ವಸುಂಧರಾ ಕದಲೂರು ಬರೆದ ಕವಿತೆ: ಒಳಪ್ರಜ್ಞೆಯ ಪ್ರಶ್ನೆಗಳು…

ಆ ನಾಲ್ಕು ಕಾಲಿನ ನಿರಾಸಕ್ತಿಗಳು

ಅಷ್ಟೇನೂ ಮುಖ್ಯವಲ್ಲದ
ಅಡ್ಡರಸ್ತೆಗಳ ನಡುವಲ್ಲಿ
ದಾರಿಗಡ್ಡ ಮಲಗಿರುತ್ತವೆ..

ಜಗದ ತುರ್ತುಗಳನು ತಲೆ ಮೇಲೆ
ಹೊತ್ತಂತೆ ಬರುವ ಗಾಡಿಗಳಿಗೆ
ಸರಕ್ಕನೆ ಬ್ರೇಕು ಹಾಕಿಸಿ ವಾಸ್ತವ
ದರ್ಶನ ಮಾಡಿಸುವ ನಡುರಸ್ತೆ
ನಿಲುಗಡೆಗಳಿವು..

ಈ ಬೀದಿಕೂಸುಗಳು, ಎಲ್ಲರ
ಅನುಕಂಪ ಯಾಚಕರು; ಸುಗ್ರಾಸ
ಬೇಡದೆ, ಸಿಕ್ಕಿದನು ತಿಂದು ಸ್ವಸ್ಥ
ಮಲಗುವ ಚಿರಂಜೀವಿಗಳು..

ಸಂತಾನ ಹರಣಕೆ ಮೈಯೊಡ್ಡುತಾ,
ಸುಖಕೆ ಮರೀಚಿಕೆಗಳಾಗುತಾ ಆಗೀಗ
ವ್ಯಗ್ರರಾಗಿಯೂ, ಬೀದಿ ರಕ್ಷಕರಾಗಿಯೂ
ನಮ್ಮೊಳ ಪ್ರಜ್ಞೆಯ ಪ್ರಶ್ನೆಗಳಾಗುವವು..