ಮಕ್ಕಳೇ, ತೊಂದರೆ ಎದುರಾದರೆ 1098ಗೆ ಕರೆ ಮಾಡಿ: ಹನಮಂತಗೌಡ ಪಾಟೀಲ

ಬಾಗಲಕೋಟೆ: ಬಾಲ್ಯ ವಿವಾಹ ಸೇರಿದಂತೆ ಯಾವುದೇ ಸಮಸ್ಯೆ ಎದುರಾದರೆ ಮಕ್ಕಳು 1098ಕ್ಕೆ ಕರೆ ಮಾಡಿ ಮಾಹಿತಿ ನೀಡಬೇಕು ಎಂದು ಜಿಲ್ಲಾ ಮಕ್ಕಳ ಕಲ್ಯಾಣ ಸಮಿತಿ ಅಧ್ಯಕ್ಷ ಹನಮಂತಗೌಡ ಪಾಟೀಲ ಹೇಳಿದರು.

ನವನಗರದ ಎಪಿಜೆ ಅಬ್ದುಲ್‌ ಕಲಾಂ ವಸತಿ ಶಾಲೆಯಲ್ಲಿ ಇತ್ತೀಚೆಗೆ ಹಮ್ಮಿಕೊಂಡಿದ್ದ ಬಾಲ್ಯವಿವಾಹ ಮುಕ್ತ ಭಾರತ ಅಭಿಯಾನದ ಪೋಸ್ಟರ್ ಬಿಡುಗಡೆ ಮಾಡಿ ಮಾತನಾಡಿದ ಅವರು, ಮಕ್ಕಳು ಮೊಬೈಲ್‌ನಿಂದ ದೂರವಿರಬೇಕು. ಆಟ, ಪಾಠಗಳಲ್ಲಿ ತೊಡಗಿಸಿಕೊಳ್ಳಬೇಕು ಎಂದು ತಿಳಿಸಿದರು.

ಮುಖ್ಯ ಅತಿಥಿಯಾಗಿದ್ದ ಸಿಡಬ್ಲುಸಿ ಸದಸ್ಯ ಎ.ಬಿ. ಸಿದ್ದನಗೌಡ ಮಾತನಾಡಿ, ಮಕ್ಕಳು ಸುರಕ್ಷ್ಷಿತ ಹಾಗೂ ಉತ್ತಮ ಪ್ರಜೆ ಆಗಲು ಸೂಕ್ತ ವಾತಾವರಣ ನಿರ್ಮಾಣ ಮಾಡುವುದು ಎಲ್ಲರ ಜವಾಬ್ದಾರಿ ಎಂದರು.

ರೀಚ್ ಸಂಸ್ಥೆ ಆಪ್ತ ಸಮಾಲೋಚಕಿ ಶೈಲಜಾ, ಮಕ್ಕಳ ಹಕ್ಕು, ಬಾಲ್ಯವಿವಾಹ ನಿಷೇಧ ಕಾಯ್ದೆ ಕುರಿತು ಉಪನ್ಯಾಸ ನೀಡಿದರು.

ಜಿಲ್ಲಾ ಮಕ್ಕಳ ರಕ್ಷಣಾ ಘಟಕದ ಸಂತೋಷ ಹುರಕಣ್ಣವರ್, ಮಕ್ಕಳಿಗಾಗಿ ಇರುವ ಯೋಜನೆ ಹಾಗೂ ಸೌಲಬ್ಯಗಳ ಬಗ್ಗೆ ಮಾಹಿತಿ ನೀಡಿದರು. ಜಿಲ್ಲೆಯನ್ನು ಬಾಲ್ಯವಿವಾಹ ಮುಕ್ತ ಜಿಲ್ಲೆ ಮಾಡಲು ಸಾರ್ವಜನಿಕರು ಹಾಗು ಸಂಘ ಸಂಸ್ಥೆಗಳು ಸಹಕಾರದಿಂದ ಸಾಧ್ಯ ಎಂದು ತಿಳಿಸಿದರು.

ಸುಧಾ ಚಿಮ್ಮನಕಟ್ಟಿ ಮಾತನಾಡಿ, ‘ನನಗೆ ಐದು ವರ್ಷಗಳಿರುವಾಗ ಬಾಲ್ಯವಿವಾಹ ಆಗಿದೆ. ಈಗಿನಷ್ಟು ಜಾಗೃತಿ ಆಗ ಇದ್ದರೆ ರಕ್ಷಣೆ ಆಗುತ್ತಿದೆ. ನನಗೆ ಎದುರಾದ ಸಮಸ್ಯೆ ಬೇರೆಯವರಿಗೆ ಆಗಬಾರದು ಎಂದು ಮಕ್ಕಳಲ್ಲಿ ಅರಿವು ಮೂಡಿಸುತ್ತಿದ್ದೇನೆ ಎಂದರು.

ರೀಚ್ ಸಂಸ್ಥೆ ಕುಮಾರ ಮಾತನಾಡಿ, ರೀಚ್‌ ಸಂಸ್ಥೆಯೂ ಜಿಲ್ಲೆಯನ್ನು ಬಾಲ್ಯವಿವಾಹ ಮುಕ್ತಗೊಳಿಸಲು ಕೈಜೋಡಿಸಲಿದೆ. ಶಾಲೆ, ಧಾರ್ಮಿಕ ಸ್ಥಳಗಳಲ್ಲಿ ಜಾಗೃತಿ ಮೂಡಿಸುವ ಕೆಲಸ ಆಗುತ್ತಿದೆ. ಬಾಲ್ಯ ವಿವಾಹಕ್ಕೆ ಕಾರಣರಾದವರು ಯಾವ ಶಿಕ್ಷೆಗೆ ಒಳಗಾಗಬೇಕಾಗುತ್ತದೆ ಎಂದು ತಿಳಿಸಿಕೊಡಲಾಗುತ್ತಿದೆ ಎಂದು ಹೇಳಿದರು.

ರೀಚ್ ಸಂಸ್ಥೆ ನಿರ್ದೇಶಕ ಜಿ.ಎನ್.ಸಿಂಹ ಮಾತನಾಡಿ, ಅಭಿಯಾನದಿಂದಾಗಿ ಬಾಲ್ಯ ವಿವಾಹದ ಬಗ್ಗೆ ಜನರಲ್ಲಿ ಜಾಗೃತಿ ಹೆಚ್ಚಾಗಲಿದೆ ಎಂದರು. ವಸತಿ ಶಾಲೆಯ ಕೇಶವ ಅಧ್ಯಕ್ಷತೆ ವಹಿಸಿದ್ದರು.