ಕೈಗಾರಿಕಾ ಉತ್ಪಾದನೆ ಕುಂಠಿತ: ಎನ್‌ಎಸ್‌ಒ

ನವದೆಹಲಿ: ದೇಶದ ಕೈಗಾರಿಕಾ ಉತ್ಪಾದನಾ ಬೆಳವಣಿಗೆಯು ಜೂನ್‌ನಲ್ಲಿ 10 ತಿಂಗಳ ಕನಿಷ್ಠ ಮಟ್ಟಕ್ಕೆ ದಾಖಲಾಗಿದೆ ಎಂದು ರಾಷ್ಟ್ರೀಯ ಸಾಂಖ್ಯಿಕ ಕಚೇರಿ (ಎನ್‌ಎಸ್‌ಒ) ಸೋಮವಾರ ತಿಳಿಸಿದೆ.

ಕಳೆದ ವರ್ಷದ ಜೂನ್‌ ತಿಂಗಳಿನಲ್ಲಿ ಕೈಗಾರಿಕಾ ಉತ್ಪಾದನೆಯು ಶೇ 4.9ರಷ್ಟಿತ್ತು. ಅದು ಈ ಬಾರಿ ಶೇ 1.5ಕ್ಕೆ ಇಳಿಕೆಯಾಗಿದೆ. 

ಮುಂಗಾರು ಮಳೆಯು ವಾಡಿಕೆಗಿಂತ ಮೊದಲೇ ಆರಂಭವಾಗಿ ಗಣಿಗಾರಿಕೆ ಮತ್ತು ವಿದ್ಯುತ್ ಉತ್ಪಾದನೆಯ ಮೇಲೆ ಪರಿಣಾಮ ಬೀರಿದ್ದರಿಂದ ವಲಯದ ಬೆಳವಣಿಗೆ ಇಳಿಕೆ ಕಂಡಿದೆ ಎಂದು ತಿಳಿಸಿದೆ.

ತಯಾರಿಕಾ ವಲಯದ ಉತ್ಪಾದನೆಯು ಶೇ 3.9ಕ್ಕೆ ಏರಿಕೆಯಾಗಿದೆ. ಕಳೆದ ಜೂನ್‌ನಲ್ಲಿ ಶೇ 3.5ರಷ್ಟಿತ್ತು. ಗಣಿಗಾರಿಕೆ ಉತ್ಪಾದನೆಯು ಶೇ 10.3ರಷ್ಟಿತ್ತು. ಅದು ಈ ಬಾರಿ ಶೇ 8.7ಕ್ಕೆ ಇಳಿದಿದೆ. ವಿದ್ಯುತ್‌ ಉತ್ಪಾದನೆ ಶೇ 8.6ರಿಂದ ಶೇ 2.6ಕ್ಕೆ ಇಳಿದಿದೆ.

ಕಳೆದ ಆರ್ಥಿಕ ವರ್ಷದ ಜೂನ್‌ ತ್ರೈಮಾಸಿಕದಲ್ಲಿ ಕೈಗಾರಿಕಾ ಉತ್ಪಾದನೆ ಶೇ 5.4ರಷ್ಟು ಬೆಳವಣಿಗೆ ಆಗಿತ್ತು. ಈ ಬಾರಿ ಶೇ 2ಕ್ಕೆ ಇಳಿದಿದೆ. ಇದು 11 ತ್ರೈಮಾಸಿಕದ ಕನಿಷ್ಠ ಮಟ್ಟವಾಗಿದೆ. ಮೂಲಸೌಕರ್ಯ/ನಿರ್ಮಾಣ ಚಟುವಟಿಕೆ ಶೇ 8.2ರಿಂದ ಶೇ 7.2ಕ್ಕೆ ಇಳಿದಿದೆ ಎಂದು ತಿಳಿಸಿದೆ.

ಕೈಗಾರಿಕಾ ಉತ್ಪಾದನಾ ಸೂಚ್ಯಂಕ (ಐಐಪಿ) ಆಧಾರದ ಮೇಲೆ ಈ ಪ್ರಗತಿಯನ್ನು ಲೆಕ್ಕ ಹಾಕಲಾಗುತ್ತದೆ.

‘ಜೂನ್‌ ತಿಂಗಳ ಮಧ್ಯದಲ್ಲಿ ಹೆಚ್ಚಿನ ಮಳೆ ಸುರಿಯಿತು. ಇದು ಗಣಿಗಾರಿಕೆ ಮತ್ತು ವಿದ್ಯುತ್ ಉತ್ಪಾದನೆಯ ಮೇಲೆ ಪರಿಣಾಮ ಬೀರಿತು’ ಎಂದು ಐಸಿಆರ್‌ಎನ ಮುಖ್ಯ ಅರ್ಥಶಾಸ್ತ್ರಜ್ಞೆ ಅದಿತಿ ನಾಯರ್ ಹೇಳಿದ್ದಾರೆ.