ಕಚ್ಚಾ ತೈಲದ ಕೊರತೆ: ಅಂತರರಾಷ್ಟ್ರೀಯ ಇಂಧನ ಸಂಸ್ಥೆ

ಪ್ಯಾರಿಸ್: ಕಚ್ಚಾ ತೈಲ ಉತ್ಪಾದನೆಯನ್ನು ತಗ್ಗಿಸಲು ಸೌದಿ ಅರೇಬಿಯಾ ಮತ್ತು ರಷ್ಯಾ ತೀರ್ಮಾನಿಸಿರುವ ಪರಿಣಾಮವಾಗಿ ಜಾಗತಿಕ ಮಾರುಕಟ್ಟೆಯಲ್ಲಿ ವರ್ಷಾಂತ್ಯದ ಹೊತ್ತಿಗೆ ಕಚ್ಚಾ ತೈಲದ ಕೊರತೆ ಎದುರಾಗಲಿದೆ ಎಂದು ಅಂತರರಾಷ್ಟ್ರೀಯ ಇಂಧನ ಸಂಸ್ಥೆ (ಐಇಎ) ಹೇಳಿದೆ.

ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆಯನ್ನು ಹೆಚ್ಚಿಸುವ ಉದ್ದೇಶದಿಂದ ಉತ್ಪಾದನೆಯನ್ನು ಈ ವರ್ಷದ ಕೊನೆಯವರೆಗೆ ಕಡಿಮೆ ಮಾಡುವುದಾಗಿ ರಷ್ಯಾ ಮತ್ತು ಸೌದಿ ಅರೇಬಿಯಾ ಹೇಳಿವೆ. ‘ಸೆಪ್ಟೆಂಬರ್‌ನಿಂದ ಪೂರೈಕೆ ಕೊರತೆ ಆಗಲಿದೆ’ ಎಂದು ಐಇಎ ಹೇಳಿದೆ.

‘ತೈಲ ಸಂಗ್ರಹವು ಕಡಿಮೆ ಮಟ್ಟಕ್ಕೆ ಬರಲಿದೆ. ಇದರಿಂದಾಗಿ ಮಾರುಕಟ್ಟೆಯಲ್ಲಿ ಅಸ್ಥಿರತೆ ನಿರ್ಮಾಣವಾಗುವ ಅಪಾಯ ಹೆಚ್ಚಲಿದೆ. ಆರ್ಥಿಕ ಪರಿಸ್ಥಿತಿ ದುರ್ಬಲವಾಗಿರುವ ಹೊತ್ತಿನಲ್ಲಿ ಈ ಅಸ್ಥಿರತೆಯು ಉತ್ಪಾದಕರಿಗೂ, ಖರೀದಿದಾರರಿಗೂ ಒಳಿತು ಮಾಡದು’ ಎಂದು ಸಂಸ್ಥೆ ಹೇಳಿದೆ.