ವಿದೇಶಿ ಬಂಡವಾಳ ಹೂಡಿಕೆ: ₹26,565 ಕೋಟಿ ಒಳಹರಿವು

ನವದೆಹಲಿ: ದೇಶದ ಷೇರುಪೇಟೆಗಳಲ್ಲಿ ಜೂನ್‌ ತಿಂಗಳಿನಲ್ಲಿ ಒಟ್ಟು ₹26,565 ಕೋಟಿ ವಿದೇಶಿ ಬಂಡವಾಳ ಹೂಡಿಕೆಯಾಗಿದೆ.

ಕಳೆದ ಎರಡು ತಿಂಗಳಿನಲ್ಲಿ ವಿದೇಶಿ ಬಂಡವಾಳ ಹೂಡಿಕೆಯು ಕಡಿಮೆಯಾಗಿತ್ತು. ರಾಜಕೀಯ ಸ್ಥಿರತೆ ಹಾಗೂ ಷೇರುಪೇಟೆಗಳಲ್ಲಿ ಸಕಾರಾತ್ಮಕ ವಹಿವಾಟು ನಡೆದಿರುವುದರಿಂದ ಹೂಡಿಕೆ ಪ್ರಮಾಣದಲ್ಲಿ ಏರಿಕೆಯಾಗಿದೆ ಎಂದು ಮಾರುಕಟ್ಟೆ ತಜ್ಞರು ತಿಳಿಸಿದ್ದಾರೆ.

‘ವಿದೇಶಿ ಬಂಡವಾಳ ಹೂಡಿಕೆದಾರರು (ಎಫ್‌ಪಿಐ) ಕೇಂದ್ರದ ಬಜೆಟ್‌ ಹಾಗೂ ಪ್ರಸಕ್ತ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಕಂಪನಿಗಳು ಗಳಿಸುವ ಲಾಭದತ್ತ ದೃಷ್ಟಿ ನೆಟ್ಟಿದ್ದಾರೆ. ಹಾಗಾಗಿ, ಒಳಹರಿವು ಪ್ರಮಾಣದಲ್ಲಿ ಸ್ಥಿರತೆ ಸಾಧ್ಯವಾಗಿದೆ’ ಎಂದು ಹಣಕಾಸು ಸಲಹಾ ಸಂಸ್ಥೆ ವಾಟರ್‌ಫೀಲ್ಡ್‌ ಅಡ್ವೈಸರ್ಸ್‌ನ ನಿರ್ದೇಶಕ ವಿಪುಲ್ ಭೋವರ್ ಹೇಳಿದ್ದಾರೆ.‌

ಲೋಕಸಭಾ ಚುನಾವಣೆ ಫಲಿತಾಂಶದ ಅನಿಶ್ಚಿತತೆಯಿಂದಾಗಿ ವಿದೇಶಿ ಹೂಡಿಕೆದಾರರು ಷೇರುಪೇಟೆಗಳಿಂದ ಏಪ್ರಿಲ್‌ನಲ್ಲಿ ₹8,700 ಕೋಟಿ ಹಾಗೂ ₹25,586 ಕೋಟಿ ಬಂಡವಾಳ ಹಿಂಪಡೆದಿದ್ದರು.