ಇತರೆ ರನ್‌ 4; 10 ಮಂದಿ ಶೂನ್ಯಕ್ಕೆ ಔಟ್!
ಬೆಂಗಳೂರು: ಎಲ್ಲ 10 ಆಟಗಾರ್ತಿಯರೂ ಶೂನ್ಯಕ್ಕೆ ಔಟ್. ತಂಡ ಕೇವಲ ನಾಲ್ಕು ರನ್‌ಗಳಿಗೆ ಆಲೌಟ್‌!
ಕೇರಳದ ಮಲಪ್ಪುರಂ ಜಿಲ್ಲೆಯ ಪೆರಿಂದಲ್‌ಮಣ್ಣ ಕ್ರೀಡಾಂಗಣದಲ್ಲಿ ಬುಧವಾರ ನಡೆದ 19 ವರ್ಷದೊಳಗಿನ ಮಹಿಳೆಯರ ಅಂತರ ಜಿಲ್ಲಾ ಕ್ರಿಕೆಟ್ ಟೂರ್ನಿಯಲ್ಲಿ ಈ ಅಪರೂಪದ ‘ದಾಖಲೆ’ ನಿರ್ಮಾಣವಾಯಿತು.
ವಯನಾಡ್ ಜಿಲ್ಲಾ ತಂಡದ ವಿರುದ್ಧ ಟಾಸ್‌ ಗೆದ್ದ ಕಾಸರಗೋಡು ಜಿಲ್ಲಾ ತಂಡದ ನಾಯಕಿ ಅಕ್ಷತಾ ಬ್ಯಾಟಿಂಗ್ ಮಾಡಲು ನಿರ್ಧರಿಸಿದರು. ತಂಡದ ಎಲ್ಲ ಆಟಗಾರ್ತಿಯರೂ ಬೌಲ್ಡ್ ಔಟ್ ಆಗಿ ಮರಳಿದರು. ವಯನಾಡ್ ತಂಡದ ಬೌಲರ್‌ಗಳು ನೀಡಿದ ನಾಲ್ಕು ಇತರೆ ರನ್‌ಗಳೇ ತಂಡದ ಗಳಿಕೆಯಾಯಿತು.
ಆರಂಭಿಕ ಆಟಗಾರ್ತಿಯರಾದ ಕೆ.ವೀಕ್ಷಿತ ಮತ್ತು ಎಸ್‌.ಚೈತ್ರ ಮೊದಲ ಎರಡು ಓವರ್‌ ‘ಕೆಚ್ಚೆದೆಯ’ ಆಟವಾಡಿದರು. ಮೂರನೇ ಓವರ್‌ನಲ್ಲಿ ಎದುರಾಳಿ ತಂಡದ ನಾಯಕಿ ನಿತ್ಯಾ ಲೂರ್ದ್‌ ಮೂರು ವಿಕೆಟ್ ಕಬಳಿಸಿದರು. ಇದರೊಂದಿಗೆ ತಂಡದ ಪೆರೇಡ್‌ ಆರಂಭವಾಯಿತು. ವಯನಾಡ್ ತಂಡ ಒಂದೇ ಓವರ್‌ನಲ್ಲಿ ಗುರಿ ಮುಟ್ಟಿತು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.