ದೇಶಿ ವಿಮಾನ ಪ್ರಯಾಣ ಚೇತರಿಕೆ

ನವದೆಹಲಿ: ದೇಶಿ ವಿಮಾನ ಪ್ರಯಾಣಿಕರ ಸಂಖ್ಯೆ ತಿಂಗಳಿನಿಂದ ತಿಂಗಳಿಗೆ ಹೆಚ್ಚಾಗುತ್ತಿದೆ. ಆಗಸ್ಟ್‌ನಲ್ಲಿ 28.32 ಲಕ್ಷ ಮಂದಿ ದೇಶದೊಳಗೆ ವಿಮಾನ ಪ್ರಯಾಣ ಮಾಡಿದ್ದರು. ಸೆಪ್ಟೆಂಬರ್‌ನಲ್ಲಿ 39.43 ಲಕ್ಷ ಮಂದಿ ಪ್ರಯಾಣಿಸಿದ್ದಾರೆ.

ಆದರೆ, 2019ರ ಸೆಪ್ಟೆಂಬರ್‌ಗೆ ಹೋಲಿಸಿದರೆ 2020ರ ಸೆಪ್ಟೆಂಬರ್‌ನಲ್ಲಿ ಪ್ರಯಾಣಿಸಿರುವವರ ಪ್ರಮಾಣ ಶೇ 66ರಷ್ಟು ಕಡಿಮೆ ಇದೆ ಎಂದು ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ (ಡಿಜಿಸಿಎ) ತಿಳಿಸಿದೆ.

ಒಟ್ಟಾರೆ ದೇಶಿ ವಿಮಾನ ಮಾರುಕಟ್ಟೆಯಲ್ಲಿ ಇಂಡಿಗೊ ಶೇ 57.5ರಷ್ಟು ಪಾಲು ಹೊಂದಿದ್ದು, ಸೆಪ್ಟೆಂಬರ್‌ನಲ್ಲಿ 22.66 ಲಕ್ಷ ಜನ ಇಂಡಿಗೊ ವಿಮಾನಗಳ ಮೂಲಕ ಪ್ರಯಾಣಿಸಿದ್ದಾರೆ. ಮಾರುಕಟ್ಟೆ ಪಾಲಿನ ಲೆಕ್ಕದಲ್ಲಿ ಎರಡನೇ ಸ್ಥಾನದಲ್ಲಿರುವ ಸ್ಪೈಸ್‌ ಜೆಟ್‌ ವಿಮಾನಗಳಲ್ಲಿ 5.3 ಲಕ್ಷ ಮಂದಿ ಪ್ರಯಾಣ ಮಾಡಿದ್ದಾರೆ ಎಂದು ಡಿಜಿಸಿಎ ಹೇಳಿದೆ.

ಅದೇ ರೀತಿ ಏರ್‌ ಇಂಡಿಯಾ 3.72 ಲಕ್ಷ, ಏರ್‌ ಏಷ್ಯಾ ಇಂಡಿಯಾ 2.35 ಲಕ್ಷ, ವಿಸ್ತಾರಾ 2.58 ಲಕ್ಷ ಹಾಗೂ ಗೊಏರ್‌ನಲ್ಲಿ 2.64 ಲಕ್ಷ ಮಂದಿ ಪ್ರಯಾಣಿಸಿದ್ದಾರೆ.