ಬಡ್ಡಿದರ ಇಳಿಸಿದ ಎಲ್‌ಐಸಿ ಹೌಸಿಂಗ್‌, ಕೆನರಾ, ಇಂಡಿಯನ್ ಬ್ಯಾಂಕ್‌

ನವದೆಹಲಿ: ಎಲ್‌ಐಸಿ ಹೌಸಿಂಗ್‌ ಫೈನಾನ್ಸ್‌ ಕಂಪನಿ, ಇಂಡಿಯನ್‌ ಬ್ಯಾಂಕ್‌ ಮತ್ತು ಕೆನರಾ ಬ್ಯಾಂಕ್‌, ರೆಪೊ ಆಧರಿತ ಬಡ್ಡಿದರವನ್ನು ಕಡಿತಗೊಳಿಸಿವೆ. 

ಭಾರತೀಯ ರಿಸರ್ವ್‌ ಬ್ಯಾಂಕ್‌ ರೆಪೊ ದರ ಕಡಿತಗೊಳಿಸಿರುವ ಬೆನ್ನಲ್ಲೇ ಈ ಕ್ರಮ ಕೈಗೊಂಡಿವೆ. 

ಎಲ್‌ಐಸಿ ಹೌಸಿಂಗ್‌ ಫೈನಾನ್ಸ್‌ ಕಂಪನಿಯು ಗೃಹ ಸಾಲದ ಮೇಲಿನ ಬಡ್ಡಿದರವನ್ನು ಶೇ 0.25ರಷ್ಟು ಕಡಿತಗೊಳಿಸಿದೆ. ಈ ಬಡ್ಡಿದರ ಕಡಿತದ ಪ್ರಯೋಜನವು ಹಾಲಿ ಸಾಲಗಾರರು ಮತ್ತು ಹೊಸದಾಗಿ ಸಾಲ ‍ಪಡೆಯುವವರಿಗೂ ಅನ್ವಯಿಸಲಿದೆ. ಗೃಹ ಸಾಲದ ಮೇಲಿನ ಬಡ್ಡಿದರವು ಶೇ 8ರಿಂದ ಶುರುವಾಗಲಿದೆ. ಪರಿಷ್ಕೃತ ಆದೇಶವು ಏಪ್ರಿಲ್‌ 28ರಿಂದ ಜಾರಿಗೆ ಬರಲಿದೆ ಎಂದು ಕಂಪನಿಯು ತಿಳಿಸಿದೆ.

ಇಂಡಿಯನ್‌ ಬ್ಯಾಂಕ್‌: ಸರ್ಕಾರಿ ಸ್ವಾಮ್ಯದ ಇಂಡಿಯನ್‌ ಬ್ಯಾಂಕ್‌ ಗೃಹ ಮತ್ತು ವಾಹನ ಸಾಲದ ಮೇಲಿನ ಬಡ್ಡಿದರವನ್ನು ಕಡಿತ ಮಾಡಿದೆ. ಗೃಹ ಸಾಲದ ವಾರ್ಷಿಕ ಬಡ್ಡಿದರ ಶೇ 8.15 ಇತ್ತು. ಇದನ್ನು ಶೇ 7.90ಕ್ಕೆ ಪರಿಷ್ಕರಿಸಿದೆ. ವಾಹನ ಸಾಲವು ಶೇ 8.50ರಿಂದ ಶೇ 8.25ಕ್ಕೆ ಇಳಿದಿದೆ. ಸಂಸ್ಕರಣಾ ಶುಲ್ಕದಲ್ಲಿ ಬ್ಯಾಂಕ್‌ ರಿಯಾಯಿತಿ ನೀಡಿದೆ. ಅಲ್ಲದೆ, ದಸ್ತಾವೇಜಿನ ಶುಲ್ಕವನ್ನೂ ಶೂನ್ಯಕ್ಕೆ ಇಳಿಸಿದೆ. 

ಕೆನರಾ ಬ್ಯಾಂಕ್‌: ಕೆನರಾ ಬ್ಯಾಂಕ್‌ ಗೃಹ ಸಾಲ ಶೇ 7.90 ಮತ್ತು ವಾಹನ ಸಾಲ ಶೇ 8.20ರಿಂದ ಆರಂಭವಾಗಲಿದೆ. ದರ ಪರಿಷ್ಕರಣೆಯು ಏಪ್ರಿಲ್‌ 12ರಿಂದಲೇ ಜಾರಿಗೆ ಬಂದಿದೆ ಎಂದು ಬ್ಯಾಂಕ್‌ ತಿಳಿಸಿದೆ.

Cut-off box - null