ಕೌಂಟಿ ಕ್ರಿಕೆಟ್: ಕರುಣ್ ನಾಯರ್ ಶತಕ
ಲಂಡನ್: ಕರ್ನಾಟಕದ ಬ್ಯಾಟರ್ ಕರುಣ್ ನಾಯರ್, ಇಂಗ್ಲೆಂಡ್ನ ಕೌಂಟಿ ಚಾಂಪಿಯನ್ಷಿಪ್ನ ಮೊದಲ ಡಿವಿಷನ್ ಪಂದ್ಯದಲ್ಲಿ ಶತಕ ಗಳಿಸಿ ಗಮನ ಸೆಳೆದರು.
ನಾರ್ಥಾಂಪ್ಟನ್ ಶೈರ್ ತಂಡದ ಪರ ಆಡುತ್ತಿರುವ ಅವರು ಸರೆ ಎದುರಿನ ಪಂದ್ಯದಲ್ಲಿ 144 ರನ್ ಗಳಿಸಿದರು. 51 ರನ್ಗಳಿಂದ ಬುಧವಾರ ಆಟ ಮುಂದುವರಿಸಿದ ಅವರು ಮೂರಂಕಿಯ ಗಡಿ ದಾಟಿದರು. ಮಳೆಯಿಂದಾಗಿ ದಿನದಾಟ ಬೇಗನೇ ನಿಂತಾಗ ನಾರ್ಥಾಂಪ್ಟನ್ ಶೈರ್ 9 ವಿಕೆಟ್ಗಳಿಗೆ 351 ರನ್ ಗಳಿಸಿತ್ತು.
238 ಎಸೆತಗಳನ್ನು ಎದುರಿಸಿದ ಕರುಣ್, 22 ಬೌಂಡರಿ ಹಾಗೂ 2 ಸಿಕ್ಸರ್ ಹೊಡೆದರು. ನಾರ್ಥಾಂಪ್ಟನ್ ಶೈರ್ ತಂಡ 193 ರನ್ ಗಳಿಸುವಷ್ಟರಲ್ಲಿ ಏಳು ವಿಕೆಟ್ ಕಳೆದುಕೊಂಡು ಕುಸಿತದ ಹಾದಿ ಹಿಡಿದಿತ್ತು. ಕರುಣ್ ಮತ್ತು ಟಾಮ್ ಟೇಲರ್ 8ನೇ ವಿಕೆಟ್ಗೆ 114 ರನ್ ಸೇರಿಸಿ ತಂಡದ ಮೊತ್ತವನ್ನು 300ರ ಗಡಿ ದಾಟಿಸಿದರು.
31 ವರ್ಷದ ಕರುಣ್ ಅವರು ಕಳೆದ ವಾರ ನಡೆದಿದ್ದ ವಾರ್ವಿಕ್ಶೈರ್ ವಿರುದ್ಧದ ಪಂದ್ಯದಲ್ಲಿ 78 ರನ್ ಗಳಿಸಿದ್ದರು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.