ಸುಂಕ ಮುಕ್ತ ಉದ್ದು ಆಮದಿಗೆ ಗಡುವು ವಿಸ್ತರಣೆ

ನವದೆಹಲಿ: ಸುಂಕ ಮುಕ್ತ (ಸುಂಕ ರಹಿತ) ಉದ್ದು ಆಮದು ಮಾಡಿಕೊಳ್ಳಲು ಇರುವ ಗಡುವನ್ನು 2026ರ ಮಾರ್ಚ್‌ 31ರವರೆಗೆ ಕೇಂದ್ರ ಸರ್ಕಾರ ವಿಸ್ತರಿಸಿದೆ.

ಈ ಮೊದಲಿದ್ದ ಆದೇಶ ಇದೇ ಮಾರ್ಚ್‌ಗೆ ಅಂತ್ಯವಾಗುತ್ತಿತ್ತು. ಇದೀಗ ಸರ್ಕಾರ ಗಡುವನ್ನು ಮತ್ತೆ ವಿಸ್ತರಿಸಿದೆ. ದೇಶೀಯ ಮಾರುಕಟ್ಟೆಯಲ್ಲಿ ಸರಕುಗಳ ಬೆಲೆಯಲ್ಲಿ ಸ್ಥಿರತೆ ತರಲು ಇದು ನೆರವಾಗಲಿದೆ ಎಂದು ವಿದೇಶಿ ವ್ಯಾಪಾರ ಮಹಾನಿರ್ದೇಶನಾಲಯ (ಡಿಜಿಎಫ್‌ಟಿ) ತಿಳಿಸಿದೆ.

ಪ್ರಸಕ್ತ ಆರ್ಥಿಕ ವರ್ಷದ ಏಪ್ರಿಲ್‌ನಿಂದ ನವೆಂಬರ್‌ವರೆಗೂ ₹5,242 ಕೋಟಿ ಮೌಲ್ಯದ ಉದ್ದು ಆಮದಾಗಿದೆ. ಈ ಪೈಕಿ ಮ್ಯಾನ್ಮಾರ್‌ನಿಂದಲೇ ₹4,788 ಕೋಟಿ ಮೌಲ್ಯದಷ್ಟು ಆಮದಾಗಿದೆ. 

2023–24ರ ಆರ್ಥಿಕ ವರ್ಷದಲ್ಲಿ ₹5,783 ಕೋಟಿ ಮೌಲ್ಯದಷ್ಟು (ಮ್ಯಾನ್ಮಾರ್‌ನಿಂದ ₹5,636 ಕೋಟಿ) ಆಮದಾಗಿತ್ತು. ಮ್ಯಾನ್ಮಾರ್‌ನಿಂದ ಭಾರತಕ್ಕೆ ಹೆಚ್ಚಿನ ಪ್ರಮಾಣದ ಉದ್ದು ಆಮದಾಗುತ್ತದೆ. ಜೊತೆಗೆ ಸಿಂಗಪುರ, ಥಾಯ್ಲೆಂಡ್‌ ಮತ್ತು ಬ್ರೆಜಿಲ್‌ನಿಂದಲೂ ಉದ್ದು ಆಮದಾಗುತ್ತದೆ ಎಂದು ತಿಳಿಸಿದೆ.

ಭಾರತದಲ್ಲಿ ಮಧ್ಯಪ್ರದೇಶ, ಆಂಧ್ರಪ್ರದೇಶ, ಉತ್ತರಪ‍್ರದೇಶ, ರಾಜಸ್ಥಾನ, ತಮಿಳುನಾಡು ಮತ್ತು ಮಹಾರಾಷ್ಟ್ರದಲ್ಲಿ ಪ್ರಮುಖವಾಗಿ ಉದ್ದು ಬೆಳೆಯಲಾಗುತ್ತದೆ.