ಎಂಎಸ್ಎಂಇಗಳಿಗೆ ಕನ್ನಡ ಭಾಷೆಯ ಅನುಕೂಲ ಕಲ್ಪಿಸಿದ ಅಮೆಜಾನ್

ಬೆಂಗಳೂರು: ದೇಶಾದ್ಯಂತ ಇರುವ ವಿವಿಧ ಎಂಎಸ್ಎಂಇ, ಸ್ಥಳೀಯ ಅಂಗಡಿಗಳು ಮತ್ತು ಮಾರಾಟಗಾರರಿಗೆ ಅನುಕೂಲವಾಗುವಂತೆ ಅಮೆಜಾನ್ ಪ್ರಾದೇಶಿಕ ಭಾಷಾ ಬೆಂಬಲವನ್ನು ನೀಡುತ್ತಿದೆ. ಅದರಂತೆ, ಕನ್ನಡದಲ್ಲಿ ಕೂಡ ಸೇವೆಯನ್ನು ಅಮೆಜಾನ್ ಪ್ರಾರಂಭಿಸಿದ್ದು, ಅಮೆಜಾನ್.ಇನ್ ಮಾರ್ಕೆಟ್‌ಪ್ಲೇಸ್‌ನಲ್ಲಿ ಮಾರಾಟಗಾರರು ನೋಂದಣಿ, ಉದ್ಯಮ ನಿರ್ವಹಣೆ ಮತ್ತು ಖಾತೆ ವಿವರವನ್ನು ಕನ್ನಡದಲ್ಲಿಯೇ ನಿರ್ವಹಿಸಬಹುದಾಗಿದೆ.

ಮೊದಲ ಬಾರಿಗೆ ಆನ್‌ಲೈನ್ ಉದ್ಯಮ ನೋಂದಣಿ, ಖಾತೆ ನಿರ್ವಹಣೆಯನ್ನು ಕನ್ನಡದಲ್ಲಿಯೇ ಒದಗಿಸುವುದರಿಂದ, ಅಮೆಜಾನ್ ಮೂಲಕ ವಿವಿಧ ಸರಕುಗಳನ್ನು ಮಾರಾಟ ಮಾಡುವ ಕನ್ನಡಿಗರಿಗೆ ಅನುಕೂಲವಾಗಲಿದೆ. ಜತೆಗೆ ಕನ್ನಡ ವಿಡಿಯೊ ಟ್ಯುಟೋರಿಯಲ್ ಮೂಲಕವೂ ಮಾರಾಟಗಾರರಿಗೆ ಅಮೆಜಾನ್ ನೆರವು ನೀಡಲಿದೆ.

ಬೆಂಗಳೂರು, ಮಂಗಳೂರು, ಹುಬ್ಬಳ್ಳಿ, ಕಲಬುರ್ಗಿ ಮತ್ತು ಮೈಸೂರು ಸಹಿತ ವಿವಿಧ ಪ್ರದೇಶಗಳಲ್ಲಿ 35,000ಕ್ಕೂ ಅಧಿಕ ಮಾರಾಟಗಾರರು ಅಮೆಜಾನ್‌ನಲ್ಲಿ ನೋಂದಾಯಿಸಿಕೊಂಡಿದ್ದಾರೆ. ಈಗಾಗಲೇ ಹಿಂದಿ ಮತ್ತು ತಮಿಳು ಭಾಷಾ ಬೆಂಬಲವನ್ನು ಅಮೆಜಾನ್ ಒದಗಿಸಿದ್ದು, ಪ್ರಸ್ತುತ ಕನ್ನಡದಲ್ಲೂ ಲಭ್ಯವಿದೆ.