Godrej InsuliCool+: ಪ್ರವಾಸ ಸ್ನೇಹಿ ಇನ್ಸುಲಿನ್ ಕಿಟ್
ಪ್ರವಾಸ ಎಂದೊಡನೆ ಎಲ್ಲರ ಮನಸ್ಸೂ ಕ್ಷಣ ಉಲ್ಲಸಿತಗೊಳ್ಳುತ್ತದೆ. ಆದರೆ, ಮಧುಮೇಹಿಗಳು ತಮ್ಮ ಕಟ್ಟುನಿಟ್ಟಿನ ಪಥ್ಯಾಹಾರ, ಮಾತ್ರೆಗಳು ಹಾಗೂ ಮುಖ್ಯವಾಗಿ ಇನ್ಸುಲಿನ್ ರಗಳೆಗಳ ಕಾರಣದಿಂದ ಪ್ರವಾಸದ ಪ್ರಯಾಸಕ್ಕೆ ಆತಂಕಕ್ಕೊಳಗಾಗುವುದುಂಟು. ನಿಯಮಿತವಾಗಿ ಇನ್ಸುಲಿನ್ ತೆಗೆದುಕೊಳ್ಳಬೇಕಾದವರು, ಇನ್ಸುಲಿನ್ ಶೇಖರಣೆಯ ಸಮಸ್ಯೆಯಿಂದಾಗಿ ದೀರ್ಘ ಪ್ರಯಾಣಗಳಿಗೆ ಹೋಗಲು ಹಿಂಜರಿಯುವುದುಂಟು.
ಈ ಅಗತ್ಯವನ್ನು ಗಮನದಲ್ಲಿಟ್ಟುಕೊಂಡು, ಗೊದ್ರೇಜ್ ಕಂಪನಿಯು, ‘ಗೊದ್ರೇಜ್ ಇನ್ಸುಲಿಕೂಲ್+’ (Godrej InsuliCool+) ಸಾಧನ ಪರಿಚಯಿಸಿದೆ. ಥರ್ಮೋಎಲೆಕ್ಟ್ರಿಕ್ ಕೂಲಿಂಗ್ ತಂತ್ರಜ್ಞಾನವನ್ನು ಹೊಂದಿರುವ ಈ ಕಿಟ್, ಇನ್ಸುಲಿನ್ ಪೆನ್ನುಗಳು ಮತ್ತು ಬಾಟಲಿಗಳನ್ನು ತಂಪಾಗಿರಿಸುವ ಜೊತೆಗೆ, ಪ್ರವಾಸದ ವೇಳೆ ಹೆಗಲಿಗೆ ಹಾಕಿಕೊಂಡು ಹೋಗಲು ಅನುಕೂಲಕರವಾಗಿದೆ. ಇದರ ಸಹಾಯದಿಂದ ಯಾವುದೇ ಭಾಗಕ್ಕೆ, ಯಾವುದೇ ಸಮಯದಲ್ಲಿ ಇನ್ಸುಲಿನ್‌ಗಳನ್ನು ತೆಗೆದುಕೊಂಡು ಪ್ರಯಾಣಿಸಬಹುದು.
ಇನ್ಸುಲಿನ್ ಅನ್ನು ಪರಿಣಾಮಕಾರಿಯಾಗಿ ಶೇಖರಿಸಿಡಲು 2 ರಿಂದ 8 ಡಿಗ್ರಿ ತಾಪಮಾನವನ್ನು ಕಾಪಾಡಬೇಕಾಗುತ್ತದೆ. ಮನೆಯಲ್ಲಿರುವಾಗ ಫ್ರಿಡ್ಜ್‌ನಲ್ಲಿ ಇದನ್ನು ಶೇಖರಿಸಲಾಗುತ್ತದೆ. ಆದರೆ, ಸಭೆ, ಸಮಾರಂಭ, ಪ್ರಯಾಣದ ಸಂದರ್ಭದಲ್ಲಿ ಇನ್ಸುಲಿನ್ ಅನ್ನು ತೆಗೆದುಕೊಂಡು ಹೋಗುವುದು ಮತ್ತು ನಿರ್ವಹಿಸುವುದು ಕಷ್ಟ. ಇನ್ಸುಲಿನ್ ಅವಲಂಬಿತ ಮಧುಮೇಹಿಗಳ ಈ ಸವಾಲುಗಳಿಗೆ ಗೋದ್ರೇಜ್ ಇನ್ಸುಲಿಕೂಲ್+ ಪರಿಹಾರ ಒದಗಿಸುತ್ತದೆ.
ಉತ್ಪನ್ನದ ಆಂತರಿಕ ತಾಪಮಾನ 2 ಡಿಗ್ರಿಯಿಂದ ರಿಂದ 8 ಡಿಗ್ರಿಯ ಮಿತಿಯಲ್ಲಿರುವುದರಿಂದ ಇದನ್ನು ಲಸಿಕೆಗಳು, ಔಷಧಗಳು, ಜೈವಿಕ ಮಾದರಿಗಳನ್ನು ಸಂಗ್ರಹಿಸಲು ಸಹ ಬಳಸಬಹುದು. ಬಾಹ್ಯ ಬ್ಯಾಟರಿ ಪ್ಯಾಕ್ ಮತ್ತು ಕಾರ್ ಚಾರ್ಜರ್ ಇರುವ ಈ ಕಿಟ್ ಅನ್ನು ಮನೆಯಲ್ಲಿ, ಕಚೇರಿಯಲ್ಲಿ ಮತ್ತು ಪ್ರಯಾಣದ ಸಮಯದಲ್ಲಿ ಬಳಸಬಹುದು.
ಇದರಲ್ಲಿ 10 ಮಿಲಿಯ 9 ಬಾಟಲುಗಳನ್ನು ಸಂಗ್ರಹಿಸಬಹುದು. ಇದು ಕೇವಲ 2 ಕೇಜಿಯಷ್ಟು ತೂಕವನ್ನು ಹೊಂದಿದ್ದು, ಪ್ರತ್ಯೇಕ ಬ್ಯಾಗಿನಲ್ಲಿ ಬರುತ್ತದೆ. ಸಾಧನದ ಜೊತೆಗೆ ಚಾರ್ಜರ್ ಮತ್ತು 4 ಗಂಟೆಗಳ ಬ್ಯಾಟರಿ ಬ್ಯಾಕಪ್‌ನೊಂದಿಗೆ 20,000 ಪವರ್‌ ಬ್ಯಾಂಕ್‌ ಬಾಟರಿಯೂ ಇದೆ. ಇದರ ಬೆಲೆ ₹8,499.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.