ಸರ್ಕಾರಕ್ಕೆ ₹1,144 ಕೋಟಿ ಪಾವತಿಸಲಿರುವ ವೊಡಾಫೋನ್‌ ಐಡಿಯಾ ಕಂಪನಿ

ನವದೆಹಲಿ: ಮುಂದಿನ 10 ವರ್ಷದಲ್ಲಿ ಕೇಂದ್ರ ಸರ್ಕಾರಕ್ಕೆ, ₹1,144 ಕೋಟಿ ಪಾವತಿಸಲಾಗುವುದು. ‌ಉಳಿದ ಬಾಕಿಯನ್ನು 2036ರ ಮಾರ್ಚ್‌ನಿಂದ ಪಾವತಿಸಲಾಗುವುದು ಎಂದು ವೊಡಾಫೋನ್‌ ಐಡಿಯಾ ಕಂಪನಿಯು (ವಿಐಎಲ್‌) ಶುಕ್ರವಾರ ಹೇಳಿದೆ.

2026ರ ಮಾರ್ಚ್‌ನಿಂದ 2031ರ ಮಾರ್ಚ್‌ವರೆಗೆ ಸರ್ಕಾರಕ್ಕೆ, ಪ್ರತಿ ವರ್ಷ ₹124 ಕೋಟಿ ಪಾವತಿ ಮಾಡಲಾಗುವುದು. 2032ರ ಮಾರ್ಚ್‌ನಿಂದ 2035ರ ಮಾರ್ಚ್‌ವರೆಗೆ ವಾರ್ಷಿಕ ₹100 ಕೋಟಿ ಪಾವತಿಸಲಾಗುವುದು. ಉಳಿದ ಹೊಂದಾಣಿಕೆ ಮಾಡಿದ ಒಟ್ಟು ವರಮಾನಕ್ಕೆ (ಎಜಿಆರ್‌) ಸಂಬಂಧಿಸಿದ ಬಾಕಿಯನ್ನು ಸಮಾನ ಕಂತುಗಳಲ್ಲಿ 2036ರ ಮಾರ್ಚ್‌ನಿಂದ 2041ರ ಮಾರ್ಚ್‌ವರೆಗೆ ಪಾವತಿಸಲಾಗುತ್ತದೆ ಎಂದು ಕಂಪನಿ ಷೇರುಪೇಟೆಗೆ ತಿಳಿಸಿದೆ.

ವಿಐಎಲ್‌ ಬಾಕಿ ಇರಿಸಿಕೊಂಡಿರುವ ಎಜಿಆರ್‌ ಮೊತ್ತ ₹87,695 ಕೋಟಿ. ಇದನ್ನು ಈ ಮಟ್ಟದಲ್ಲೇ ಉಳಿಸಲು ಕೇಂದ್ರ ಸಂಪುಟವು ಇತ್ತೀಚೆಗೆ ನಿರ್ಧರಿಸಿತ್ತು. ಈ ಮೊತ್ತದ ಪಾವತಿಯನ್ನು ಕಂಪನಿಯು 2031–32ರಿಂದ ಆರಂಭಿಸಿ, 2040–41ರೊಳಗೆ ಪೂರ್ಣಗೊಳಿಸಬೇಕಿದೆ ಎಂದು ಹೇಳಿತ್ತು.

ಈ ಬಾಕಿ ಜೊತೆಗೆ ಕಂಪನಿಯು, 2017–18 ಹಾಗೂ 2018–19ಕ್ಕೆ ಸಂಬಂಧಿಸಿದಂತೆ ಪಾವತಿ ಮಾಡಬೇಕಿರುವ ಎಜಿಆರ್‌ ಬಾಕಿಯನ್ನು ಸುಪ್ರೀಂ ಕೋರ್ಟ್‌ನ 2020ರ ಆದೇಶದ ನಂತರ ಅಂತಿಮಗೊಳಿಸಲಾದ ಮೊತ್ತವನ್ನು 2025–26ರಿಂದ ಆರಂಭಿಸಿ 2030–31ರ ಆರ್ಥಿಕ ವರ್ಷಗಳಲ್ಲಿ ಯಾವುದೇ ಬದಲಾವಣೆಯಿಲ್ಲದೆ ಪಾವತಿಸಬೇಕಿದೆ ಎಂದು ತಿಳಿಸಿದೆ.