ITF | ಮಹಿಳೆಯರ ವಿಶ್ವ ಟೆನಿಸ್‌ ಟೂರ್ನಿ: ರಿಯಾ ಭಾಟಿಯಾಗೆ ಗೆಲುವು

ಮೈಸೂರು: ಭಾರತದ ರಿಯಾ ಭಾಟಿಯಾ ಇಲ್ಲಿ ನಡೆಯುತ್ತಿರುವ ಐಟಿಎಫ್‌ ಮಹಿಳೆಯರ ವಿಶ್ವ ಟೆನಿಸ್‌ ಟೂರ್‌ ಟೂರ್ನಿಯ ಸಿಂಗಲ್ಸ್‌ನ ಮೊದಲ ಸುತ್ತಿನ ಪಂದ್ಯದಲ್ಲಿ ಸೊಗಸಾದ ಆಟವಾಡಿದರು.

ಚಾಮರಾಜಪುರಂನ ಮೈಸೂರು ಟೆನಿಸ್‌ ಕ್ಲಬ್‌ (ಎಂಟಿಸಿ) ನಲ್ಲಿ ಬುಧವಾರ, ಮಂಡ್ಯದ ಕಶ್ವಿ ಸುನಿಲ್ ಅವರನ್ನು 6–3, 7–5ರಿಂದ ಮಣಿಸಿದರು.

ಮೊದಲ ಸೆಟ್‌ ಅನ್ನು ಸುಲಭವಾಗಿ ವಶಕ್ಕೆ ಪಡೆದ ಟೂರ್ನಿಯ 4ನೇ ಶ್ರೇಯಾಂಕಿತೆ ರಿಯಾ ಅವರನ್ನು ಎರಡನೇ ಸೆಟ್‌ನಲ್ಲಿ 15 ವರ್ಷದ ಕಶ್ವಿ ಕಾಡಿದರು. ಅಂತಿಮವಾಗಿ 7–5ರಿಂದ ಗೆದ್ದರು.

ತಮಿಳುನಾಡಿನ ಲಕ್ಷ್ಮಿಪ್ರಭಾ ಅರುಣ್‌ಕುಮಾರ್ 6–2, 6–2ರಿಂದ 6ನೇ ಶ್ರೇಯಾಂಕದ ಆಟಗಾರ್ತಿ ಕರ್ನಾಟಕದ ಸೋಹಾ ಸಾದಿಕ್‌ ಅವರನ್ನು ಮಣಿಸಿ ಅಚ್ಚರಿ ಮೂಡಿಸಿದರು. ಬಲವಾದ ಸರ್ವ್‌ಗಳನ್ನು ಮುರಿಯಲು ಸೋಹಾ ವಿಫಲರಾದರು.

ಫಲಿತಾಂಶ: ಸಿಂಗಲ್ಸ್: ಪೂಜಾ ಇಂಗಳೆ 6–4, 6–3ರಿಂದ ಅಭಯಾ ವೇಮುರಿ ಎದುರು, ತನಿಷಾ ಕಶ್ಯಪ್‌ 6–4, 6–1ರಿಂದ ಸೆಜಲ್‌ ಗೋಪಾಲ್ ಎದುರು, ಯಶಸ್ವಿನಿ ಪನ್ವರ್ 7–5, 6–2ರಿಂದ ಅಪೂರ್ವ ಪನ್ವರ್ ಎದುರು, ಜಪಾನ್‌ನ ಕೈಲಿ ಡೆಮಿತ್ಸೊ 6–1, 6–1ರಿಂದ ಸೌಮ್ಯಾ ವೈಗ್ ಎದುರು, ರಷ್ಯಾದ ಪೊಲಿನಾ ಕೈಬೆಕೊವಾ 6–0, 2–6, 7–5ರಿಂದ ಕಾಶಿಶ್‌ ಭಾಟಿಯಾ ಎದುರು, ಹರ್ಷಿನಿ ಎನ್‌.ನಾಗರಾಜ್ 6–4, 4–6, 7–5ರಿಂದ ಅದಿತಿ ರಾವತ್‌ ಎದುರು ಜಯ. 

ಡಬಲ್ಸ್: ಸ್ಮೃತಿ ಭಾಸಿನ್‌– ಡೆನ್ಮಾರ್ಕ್‌ನ ಎಲಿನಾ ಜಾಮ್‌ಶಿದಿ 6–4, 6–4ರಿಂದ ಸೋನಲ್ ಪಾಟೀಲ– ಅಮೆರಿಕಾದ ಪ್ರಿಶಾ ವ್ಯಾಸ್‌ ಎದುರು, ದಿವಾ ಭಾಟಿಯಾ– ಸಾಯಿ ಸುಶ್ಮಿತಾ 4–6, 6–3, 10–4ರಿಂದ ಹಾಂಗ್‌ಕಾಂಗ್‌ನ ನವೊಮಿ ಹಾಗಿ– ಜಪಾನ್‌ನ ಕೈಲಿ ಡೆಮಿತ್ಸೊ ಎದುರು, ಹುಮೇರಾ ಬಹರ್ಮಸ್‌– ಪೂಜಾ ಇಂಗಳೆ 7–6, 6–4ರಿಂದ ಯಶಸ್ವಿನಿ ಪನ್ವರ್– ವಂಶಿತಾ ಪಟಾನಿಯಾ ಎದುರು ಗೆಲುವು.