ಶೇ 4ರಷ್ಟು ತಗ್ಗಿದ ಎಸ್‌ಐಪಿ ಮೊತ್ತ
ನವದೆಹಲಿ: 2020–21ನೆಯ ಆರ್ಥಿಕ ವರ್ಷದಲ್ಲಿ ಮ್ಯೂಚುವಲ್‌ ಫಂಡ್‌ ಕಂಪನಿಗಳು ವ್ಯವಸ್ಥಿತ ಹೂಡಿಕೆ ಯೋಜನೆಗಳ (ಎಸ್‌ಐಪಿ) ಮೂಲಕ ಸಂಗ್ರಹಿಸಿದ ಹಣದ ಪ್ರಮಾಣದಲ್ಲಿ ಶೇಕಡ 4ರಷ್ಟು ಇಳಿಕೆ ಆಗಿದೆ.
2019–20ನೆಯ ಆರ್ಥಿಕ ವರ್ಷದಲ್ಲಿ ಒಟ್ಟು ₹ 1 ಲಕ್ಷ ಕೋಟಿಯನ್ನು ಎಸ್‌ಐಪಿ ಮೂಲಕ ಸಂಗ್ರಹಿಸಲಾಗಿತ್ತು ಎಂದು ಭಾರತದ ಮ್ಯೂಚುವಲ್‌ ಫಂಡ್‌ ಕಂಪನಿಗಳ ಒಕ್ಕೂಟ (ಎಎಂಎಫ್‌ಐ) ಹೇಳಿದೆ.
ಸಣ್ಣ ಹೂಡಿಕೆದಾರರು ಮ್ಯೂಚುವಲ್‌ ಫಂಡ್‌ಗಳಲ್ಲಿ ಹೂಡಿಕೆ ಮಾಡಲು ಹೆಚ್ಚಾಗಿ ಎಸ್‌ಐಪಿ ಮಾರ್ಗವನ್ನು ಆಯ್ಕೆ ಮಾಡಿಕೊಳ್ಳುತ್ತಾರೆ. ‘ಮುಂದಿನ ದಿನಗಳಲ್ಲಿ ಕೋವಿಡ್–19 ಲಸಿಕೆ ಅಭಿಯಾನ, ಆರ್ಥಿಕ ಬೆಳವಣಿಗೆ, ಆದಾಯ ಹೆಚ್ಚಳ... ಇವೆಲ್ಲ ಎಸ್‌ಐಪಿ ಹರಿವಿನ ಮೇಲೆ ಪ್ರಭಾವ ಬೀರಲಿವೆ’ ಎಂದು ಮಾರುಕಟ್ಟೆ ತಜ್ಞರು ಹೇಳಿದ್ದಾರೆ.
‘ಹಿಂದಿನ ವರ್ಷದ ಮಾರ್ಚ್‌ನಲ್ಲಿ ಲಾಕ್‌ಡೌನ್‌ ಜಾರಿಗೆ ಬಂತು. ಆದಾಯ ಅನಿಶ್ಚಿತವಾಯಿತು. ಆಗ ಬಹಳಷ್ಟು ಜನ ಸಣ್ಣ ಹೂಡಿಕೆದಾರರು ಎಸ್‌ಐಪಿ ಮೊತ್ತ ತಡೆಹಿಡಿಯುವ ತೀರ್ಮಾನಕ್ಕೆ ಬಂದರು’ ಎಂದು ಫೈಯರ್ಸ್‌ ಸಂಸ್ಥೆಯ ಸಂಶೋಧನಾ ವಿಭಾಗದ ಮುಖ್ಯಸ್ಥ ಗೋಪಾಲ್ ಕವಲಿರೆಡ್ಡಿ ತಿಳಿಸಿದರು.
ಪ್ರಸ್ತುತ ಒಟ್ಟು 3.73 ಕೋಟಿ ಎಸ್‌ಐಪಿ ಖಾತೆಗಳು ಇದ್ದು, ಸಣ್ಣ ಹೂಡಿಕೆದಾರರು ಇವುಗಳ ಮೂಲಕ ಮ್ಯೂಚುವಲ್‌ ಫಂಡ್‌ಗಳಲ್ಲಿ ಹೂಡಿಕೆ ಮಾಡುತ್ತಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.