ಚಿನ್ನದ 10ಗ್ರಾಂಗೆ ₹ 460 ಏರಿಕೆ

ನವದೆಹಲಿ: ಚಿನಿವಾರ ಪೇಟೆಯಲ್ಲಿ ಸೋಮವಾರ ಚಿನ್ನದ ಬೆಲೆ 10ಗ್ರಾಂಗೆ ₹460ರಂತೆ ಏರಿಕೆಯಾಗಿ ₹ 38,860ಕ್ಕೆ ತಲುಪಿತು.

ರೂಪಾಯಿ ಮೌಲ್ಯ ಇಳಿಕೆ ಮತ್ತು ಕಚ್ಚಾ ತೈಲ ದರದಲ್ಲಿ ಏರಿಕೆ ಆಗುತ್ತಿರುವುದರಿಂದ ಸುರಕ್ಷಿತ ಹೂಡಿಕೆಯ ಸ್ವರ್ಗವಾಗಿರುವ ಚಿನ್ನ ಖರೀದಿಗೆ ಹೂಡಿಕೆದಾರರು ಮುಗಿಬಿದ್ದರು. ಇದರಿಂದಾಗಿ ಚಿನ್ನದ ಬೆಲೆಯಲ್ಲಿ ಏರಿಕೆಯಾಗಿದೆ ಎಂದು ಎಚ್‌ಡಿಎಫ್‌ಸಿ ಸೆಕ್ಯುರಿಟೀಸ್‌ ತಿಳಿಸಿದೆ.

ಶನಿವಾರ 10 ಗ್ರಾಂ ಚಿನ್ನದ ಬೆಲೆ ₹ 38,400 ಇತ್ತು.ಬೆಳ್ಳಿ ಬೆಲೆ ಕೆ.ಜಿಗೆ ₹ 1,096ರಂತೆ ಏರಿಕೆಯಾಗಿ ₹ 47,957ಕ್ಕೆ ತಲುಪಿದೆ. ಶನಿವಾರದ ಬೆಲೆ ಕೆ.ಜಿಗೆ ₹ 46,861 ಇತ್ತು.

ನ್ಯೂಯಾರ್ಕ್‌ ಮಾರುಕಟ್ಟೆಯಲ್ಲಿ ಒಂದು ಔನ್ಸ್‌ಗೆ 1,504 ಡಾಲರ್‌ಗಳಂತೆ ಹಾಗೂ ಬೆಳ್ಳಿ ಒಂದು ಔನ್ಸ್‌ಗೆ 17.87 ಡಾಲರ್‌ಗಳಂತೆ ಮಾರಾಟವಾಯಿತು.ಮಧ್ಯಪ್ರಾಚ್ಯದಲ್ಲಿ ಉಂಟಾಗಿರುವ ರಾಜಕೀಯ ಬಿಕ್ಕಟ್ಟಿನಿಂದಾಗಿ ಚಿನ್ನದ ಮೇಲಿನ ಹೂಡಿಕೆ ಹೆಚ್ಚಾಗುವಂತೆ ಮಾಡಿದೆ. ಇದರಿಂದಾಗಿ ಬೆಲೆಯಲ್ಲಿ ಏರಿಕೆಯಾಗುತ್ತಿದೆ.