Ashok Leyland: ಅಶೋಕ್‌ ಲೇಲ್ಯಾಂಡ್‌ಗೆ ಜೂನ್‌ ತ್ರೈಮಾಸಿಕದಲ್ಲಿ ₹657 ಕೋಟಿ ಲಾಭ

ನವದೆಹಲಿ: ವಾಣಿಜ್ಯ ವಾಹನಗಳ ತಯಾರಿಕಾ ಕಂಪನಿ ಅಶೋಕ್‌ ಲೇಲ್ಯಾಂಡ್‌ ಪ್ರಸಕ್ತ ಆರ್ಥಿಕ ವರ್ಷದ ಜೂನ್‌ ತ್ರೈಮಾಸಿಕದಲ್ಲಿ ₹657 ಕೋಟಿ ನಿವ್ವಳ ಲಾಭ ಗಳಿಸಿದೆ.

ಕಳೆದ ಆರ್ಥಿಕ ವರ್ಷದ ಇದೇ ಅವಧಿಯಲ್ಲಿ ಕಂಪನಿಯು ₹550 ಕೋಟಿ ಲಾಭ ಗಳಿಸಿತ್ತು. ಇದಕ್ಕೆ ಹೋಲಿಸಿದರೆ ಲಾಭದಲ್ಲಿ ಶೇ 19ರಷ್ಟು ಹೆಚ್ಚಳವಾಗಿದೆ ಎಂದು ಕಂಪನಿ ಗುರುವಾರ ಷೇರುಪೇಟೆಗೆ ತಿಳಿಸಿದೆ.

ವರಮಾನವು ಕಳೆದ ಜೂನ್ ತ್ರೈಮಾಸಿಕದಲ್ಲಿ ₹10,696 ಕೋಟಿಯಷ್ಟಿತ್ತು. ಈ ಬಾರಿ ₹11,708 ಕೋಟಿಗೆ ಏರಿಕೆ ಆಗಿದೆ. ವೆಚ್ಚವು ₹10,920 ಕೋಟಿಯಾಗಿದೆ. ಜೂನ್ ತ್ರೈಮಾಸಿಕದಲ್ಲಿ ಕಂಪನಿಯ 44,238 ವಾಹನಗಳು ಮಾರಾಟವಾಗಿವೆ. 

ಜೂನ್‌ ತ್ರೈಮಾಸಿಕದಲ್ಲಿ ಕಂಪನಿಯು ವಾಹನಗಳ ಮಾರಾಟದಲ್ಲಿ ಸದೃಢ ಬೆಳವಣಿಗೆ ದಾಖಲಿಸಿದೆ. ಅನುಕೂಲಕರ ಮಾರುಕಟ್ಟೆಯಿಂದ ನಿರೀಕ್ಷೆ ಮೀರಿ ವಾಹನಗಳ ಮಾರಾಟವಾಗಿದೆ ಎಂದು ಕಂಪನಿಯ ಅಧ್ಯಕ್ಷ ಧೀರಜ್ ಹಿಂದುಜಾ ತಿಳಿಸಿದ್ದಾರೆ.