ಮಸ್ಕತ್: ಗುರ್ಜಿತ್ ಕೌರ್ ಗಳಿಸಿದ ಹ್ಯಾಟ್ರಿಕ್, ಮೋನಿಕಾ ಮತ್ತು ಜ್ಯೋತಿ ಗಳಿಸಿದ ತಲಾ ಎರಡು ಗೋಲುಗಳ ಬಲದಿಂದ ಭಾರತ ತಂಡವು ಏಷ್ಯಾಕಪ್ ಮಹಿಳಾ ಹಾಕಿ ಟೂರ್ನಿಯಲ್ಲಿ ಸಿಂಗಪುರದ ವಿರುದ್ಧ ಭರ್ಜರಿ ಜಯ ಗಳಿಸಿತು. ಇದರೊಂಂದಿಗೆ ಸೆಮಿಫೈನಲ್ಗೂ ತಲುಪಿತು.
ಸೋಮವಾರ ನಡೆದ ‘ಎ’ ಗುಂಪಿನ ಹಣಾಹಣಿಯಲ್ಲಿ ಭಾರತದ ಆಟಗಾರ್ತಿಯರು 9–1ರಿಂದ ಎದುರಾಳಿ ತಂಡಕ್ಕೆ ಸೋಲುಣಿಸಿದರು.
ಗುರ್ಜಿತ್ 8, 37 ಮತ್ತು 48ನೇ ನಿಮಿಷಗಳಲ್ಲಿ ಕೈಚಳಕ ತೋರಿದರೆ, ಮೋನಿಕಾ (6 ಮತ್ತು 7ನೇ ನಿ.), ಜ್ಯೋತಿ (43, 58ನೇ ನಿ.) ಮಿಂಚಿದರು. ವಂದನಾ ಕಟಾರಿಯಾ (8ನೇ ನಿ.) ಮತ್ತು ಮರಿಯಾನ ಕುಜುರ್ (10ನೇ ನಿ.) ತಂಡದ ಪರ ತಲಾ ಒಂದು ಗೋಲು ಹೊಡೆದರು. 43ನೇ ನಿಮಿಷದಲ್ಲಿ ಸಿಂಗಪುರದ ತೊಹ್ ಲಿನ್ ಮಿನ್ ಅವರು ಪೆನಾಲ್ಟಿ ಕಾರ್ನರ್ ಅವಕಾಶದಲ್ಲಿ ತಂಡದ ಏಕೈಕ ಗೋಲು ಹೊಡೆದರು.
ಬುಧವಾರ ನಡೆಯುವ ನಾಲ್ಕರ ಘಟ್ಟದಲ್ಲಿ ಭಾರತ ತಂಡವು ಕೊರಿಯಾ ಸವಾಲು ಎದುರಿಸಲಿದೆ. ಮತ್ತೊಂದು ಪಂದ್ಯದಲ್ಲಿ ಮಲೇಷ್ಯಾ ತಂಡವು ಚೀನಾವನ್ನು ಎದುರಿಸಲಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.