Vijay Hazare Trophy: ಶತಕ, ದಾಖಲೆಗಳ ಭರಾಟೆ

ಕರ್ನಾಟಕದ ಕಹಳೆ : ಹಾಲಿ ಚಾಂಪಿಯನ್ ಕರ್ನಾಟಕ ತಂಡವು ಟೂರ್ನಿಯಲ್ಲಿ ಭರ್ಜರಿ ಆರಂಭ ಮಾಡಿತು. ಅಹಮದಾಬಾದಿನಲ್ಲಿ ನಡೆದ ಎ ಗುಂಪಿನ ಮೊದಲ ಪಂದ್ಯದಲ್ಲಿ ಜಾರ್ಖಂಡ್ ತಂಡ ನೀಡಿದ್ದ 413 ರನ್‌ಗಳ ಗುರಿಯನ್ನು 15 ಎಸೆತಗಳು ಬಾಕಿಯಿರುವಾಗಲೇ ಸಾಧಿಸಿತು. ಅತಿ ದೊಡ್ಡ ಗುರಿ ಬೆನ್ನಟ್ಟಿ ಗೆದ್ದ ದಾಖಲೆ ಕರ್ನಾಟಕದ್ದಾಯಿತು. ದೇವದತ್ತ ಪಡಿಕ್ಕಲ್ ಅಮೋಘ ಶತಕ (147) ಗಳಿಸಿ ಕರ್ನಾಟಕದ ಗೆಲುವಿನ ರೂವಾರಿಯಾದರು. ಇದಕ್ಕೂ ಮುನ್ನ ಜಾರ್ಖಂಡ್‌ ತಂಡ ನಾಯಕ ಇಶಾನ್‌ (125;39ಎ) ಅವರು ಲಿಸ್ಟ್‌ ಎ ಕ್ರಿಕೆಟ್‌ನಲ್ಲಿ ಭಾರತದ ಆಟಗಾರರ ಪೈಕಿ ಎರಡನೇ ಅತಿ ವೇಗದ ಶತಕ (33) ದಾಖಲಿಸಿದರು.

ರೋಹಿತ್ ಅಬ್ಬರ: ಮುಂಬೈ ತಂಡದ ರೋಹಿತ್ ಶರ್ಮಾ ಅವರು ದೀರ್ಘಕಾಲದ ನಂತರ ದೇಶಿ ಏಕದಿನ ಕಣಕ್ಕಿಳಿದರು. ಸಿಕ್ಕಿಂ ಎದುರು ರೋಹಿತ್ 94 ಎಸೆತಗಳಲ್ಲಿ 155 ರನ್ ಗಳಿಸಿದರು.

ದಾಖಲೆ ‘ವೈಭವ’: ರಾಂಚಿಯಲ್ಲಿ ನಡೆದ ಪಂದ್ಯದಲ್ಲಿ 14 ವರ್ಷದ ಪೋರ ವೈಭವ ಸೂರ್ಯವಂಶಿ 36 ಎಸೆತಗಳಲ್ಲಿ ಶತಕ ದಾಖಲಿಸಿದರು. ಅವರು 84 ಎಸೆತಗಳಲ್ಲಿ 190 ರನ್ ಹೊಡೆದರು. ಅದರಲ್ಲಿ 16 ಬೌಂಡರಿ, 15 ಸಿಕ್ಸರ್‌ಗಳು ಸೇರಿವೆ. ಬಿಹಾರದ ಆಯುಷ್ ಲೋರುಖಾ (116 ರನ್) ಮತ್ತು ಸಕೀಬುಲ್ ಗನಿ (ಔಟಾಗದೇ 128, 40ಎ) ಶತಕ ಗಳಿಸಿದರು. ಸಕೀಬುಲ್ ಅವರು 32 ಎಸೆತಗಳಲ್ಲಿ ಮೂರಂಕಿ ದಾಟುವ ಮೂಲಕ ಭಾರತದ ಆಟಗಾರರ ಪೈಕಿ ಅತಿ ವೇಗದ ಶತಕ (32ಎ) ದಾಖಲಿಸಿದರು. ಇದರಿಂದಾಗಿ ತಂಡವು 6 ವಿಕೆಟ್‌ಗಳಿಗೆ 574 ರನ್ ಗಳಿಸಿತು. ವಿಜಯ್ ಹಜಾರೆ ಟೂರ್ನಿ ಇತಿಹಾಸದಲ್ಲಿಯೇ ಇದು ಗರಿಷ್ಠ ಮೊತ್ತವಾಗಿದೆ. ಪಂದ್ಯದಲ್ಲಿ ಬಿಹಾರವು 397 ರನ್‌ಗಳಿಂದ ಜಯಿಸಿದ್ದು ದಾಖಲೆ.

ಸಮಲ್ ದ್ವಿಶತಕ: ಬೆಂಗಳೂರು ಹೊರವಲಯದ ಆಲೂರಿನಲ್ಲಿ ನಡೆದ ಡಿ ಗುಂಪಿನ ಪಂದ್ಯದಲ್ಲಿ ಒಡಿಶಾ ತಂಡದ ಆರಂಭ ಆಟಗಾರ ಸ್ವಸ್ತಿಕ್ ಸಮಲ್ (212; 169ಎ, 21ಬೌಂಡರಿ, 8ಸಿಕ್ಸರ್) ದ್ವಿಶತಕ ಹೊಡೆದರು.

ದೆಹಲಿ ಗೆಲುವಿನಲ್ಲಿ ಮಿಂಚಿದ ಕೊಹ್ಲಿ

ದೆಹಲಿ ತಂಡದ ಪರ ಕಣಕ್ಕಿಳಿದ ‘ಚೇಸಿಂಗ್ ಮಾಸ್ಟರ್’ ವಿರಾಟ್ ಕೊಹ್ಲಿ ಏಳು ತಿಂಗಳುಗಳ ನಂತರ ಬೆಂಗಳೂರಿನಲ್ಲಿ ಆಟವಾಡಿದರು. ಆಂಧ್ರ ಎದುರು ಭರ್ಜರಿ ಶತಕ ದಾಖಲಿಸಿದರು. ದೆಹಲಿ ತಂಡವು 4 ವಿಕೆಟ್‌ಗಳಿಂದ ಗೆದ್ದಿತು.