ಮುಸ್ತಫಾ ಜತೆ ಸರಳ ವಿವಾಹವಾದ ಪ್ರಿಯಾಮಣಿ

ಬೆಂಗಳೂರು: ದಕ್ಷಿಣ ಭಾರತದ ಬಹುಭಾಷಾ ನಟಿ  ಪ್ರಿಯಾಮಣಿ ಬುಧವಾರ ತಮ್ಮ ಬಹುಕಾಲದ ಗೆಳೆಯ ಮುಸ್ತಫಾ ರಾಜಾ ಅವರನ್ನು ವಿವಾಹವಾದರು.

ಇಲ್ಲಿನ ಜಯನಗರದಲ್ಲಿರುವ ಸಬ್‌ರಿಜಿಸ್ಟರ್‌ ಕಚೇರಿಯಲ್ಲಿ ಪ್ರಿಯಾಮಣಿ ಸರಳವಾಗಿ ರಿಜಿಸ್ಟರ್‌ ಮ್ಯಾರೇಜ್‌ ಆದರು. ಈ ಸಂದರ್ಭದಲ್ಲಿ ಪ್ರಿಯಾಮಣಿ ಮತ್ತು ಮುಸ್ತಫಾ ಅವರ ಕುಟುಂಬ ವರ್ಗದವರು ಮತ್ತು ಆಪ್ತರು ಮಾತ್ರ ಭಾಗವಹಿಸಿದ್ದರು.

ಪ್ರಿಯಾಮಣಿ ಹಸಿರು ಮತ್ತು ಹಳದಿ ಬಣ್ಣ ಮಿಶ್ರಿತ ಸೀರೆಯಲ್ಲಿ ಕಂಗೊಳಿಸಿದರೆ, ಮುಸ್ತಫಾ ರಾಜಾ ಅವರು ಬಿಳಿ ಕುರ್ತಾದಲ್ಲಿ ಮಿಂಚುತ್ತಿದ್ದರು.

ಕಳೆದ ಮೇ 27ರಂದು ಪ್ರಿಯಾಮಣಿ ಮುಸ್ತಫಾ ಅವರೊಂದಿಗೆ ನಿಶ್ಚಿತಾರ್ಥ ಮಾಡಿಕೊಂಡಿದ್ದರು. ಮುಂಬೈ ನಿವಾಸಿಯಾದ ಮುಸ್ತಫಾ ಉದ್ಯಮಿಯಾಗಿದ್ದಾರೆ.