ವೇತನ ಏರಿಕೆಯಲ್ಲಿ ಲಿಂಗ ತಾರತಮ್ಯ: ಎಡಿಪಿ ಅಧ್ಯಯನ ವರದಿ

ನವದೆಹಲಿ: ಕೋವಿಡ್‌–19 ಸಾಂಕ್ರಾಮಿಕದ ಸಂದರ್ಭದಲ್ಲಿ ಪುರುಷ ಹಾಗೂ ಮಹಿಳಾ ಉದ್ಯೋಗಿಗಳ ನಡುವಿನ ವೇತನ ತಾರತಮ್ಯವು ಹೆಚ್ಚಳ ಆಗಿದೆ ಎಂದು ಎಡಿಪಿ ಅಧ್ಯಯನ ವರದಿ ಹೇಳಿದೆ. ವೇತನ ಹೆಚ್ಚಳ ಹಾಗೂ ಬೋನಸ್ ನೀಡುವ ವಿಚಾರದಲ್ಲಿ ಮಹಿಳೆಯರನ್ನು ಉಪೇಕ್ಷಿಸಲಾಗಿದೆ ಎಂದು ಅದು ಹೇಳಿದೆ.

ಹೆಚ್ಚಿನ ಜವಾಬ್ದಾರಿಗಳನ್ನು ಹೊತ್ತುಕೊಂಡ ಶೇಕಡ 65ರಷ್ಟು ಮಹಿಳೆಯರಿಗೆ ಮಾತ್ರ ವೇತನ ಹೆಚ್ಚಳದ ಖುಷಿ ಸಿಕ್ಕಿದೆ ಎಂದು ಎಡಿಪಿ ವರದಿಯು ಹೇಳಿದೆ. ಆದರೆ, ಪುರುಷರ ಪೈಕಿ ಶೇಕಡ 70ರಷ್ಟು ಜನರಿಗೆ ವೇತನ ಏರಿಕೆ ದೊರೆತಿದೆ. ಈ ವರದಿ ಸಿದ್ಧಪಡಿಸುವುದಕ್ಕಾಗಿ ಎಡಿಪಿ ಸಂಶೋಧನಾ ಸಂಸ್ಥೆಯು 17 ದೇಶಗಳಲ್ಲಿನ ಒಟ್ಟು 32,471 ಉದ್ಯೋಗಿಗಳನ್ನು ಸಂಪರ್ಕಿಸಿದೆ.