ಹಣಕಾಸು ಸಾಕ್ಷರತೆ | ಸುಕನ್ಯಾ ಸಮೃದ್ಧಿ: ಸಪ್ತ ಸಂಗತಿಗಳು

ಹೆಣ್ಣು ಮಕ್ಕಳ ಆರ್ಥಿಕ ಹಿತಕ್ಕಾಗಿ ಕೇಂದ್ರ ಸರ್ಕಾರ ರೂಪಿಸಿರುವ ಸುಕನ್ಯಾ ಸಮೃದ್ಧಿ ಯೋಜನೆಯ ಪ್ರಯೋಜನವನ್ನು ಲಕ್ಷಾಂತರ ಮಂದಿ ಪೋಷಕರು ಪಡೆದುಕೊಂಡಿದ್ದಾರೆ. ಅಂಚೆ ಕಚೇರಿ ಮತ್ತು ಪ್ರಮುಖ ಬ್ಯಾಂಕುಗಳ ಮೂಲಕ ಜಾರಿಗೆ ಬಂದಿರುವ ಈ ಯೋಜನೆ ಜನಪ್ರಿಯವಾಗಿದ್ದರೂ ಕೆಲವು ಪ್ರಮುಖ ಅಂಶಗಳು, ನಿಯಮಗಳು ಹಲವರಿಗೆ ತಿಳಿದಿಲ್ಲ. ಅಂತಹ ಕೆಲವು ವೈಶಿಷ್ಟ್ಯಗಳ ಬಗ್ಗೆ ಗಮನ ಹರಿಸೋಣ.

1) ಹೆಚ್ಚು ಲಾಭ ಸಿಗಬೇಕಾದರೆ...: ಸುಕನ್ಯಾ ಸಮೃದ್ಧಿ ಯೋಜನೆಯಲ್ಲಿ ಪ್ರತಿ ತಿಂಗಳ 5ನೇ ತಾರೀಕಿಗಿಂತ ಮೊದಲು ಹೂಡಿಕೆ ಮಾಡಿದರೆ ಹೆಚ್ಚು ಲಾಭ ಸಿಗುತ್ತದೆ. ಪ್ರತಿ ತಿಂಗಳ ಒಂದನೇ ತಾರೀಕಿನ ನಂತರ ಹಾಗೂ 5ನೇ ತಾರೀಕಿನ ಒಳಗೆ ಹಣ ಹೂಡಿಕೆ ಮಾಡಿದರೆ ಆ ತಿಂಗಳಿನ ಬಡ್ಡಿ ಲೆಕ್ಕಹಾಕುವಾಗ ಈ ಮೊತ್ತವನ್ನು ಪರಿಗಣಿಸಲಾಗುತ್ತದೆ. ಐದನೇ ತಾರೀಕಿನ ಬಳಿಕ ಹೂಡಿಕೆ ಮಾಡುವ ಮೊತ್ತವನ್ನು ಮುಂದಿನ ತಿಂಗಳಿನಲ್ಲಿ ಬಡ್ಡಿ ಲೆಕ್ಕಾಚಾರ ಮಾಡುವಾಗ ಪರಿಗಣಿಸಲಾಗುತ್ತದೆ. ಹಾಗಾಗಿ ಸುಕನ್ಯಾ ಸಮೃದ್ಧಿ ಖಾತೆಯಲ್ಲಿ ಹೂಡಿಕೆಯನ್ನು ಸಾಧ್ಯವಾದಷ್ಟುಮಟ್ಟಿಗೆ ತಿಂಗಳ 5ನೇ ತಾರೀಕಿನ ಮೊದಲು ಮಾಡಿ.

2. ಎರಡಕ್ಕಿಂತ ಹೆಚ್ಚು ಖಾತೆ ತೆರೆಯಲು ಅವಕಾಶ: ನಿಯಮದ ಪ್ರಕಾರ ಸುಕನ್ಯಾ ಸಮೃದ್ಧಿ ಯೋಜನೆಯ ಅಡಿಯಲ್ಲಿ ಗರಿಷ್ಠ ಎರಡು ಖಾತೆ ಆರಂಭಿಸಬಹುದು. ಆದರೆ ನಿಮಗೆ ಅವಳಿ ಅಥವಾ ತ್ರಿವಳಿ ಮಕ್ಕಳಿದ್ದರೆ ಎರಡಕ್ಕಿಂತ ಹೆಚ್ಚಿನ ಖಾತೆಗಳನ್ನು ತೆರೆಯಲು ಕಾನೂನಿನಲ್ಲಿ ಅವಕಾಶ ಒದಗಿಸಲಾಗಿದೆ.

3. ಹೂಡಿಕೆ ಅವಧಿಗೆ ಮಿತಿ ಇದೆ: ಸುಕನ್ಯಾ ಸಮೃದ್ಧಿ ಯೋಜನೆ ಅಡಿಯಲ್ಲಿ ಗರಿಷ್ಠ 15 ವರ್ಷಗಳವರೆಗೆ ಮಾತ್ರ ಹೂಡಿಕೆ ಮಾಡಲು ಅವಕಾಶವಿದೆ. ಖಾತೆಯಲ್ಲಿ ಹೂಡಿಕೆ ಆರಂಭಿಸಿ 15 ವರ್ಷ ಪೂರೈಸಿದ ಬಳಿಕ ತಂದೆ-ತಾಯಿ ಅಥವಾ ಪೋಷಕರು ಯಾವುದೇ ಕಾರಣಕ್ಕೂ ಹಣ ತೊಡಗಿಸಲು ಅವಕಾಶ ಸಿಗುವುದಿಲ್ಲ.

4. ಎರಡು ಹಂತಗಳ ಮೆಚ್ಯುರಿಟಿ: ಸುಕನ್ಯಾ ಸಮೃದ್ಧಿ ಖಾತೆಯಲ್ಲಿ ಹೂಡಿಕೆ ಮಾಡಿರುವ ಮೊತ್ತವನ್ನು ಹಿಂಪಡೆಯಬೇಕಾದರೆ ಖಾತೆ ಹೊಂದಿರುವ ಹೆಣ್ಣು ಮಗಳಿಗೆ 21 ವರ್ಷ ತುಂಬಿರಬೇಕು. ಒಂದೊಮ್ಮೆ ಹೆಣ್ಣು ಮಗಳು 18 ತುಂಬಿದ ಕೂಡಲೇ ವಿವಾಹವಾಗುವಂತಹ ಸಂದರ್ಭವಿದ್ದರೆ ಆಗಲೂ ಹಣ ಹಿಂದಕ್ಕೆ ಪಡೆಯಲು ಅವಕಾಶವಿದೆ.

5. ಹಣ ಭಾಗಶಃ ಹಿಂಪಡೆಯಲು ಅವಕಾಶ: ಹೆಣ್ಣು ಮಗುವಿಗೆ 18 ವರ್ಷ ತುಂಬಿದಾಗ ಸುಕನ್ಯಾ ಸಮೃದ್ಧಿ ಖಾತೆಯಲ್ಲಿನ ಹೂಡಿಕೆಯ ಶೇ 50ರಷ್ಟು ಮೊತ್ತ ಹಿಂಪಡೆಯಲು ಅವಕಾಶವಿದೆ. ಹೆಣ್ಣು ಮಗು 10ನೇ ತರಗತಿ ಪಾಸಾದ ಬಳಿಕವೂ ಶೇ 50ರಷ್ಟು ಹಣ ತೆಗೆದುಕೊಳ್ಳುವ ಅನುಕೂಲ ಕಲ್ಪಿಸಲಾಗಿದೆ.

6. ಸುಕನ್ಯಾ ಸಮೃದ್ಧಿ ಖಾತೆ ಸ್ಥಗಿತಗೊಳ್ಳಬಹುದು: ಸುಕನ್ಯಾ ಸಮೃದ್ಧಿ ಖಾತೆ ಹೊಂದಿರುವವರು ಪ್ರತಿ ಹಣಕಾಸು ವರ್ಷದಲ್ಲೂ ಹೂಡಿಕೆ ಮಾಡಬೇಕು. ಹೂಡಿಕೆ ಮಾಡದಿದ್ದರೆ ಅದು ಚಾಲ್ತಿಯಲ್ಲಿ ಇಲ್ಲದ ಖಾತೆಯಾಗಿ ಮಾರ್ಪಾಡಾಗುತ್ತದೆ. 15 ವರ್ಷಗಳ ಒಳಗೆ ಖಾತೆ ಮಧ್ಯಂತರ ಸ್ಥಗಿತಗೊಂಡರೆ ಅದನ್ನು ಸರಿಪಡಿಸಿಕೊಳ್ಳಲು ಸಾಧ್ಯವಿದೆ.

ಒಂದು ವರ್ಷ ನಿಮ್ಮ ಖಾತೆ ಚಾಲ್ತಿಯಲ್ಲಿ ಇರದಿದ್ದರೆ ₹50ರಂತೆ ದಂಡ ಪಾವತಿಸಿ ಖಾತೆ ಚಾಲ್ತಿಗೆ ತಂದುಕೊಳ್ಳಬಹುದು.

7. ಪ್ರತಿ 3 ತಿಂಗಳಿಗೊಮ್ಮೆ ಬಡ್ಡಿ ದರ ಬದಲು: ಸುಕನ್ಯಾ ಸಮೃದ್ಧಿ ಯೋಜನೆಯಲ್ಲಿ ಪ್ರತಿ ಮೂರು ತಿಂಗಳಿಗೊಮ್ಮೆ ಬಡ್ಡಿ ದರ ಬದಲಾಗುತ್ತದೆ. 2015ರಲ್ಲಿ ಸುಕನ್ಯಾ ಸಮೃದ್ಧಿ ಯೋಜನೆಯ ಬಡ್ಡಿ ದರ ಶೇ 9.2ರಷ್ಟಿತ್ತು. ಈಗ ಪ್ರಸ್ತುತ ಬಡ್ಡಿ ದರ ಶೇ 7.6ರಷ್ಟಿದೆ. ಬಡ್ಡಿ ದರ ಎಷ್ಟು ಸಿಗುತ್ತದೆ ಎನ್ನುವುದರ ಆಧಾರದಲ್ಲಿ ನಿಮ್ಮ ಲಾಭಾಂಶದ ಅಂತಿಮ ಮೊತ್ತ ನಿರ್ಧಾರವಾಗುತ್ತದೆ.

(ಲೇಖಕ ಚಾರ್ಟರ್ಡ್ ಅಕೌಂಟೆಂಟ್)