ಫ್ರೆಂಚ್‌ ಓಪನ್ ಟೆನಿಸ್‌ ಟೂರ್ನಿ: ಸೆಮಿಗೆ ಸಿನ್ನರ್ ಲಗ್ಗೆ
ಚೆಂಡನ್ನು ಹಿಂತಿರುಗಿಸುತ್ತಿರುವ ಸಿನ್ನರ್
ಪ್ಯಾರಿಸ್‌: ಇಟಲಿಯ ಯಾನಿಕ್ ಸಿನ್ನರ್ ಅವರು ಮಂಗಳವಾರ ನಡೆದ ಪಂದ್ಯದಲ್ಲಿ 6–2, 6–4, 7–6 (3) ರಿಂದ ಹತ್ತನೇ ಕ್ರಮಾಂಕದ ಗ್ರಿಗರ್ ದಿಮಿಟ್ರೊವ್‌ ಅವರನ್ನು ಸೋಲಿಸಿ ಫ್ರೆಂಚ್‌ ಓಪನ್ ಟೂರ್ನಿಯ ಸಿಂಗಲ್ಸ್ ಸೆಮಿಫೈನಲ್‌ ಪ್ರವೇಶಿಸಿದರು. ಆ ಮೂಲಕ ಎರಡನೇ ಗ್ರ್ಯಾನ್‌ಸ್ಲಾಮ್ ಟೂರ್ನಿ ಗೆಲ್ಲುವ ನಿಟ್ಟಿನಲ್ಲಿ ಎರಡನೇ ಶ್ರೇಯಾಂಕದ ಸಿನ್ನರ್ ದೃಢವಾದ ಹೆಜ್ಜೆಯಿಟ್ಟರು.
ಮೊದಲ ಸಲ ವಿಶ್ವದ ಅಗ್ರಪಟ್ಟಕ್ಕೇರುವುದು ಖಚಿತವಾದ ಕೆಲವೇ ನಿಮಿಷಗಳ ಮೊದಲು, 22 ವರ್ಷ ವಯಸ್ಸಿನ ಸಿನ್ನರ್ ಅವರಿಗೆ ಈ ಗೆಲುವು ಒಲಿಯಿತು.
ಅವರಿಗೆ ಸೆಮಿಫೈನಲ್‌ನಲ್ಲಿ ಇನ್ನೊಬ್ಬ ಯುವ ತಾರೆ ಕಾರ್ಲೊಸ್‌ ಅಲ್ಕರಾಜ್ ಸಂಭವನೀಯ ಎದುರಾಳಿಯಾಗಲಿದ್ದು ಸತ್ವಪರೀಕ್ಷೆ ಎದುರಾಗಲಿದೆ. ಅಲ್ಕರಾಜ್ ಅದಕ್ಕೆ ಮೊದಲು ಎಂಟರ ಘಟ್ಟದಲ್ಲಿ ಸ್ಟೆಫಾನೊಸ್‌ ಸಿಸಿಪಸ್‌ ಅವರನ್ನು ಎದುರಿಸಲಿದ್ದಾರೆ.
ಸಿನ್ನರ್ ಅವರು ಫಿಲಿಪ್ ಶಾಟಿಯೆ ಅಂಕಣದಲ್ಲಿ ಬಲ್ಗೇರಿಯಾದ ದಿಮಿಟ್ರೋವ್ ಅವರ ಬ್ಯಾಕ್‌ಹ್ಯಾಂಡ್‌ ಹೊಡೆತಗಳಿಗೆ ಸವಾಲು ಹಾಕಿದರು. ಸಿನ್ನರ್‌ಗೆ ಮೊದಲ ಸೆಟ್‌ನಲ್ಲಿ ಡಬಲ್‌ ಬ್ರೇಕ್ ದೊರೆಯಿತು. ಹೀಗಾಗಿ ಹೆಚ್ಚಿನ ಶ್ರಮಹಾಕುವ ಪ್ರಮೇಯ ಬರಲಿಲ್ಲ. ಪ್ರಬಲ ಕ್ರಾಸ್‌ಕೋರ್ಟ್‌ ಹೊಡೆತಗಳ ಮೂಲಕ ಅವರು ಪ್ರಾಬಲ್ಯ ಮುಂದುವರಿಸಿ, ಋತುವಿನ 33ನೇ ಗೆಲುವಿಗೆ ಅಡಿಪಾಯ ಹಾಕಿದರು.
ದಿಮಿಟ್ರೋವ್ ಮೂರನೇ ಸೆಟ್‌ನಲ್ಲಿ ಪ್ರಬಲ ಹೋರಾಟ ತೋರಿದರು. ಈ ವರ್ಷ ಬ್ರಿಸ್ಬೇನ್‌ ಓಪನ್ ಪ್ರಶಸ್ತಿ ಗೆದ್ದಿದ್ದ ಅವರು, ಸೋಲುವ ಮೊದಲು ಸೆಟ್‌ಅನ್ನು ಟೈಬ್ರೇಕರ್‌ಗೆ ಬೆಳೆಸಿದರು. ಆದರೆ ಸಿನ್ನರ್ ಅವರ ನಿಖರವಾದ ಆಟ ಅವರಿಗೆ ನಿರ್ಣಾಯಕ ಸಂದರ್ಭದಲ್ಲಿ ಗೆಲುವು ತಂದುಕೊಟ್ಟಿತು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.