ಅಂಧರ ಕ್ರಿಕೆಟ್: ಭಾರತಕ್ಕೆ ಮಣಿದ ದಕ್ಷಿಣ ಆಫ್ರಿಕಾ

ಚಿಕ್ಕಬಳ್ಳಾಪುರ: ಭಾರತದ ಅಂಧರ ತಂಡವು, ತಾಲ್ಲೂಕಿನ ಮುದ್ದೇನಹಳ್ಳಿ ಸತ್ಯಸಾಯಿ ಗ್ರಾಮದ ಸಾಯಿ ಕೃಷ್ಣನ್ ಕ್ರೀಡಾಂಗಣದಲ್ಲಿ ಸೋಮವಾರ ನಡೆದ ಸಮರ್ಥ್ ಚಾಂಪಿಯನ್ ಟಿ-20 ಸರಣಿಯ ಮೊದಲ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಎಂಟು ವಿಕೆಟ್‌ಗಳ ಜಯ ಸಾಧಿಸಿತು. 

ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡ ಆಫ್ರಿಕಾ ತಂಡ 20 ಓವರ್‌ಗಳಲ್ಲಿ 7 ವಿಕೆಟ್‌ ನಷ್ಟಕ್ಕೆ 145 ರನ್ ಗಳಿಸಿತು. ಥಿಬೊ ಮಾಲಿಸೇನ್ 49 ರನ್‌ ಗಳಿಸಿದರು. ಈ ರನ್ ಗುರಿ ಬೆನ್ನತ್ತಿದ ಭಾರತ ತಂಡಕ್ಕೆ ಆರಂಭಿಕ ಆಟಗಾರರಾದ ದೀಪಕ್ ಮಲ್ಲಿಕ್ (82) ಮತ್ತು ಮನೀಶ್ ಕುಮಾರ್ (45) ಅವರು 130 ರನ್‌ ಜೊತೆಯಾಟ ಮೂಲಕ ಭದ್ರ ಬುನಾದಿ ಹಾಕಿದರು. ತಂಡ 13.3 ಓವರ್‌ಗಳಲ್ಲಿ ಎರಡು ವಿಕೆಟ್‌ಗೆ 146 ರನ್‌ ಹೊಡೆದು ಭರ್ಜರಿ ಜಯ ಸಾಧಿಸಿತು.

ಸರಣಿಯಲ್ಲಿ ಒಟ್ಟು ಐದು ಟಿ–20 ಪಂದ್ಯಗಳು ನಡೆಯಲಿವೆ.