂಡು ಬಡಿದಿದೆ ಅಂದರು. ಅದಕ್ಕೆ, ಇಲ್ಲ ನಾನು ಹೊಡೆದ್ದಿದ್ದೇನೆಂದು ಪ್ರತಿಕ್ರಿಯಿಸಿದ್ದೆ. ಆದರೆ ಆಸ್ಟ್ರೇಲಿಯಾ ಆಟಗಾರರು ಹೊರಗೆ ನಡಿ ಎಂದರು‘ ಎಂದು ಸ್ಮರಿಸಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.