ತೈಲ ಬೆಲೆ ತಗ್ಗಿಸಲು ಕೇಂದ್ರ, ರಾಜ್ಯಗಳ ಯತ್ನ ಬೇಕು: ಶಕ್ತಿಕಾಂತ ದಾಸ್

ಮುಂಬೈ: ಪೆಟ್ರೋಲ್ ಮತ್ತು ಡೀಸೆಲ್‌ ಮೇಲಿನ ತೆರಿಗೆಯನ್ನು ತಗ್ಗಿಸಲು ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ಸಮನ್ವಯದಿಂದ ಪ್ರಯತ್ನ ನಡೆಸಬೇಕು ಎಂದು ಭಾರತೀಯ ರಿಸರ್ವ್‌ ಬ್ಯಾಂಕ್‌ (ಆರ್‌ಬಿಐ) ಗವರ್ನರ್ ಶಕ್ತಿಕಾಂತ ದಾಸ್ ಗುರುವಾರ ಹೇಳಿದ್ದಾರೆ.

ಬಾಂಬೆ ಚೇಂಬರ್‌ ಆಫ್‌ ಕಾಮರ್ಸ್‌ ಆಯೋಜಿಸಿದ್ದ ಸಭೆಯಲ್ಲಿ ಮಾತನಾಡಿದ ಅವರು, ‘ಕೋವಿಡ್–19 ಸೃಷ್ಟಿಸಿದ ಒತ್ತಡದಿಂದ ದೇಶದ ಜನರನ್ನು ಹೊರತರಲು ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ಹೆಚ್ಚಿನ ವೆಚ್ಚ ಮಾಡಬೇಕಾದ ಅನಿವಾರ್ಯ ಇದೆ’ ಎಂಬ ಮಾತನ್ನೂ ಹೇಳಿದರು.

‘ಆದಾಯದ ಅಗತ್ಯ ಹಾಗೂ ಸರ್ಕಾರಗಳ ಅನಿವಾರ್ಯತೆಗಳು ಪೂರ್ತಿಯಾಗಿ ಅರ್ಥವಾಗುತ್ತವೆ. ಆದರೆ, ಪೆಟ್ರೋಲ್‌ ಮತ್ತು ಡೀಸೆಲ್‌ ಬೆಲೆಯು ತಯಾರಿಕಾ ವೆಚ್ಚದ ಮೇಲೆ, ಉತ್ಪಾದನಾ ವೆಚ್ಚದ ಮೇಲೆ ಪರಿಣಾಮ ಬೀರುತ್ತದೆ’ ಎಂದು ಅವರು ಹೇಳಿದರು.