ಬಿಎಚ್‌ಎಂಸಿ ಪದವಿ ಪ್ರದಾನ ಸಮಾರಂಭ| ವೈದ್ಯ ವೃತ್ತಿ ಧರ್ಮ ಕಾರ್ಯ: ಡಾ.ತ್ರಿವೇದಿ

ಬಾಗಲಕೋಟೆ: ವೈದ್ಯಕೀಯ ಕ್ಷೇತ್ರದಲ್ಲಿ ಹೋಮಿಯೋಪಥಿ ಭವಿಷ್ಯದ ವೈದ್ಯ ವಿಜ್ಞಾನವಾಗಲಿದ್ದು, ಜಗತ್ತಿನಲ್ಲಿ ವೈದ್ಯ ವೃತ್ತಿ ಧರ್ಮ ಕಾರ್ಯವಾಗಿದೆ ಎಂದು ಕೇಂದ್ರೀಯ ಹೋಮಿಯೋಪಥಿ ಆಯೋಗದ ನಿಕಟಪೂರ್ವ ಚೇರಮನ್ ಡಾ.ಪಿನಾಕಿನ್ ತ್ರಿವೇದಿ ಹೇಳಿದರು.

ಬಿವಿವಿ ಸಂಘದ ಸಭಾಭವನದಲ್ಲಿ ಗುರುವಾರ ನಡೆದ ಬಿವಿವಿಎಸ್ ಹೋಮಿಯೋಪಥಿ ವೈದ್ಯಕೀಯ ಕಾಲೇಜಿನ ಬಿಎಚ್‌ಎಂಎಸ್‌ ಪ್ರಥಮ ಬ್ಯಾಚಿನ ಪದವಿ ಪ್ರದಾನ ಸಮಾರಂಭದಲ್ಲಿ ಪದವಿ ಪ್ರದಾನ ಮಾಡಿ ಮಾತನಾಡಿದ ಅವರು, ಹೋಮಿಯೋಪಥಿ ಚಿಕಿತ್ಸಾ ವಿಧಾನವು ತನ್ನ ಸ್ವಂತ ಸ್ಥಿರತೆ ಮತ್ತು ಯೋಗ್ಯತೆ ಮೆಲೆ ಬೆಳೆಯುತ್ತಿದೆ ಎಂದರು.

ರೋಗಿಗಳ ಪಾಲಿಗೆ ಸಂಜೀವಿನಿಯಾಗಿದೆ. ಅವಕಾಶವನ್ನು ಸಮರ್ಪಕವಾಗಿ ಬಳಸಿಕೊಂಂಡು ಜನ ಸಮುದಾಯದಲ್ಲಿ ಸಕಾರಾತ್ಮಕ ಬದಲಾವಣೆಯೊಂದಿಗೆ ದೇಶದ ಅಭಿವೃದ್ಧಿಗೆ ಕೊಡುಗೆ ನೀಡಬೇಕು ಎಂದು ಹೇಳಿದರು.

ಅಧ್ಯಕ್ಷತೆ ವಹಿಸಿದ್ದ ಸಂಘದ ಗೌರವ ಕಾರ್ಯದರ್ಶಿ ಮಹೇಶ ಅಥಣಿ ಮಾತನಾಡಿ, ಕೇವಲ ಒಂದು ಸಂಸ್ಕೃತಿ ಪಾಠಶಾಲೆಯಿಂದ ಪ್ರಾರಂಭವಾದ ಸಂಘವು ಇಂದು 180 ಸಂಸ್ಥೆಗಳನ್ನು ಹೊಂದಿದೆ. ಸರಿಯಾಗಿ ಅಧ್ಯಯನ ಮಾಡಿ ಸಂಸ್ಥೆಯ ಕೀರ್ತಿ ಹೆಚ್ಚಿಸಬೇಕು ಎಂದರು.

ಪ್ರಾಚಾರ್ಯ ಡಾ.ಅರುಣ ಹೂಲಿ ಮಾತನಾಡಿ, ಸೌಲಭ್ಯಗಳ ಪ್ರಯೋಜನ ಪಡೆದುಕೊಂಡು ಉತ್ತಮ ವಿದ್ಯಾರ್ಥಿಗಳಾಗಿ ರೋಗಿಗಳ ಸೇವೆಯಲ್ಲಿ ತೊಡಗಿಸಿಕೊಳ್ಳಬೇಕು ಎಂದು ಹೇಳಿದರು.

ಆಡಳಿತ ಮಂಡಳಿ ಕಾರ್ಯಾಧ್ಯಕ್ಷ ಮಲ್ಲಿಕಾರ್ಜುನ ಸಾಸನೂರ ಉಪಸ್ಧಿತರಿದ್ದರು. ಡಾ.ನೀತಾ ಪಾಟೀಲ ಸ್ವಾಗತಿಸಿದರು. ಡಾ.ನುಶ್ರತ ಜಮಾದಾರ ಪರಿಚಯಿಸಿದರು. ಡಾ.ರವಿ.ಕೋಟೆಣ್ಣವರ ವಂದಿಸಿದರು. ಡಾ.ವಿಜಯಲಕ್ಷ್ಮಿ ಪಾಟೀಲ, ಡಾ.ತೃಪ್ತಿ ಶಿಂಧೆ, ಡಾ.ಜಯಲಕ್ಷ್ಮಿ ಪಾಟೀಲ ಮತ್ತು ಡಾ.ಸಮೀನಾ ನಿರೂಪಿಸಿದರು.

ಪ್ರಥಮ ಬ್ಯಾಚಿನ 56 ಪದವೀಧರರಿಗೆ ಪದವಿ ಪ್ರದಾನ ಮಾಡಲಾಯಿತು.