ಇಂಡೊನೇಷ್ಯಾ ಮಾಸ್ಟರ್ಸ್ ಬ್ಯಾಡ್ಮಿಂಟನ್: ಎಂಟರ ಘಟ್ಟಕ್ಕೆ ಸಿಂಧು, ಲಕ್ಷ್ಯ
ಜಕಾರ್ತಾ: ಭಾರತದ ಅಗ್ರ ಶಟ್ಲರ್ಗಳಾದ ಪಿ.ವಿ.ಸಿಂಧು ಮತ್ತು ಲಕ್ಷ್ಯ ಸೇನ್ ಅವರು ಗುರುವಾರ ತಮ್ಮ ಎದುರಾಳಿಗಳ ವಿರುದ್ಧ ನೇರ ಆಟಗಳ ಗೆಲುವಿನೊಡನೆ ಇಂಡೊನೇಷ್ಯಾ ಮಾಸ್ಟರ್ಸ್ ಬ್ಯಾಡ್ಮಿಂಟನ್ ಸೂಪರ್ 500 ಟೂರ್ನಿಯ ಸಿಂಗಲ್ಸ್ ಕ್ವಾರ್ಟರ್ಫೈನಲ್ಗೆ ದಾಪುಗಾಲಿಟ್ಟರು.
₹4.58 ಕೋಟಿ ಬಹುಮಾನದ ಈ ಟೂರ್ನಿಯ ಪುರುಷರ ಸಿಂಗಲ್ಸ್ ಎರಡನೇ ಸುತ್ತಿನಲ್ಲಿ ಲಕ್ಷ್ಯ 21–10, 21–11 ರಿಂದ ಹಾಂಗ್ಕಾಂಗ್ನ ಜೇಸನ್ ಗುನವಾನ್ ಅವರನ್ನು ಪರಾಭವಗೊಳಿಸಿದರು.
ಉತ್ತರಾಖಂಡದ 24 ವರ್ಷ ವಯಸ್ಸಿನ ಆಟಗಾರ ಎಂಟರ ಘಟ್ಟದ ಪಂದ್ಯದಲ್ಲಿ ಥಾಯ್ಲೆಂಡ್ನ ಉದಯೋನ್ಮುಖ ಆಟಗಾರ ಪಣಿತ್ಚಫೊನ್ ತೀರರತ್ಸಕುಲ್ ಅವರನ್ನು ಎದುರಿಸಲಿದ್ದಾರೆ. ಥಾಯ್ಲೆಂಡ್ನ ಆಟಗಾರ ಇನ್ನೊಂದು ಪಂದ್ಯದಲ್ಲಿ ಪ್ಯಾರಿಸ್ ಒಲಿಂಪಿಕ್ಸ್ ಕಂಚಿನ ಪದಕ ವಿಜೇತ ಲೀ ಝಿ ಜಿಯಾ (ಮಲೇಷ್ಯಾ) ಅವರನ್ನು ಹಿಮ್ಮೆಟ್ಟಿಸಿದರು.
ಎರಡು ಬಾರಿಯ ಒಲಿಂಪಿಕ್ ಪದಕ ವಿಜೇತೆ ಸಿಂಧು ಎರಡನೇ ಸುತ್ತಿನ ಪಂದ್ಯದಲ್ಲಿ 21–19, 21–18 ರಿಂದ ಡೆನ್ಮಾರ್ಕ್ನ ಲಿನ್ ಹೊಯ್ಮಾರ್ಕ್ ಜೇರ್ಫೆಲ್ಟ್ ಅವರನ್ನು ಸೋಲಿಸಿದರು. ಸಿಂಧು, ಡೆನ್ಮಾರ್ಕ್ನ ಈ ಎದುರಾಳಿಯ ವಿರುದ್ಧ ಇದುವರೆಗೆ ಆಡಿರುವ ಆರು ಪಂದ್ಯಗಳಲ್ಲಿ ಐದನ್ನು ಗೆದ್ದಂತಾಗಿದೆ.
ಸಿಂಧು ಮುಂದಿನ ಸುತ್ತಿನಲ್ಲಿ ಅಗ್ರ ಶ್ರೇಯಾಂಕದ ಆಟಗಾರ್ತಿ, ಚೀನಾದ ಯು ಫಿ ಅವರನ್ನು ಎದುರಿಸಲಿದ್ದಾರೆ. ವಿಶ್ವ ಕ್ರಮಾಂಕದಲ್ಲಿ ಚೀನಾದ ಆಟಗಾರ್ತಿ ನಾಲ್ಕನೇ ಸ್ಥಾನದಲ್ಲಿದ್ದಾರೆ. ಈವರೆಗಿನ 13 ಮುಖಾಮುಖಿಯಲ್ಲಿ ಚೀನಾದ ಆಟಗಾರ್ತಿ ಯು ಫಿ 7–5 ಗೆಲುವಿನ ದಾಖಲೆ ಹೊಂದಿದ್ದಾರೆ.
ವಿಶ್ವದ ಮಾಜಿ ನಂಬರ್ ವನ್ ಆಟಗಾರ ಕಿದಂಬಿ ಶ್ರೀಕಾಂತ್ ಅವರ ಸವಾಲು ಅಂತ್ಯಗೊಂಡಿತು. ಅವರು 11–21, 10–21 ರಲ್ಲಿ ತೈವಾನ್ನ ಚೌ ಟಿಯೆನ್ ಚೆನ್ ಅವರಿಗೆ ಹೋರಾಟ ತೋರದೇ ಸೋತರು.
ಆದರೆ ಮಹಿಳಾ ಸಿಂಗಲ್ಸ್ನಲ್ಲಿ ಅನ್ಮೋಲ್ ಖಾರ್ಬ್ ಅವರು ತೀವ್ರ ಹೋರಾಟ ತೋರಿದ ಜಪಾನ್ನ ನೊಝೊಮಿ ಒಕುಹಾರ ಅವರಿಗೆ ಮಣಿದರು. ವಿಶ್ವದ ಮಾಜಿ ಅಗ್ರಮಾನ್ಯ ಆಟಗಾರ್ತಿ 21–16, 14–21, 11–21 ರಲ್ಲಿ ಜಯಗಳಿಸಲು 56 ನಿಮಿಷ ಆಡಬೇಕಾಯಿತು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.