ಬ್ಯಾಸ್ಕೆಟ್‌ಬಾಲ್‌: ಕರ್ನಾಟಕ ಪುರುಷರ ತಂಡಕ್ಕೆ ಜಯ

ಬೆಂಗಳೂರು: ಕರ್ನಾಟಕ ಪುರುಷರ ತಂಡವು ಚೆನ್ನೈನಲ್ಲಿ ನಡೆಯುತ್ತಿರುವ 75ನೇ ಸೀನಿಯರ್‌ ರಾಷ್ಟ್ರೀಯ ಬ್ಯಾಸ್ಕೆಟ್‌ಬಾಲ್‌ ಟೂರ್ನಿಯಲ್ಲಿ ಸೋಮವಾರ 94–75ರಿಂದ ಸರ್ವಿಸಸ್‌ ತಂಡವನ್ನು ಮಣಿಸಿತು. ಆದರೆ, ರಾಜ್ಯ ಮಹಿಳಾ ತಂಡವು ರೈಲ್ವೇಸ್‌ ತಂಡದ ವಿರುದ್ಧ ಪರಾಭವಗೊಂಡಿತು.

ಪುರುಷರ ತಂಡವು ಪ್ರಿಯಾಂಶು ತೋಮರ್‌ (22 ಪಾಯಿಂಟ್ಸ್‌) ಹಾಗೂ ಆ್ಯರನ್‌ ಮೊಂತೆರೊ (20 ಪಾಯಿಂಟ್ಸ್‌) ಅವರ ಜಂಟಿ ಆಟದ ಬಲದಿಂದ ಎ ಗುಂಪಿನ ಪಂದ್ಯದಲ್ಲಿ ಸರ್ವಿಸಸ್‌ ವಿರುದ್ಧ ಸುಲಭ ಜಯ ಸಾಧಿಸಿತು.

ಮಹಿಳೆಯರ ವಿಭಾಗದಲ್ಲಿ ಸಂಘಟಿತ ಆಟ ಆಡಿದ ರೈಲ್ವೆ ತಂಡವು 98–65ರಿಂದ ಕರ್ನಾಟಕ ತಂಡವನ್ನು ನಿರಾಯಾಸವಾಗಿ ಮಣಿಸಿತು.