ಧೂಮ ಸೇವಿಸುವ ಆಚರಣೆ

‘ಧೂಮಪಾನ ಆರೋಗ್ಯಕ್ಕೆ ಹಾನಿಕರ’ ಎಂಬ ಮಾತು ಹೆಚ್ಚು ಪ್ರಚಲಿತ. ಆದರೆ ಆಸ್ಟ್ರೇಲಿಯಾದ ಬುಡಕಟ್ಟು ಜನಾಂಗವೊಂದು ಧೂಮ ಸೇವಿಸುವ ಆಚರಣೆಯನ್ನೇ ನಡೆಸುತ್ತದೆ. ಹಾಗೆಂದು ಇದನ್ನು ಸಿಗರೇಟ್ ಸೇದುವುದು ಎಂದು ಭಾವಿಸಬೇಕಿಲ್ಲ.

ಸ್ಥಳೀಯ ಗಿಡಮೂಲಿಕೆಗಳನ್ನು ಒಟ್ಟುಗೂಡಿಸಿ ಸುಟ್ಟು, ಅದರ ಹೊಗೆ ಸೇವಿಸುವುದು ಈ ಆಚರಣೆಯ ಮೂಲ. ಹೀಗೆ ಸುಡುವ ಸಸ್ಯಗಳಲ್ಲಿ ಔಷಧೀಯ ಅಂಶಗಳಿದ್ದು, ದೇಹ ಶುದ್ಧಿಗೊಳಿಸುವ ಪ್ರಕ್ರಿಯೆ ನಡೆಯುತ್ತದೆಯಂತೆ. ಈ ಹೊಗೆಯಿಂದ ದುಷ್ಟಶಕ್ತಿಗಳು ದೂರ ಉಳಿಯುತ್ತವೆ ಎಂಬ ನಂಬಿಕೆಯೂ ತಳುಕು ಹಾಕಿಕೊಂಡಿದೆ.

ಧಾರ್ಮಿಕತೆಯೊಂದಿಗೆ ಆರೋಗ್ಯಪೂರಕ ಆಯಾಮವೂ ಇದಕ್ಕಿದೆ. ಈ ಆಚರಣೆಗೆ ಸಂಬಂಧಿಸಿದಂತೆ ಯುನಿವರ್ಸಿಟಿ ಆಫ್ ನ್ಯೂ ಇಂಗ್ಲೆಂಡ್‌ನಲ್ಲಿ ಇತ್ತೀಚೆಗೆ ಸಂಶೋಧನೆಯೂ ನಡೆದಿದೆ. ಸಮಾರಂಭಗಳಲ್ಲಿ, ಜನನ ಹಾಗೂ ಮರಣ ಸಂಭವಿಸಿದಾಗ ಈ ಆಚರಣೆ ನಡೆಯುತ್ತದೆ.