ಫ್ರೆಂಚ್‌ ಓಪನ್ ಟೆನಿಸ್‌: ಒಂದು ಸಾವಿರ‌ ಪ್ರೇಕ್ಷಕರಿಗೆ ಅವಕಾಶ

ಪ್ಯಾರಿಸ್‌: ಫ್ರೆಂಚ್‌ ಓಪನ್‌ ಟೆನಿಸ್‌ ಟೂರ್ನಿಗೆ ಪ‍್ರೇಕ್ಷಕರ ಸಂಖ್ಯೆಯನ್ನು ಕೊರೊನಾ ವೈರಸ್‌ ಸೋಂಕಿನ ಹಿನ್ನೆಲೆಯಲ್ಲಿ ಮತ್ತೊಮ್ಮೆ ಕಡಿತಗೊಳಿಸಲಾಗಿದೆ. ಟೂರ್ನಿಯ ಮುಖ್ಯ ಸುತ್ತಿನ ಪಂದ್ಯಗಳುಭಾನುವಾರ ಆರಂಭವಾಗಲಿದ್ದು, ದಿನವೊಂದಕ್ಕೆ 1,000 ಪ್ರೇಕ್ಷಕರಿಗೆ ಮಾತ್ರ ಅವಕಾಶ ನೀಡಲು ನಿರ್ಧರಿಸಲಾಗಿದೆ.

ಫ್ರಾನ್ಸ್‌ ಪ್ರಧಾನ ಮಂತ್ರಿ ಜೀನ್‌ ಕಾರ್ಟೆಕ್ಸ್‌ ಅವರು ಟೂರ್ನಿಗೆ ಪ್ರೇಕಕ್ಷರ ಸಂಖ್ಯೆಯನ್ನು 5000ದಿಂದ 1000ಕ್ಕೆ ಕಡಿತಗೊಳಿಸಲಾಗುವುದು ಎಂದು ಗುರುವಾರ ಹೇಳಿದ್ದರು. ಆದರೆ ಈ ಸಂಖ್ಯೆಯು ಪ್ರೇಕ್ಷಕರಿಗೆ ಮಾತ್ರ ಸೀಮಿತವಾಗಿದ್ದು, ಆಟಗಾರರು, ಕೋಚ್‌ಗಳು, ಸಂಘಟಕರು ಹಾಗೂ ರೋಲ್ಯಾಂಡ್‌ ಗ್ಯಾರೋಸ್‌ನ ಇತರ ಉದ್ಯೋಗಿಗಳಿಗೆ ಅನ್ವಯಿಸುವುದಿಲ್ಲ ಎಂದು ಪ್ರಧಾನಿ ಕಚೇರಿಯು ಶುಕ್ರವಾರ ಸ್ಪಷ್ಟಪಡಿಸಿದೆ.

‘ಇದೊಂದು ದೊಡ್ಡ ಹೊಡೆತ. ಪ್ರೇಕ್ಷಕರಿಗೆ ಟಿಕೆಟ್‌ ಹಣವನ್ನು ಮರಳಿಸಲಾಗುವುದು‘ ಎಂದು ಫ್ರೆಂಚ್‌ ಓಪನ್‌ ಟೂರ್ನಿಯ ನಿರ್ದೇಶಕ ಗಾಯ್‌ ಫ್ರಾಂಕಿನ್ಫೊ ಹೇಳಿದ್ದಾರೆ.

ಪ್ಯಾರಿಸ್‌ನಲ್ಲಿ ಕೊರೊನಾ ಸೋಂಕು ಪ್ರಕರಣಗಳು ಏರುಗತಿಯಲ್ಲಿ ಸಾಗಿದ್ದರಿಂದ, ಟೂರ್ನಿಯ ಪ್ರೇಕ್ಷಕರ ಸಂಖ್ಯೆಯನ್ನು ಕಡಿತಗೊಳಿಸುತ್ತಾ ಬರಲಾಗುತ್ತಿದೆ. ಮೊದಲು 11,500 ಮಂದಿಗೆ ಅವಕಾಶ ಎಂದು ಹೇಳಲಾಗಿತ್ತು. ಬಳಿಕ 5,000ಕ್ಕೆ ಇಳಿಸಲಾಯಿತು. ಈಗ 1000ಕ್ಕೆ ಕಡಿತಗೊಳಿಸಲಾಗಿದೆ.