ಕಮತಗಿ | ನೇಕಾರಿಕೆಯಲ್ಲಿ ಲಕ್ಷ್ಮಣಗೆ ರಾಜ್ಯಮಟ್ಟದ ಪ್ರಶಸ್ತಿ

ಕಮತಗಿ (ಅಮೀನಗಡ): ‘ಕಾಯಕದಲ್ಲಿ ಶ್ರದ್ದೆ ಹಾಗೂ ಪ್ರಯತ್ನವಿದ್ದರೆ ಸಾಧನೆಗೆ ಅಂಗವಿಕಲತೆ ಅಡ್ಡಿಯಾಗದು ಎಂಬುದನ್ನು ತೋರಿಸಿ ನೇಕಾರಿಕೆಯನ್ನು ಇಂದಿಗೂ ಮುಂದುವರಿಸಿಕೊಂಡು, ಅದರಲ್ಲಿ ಬದುಕು ಸಾಗಿಸುತ್ತಿರುವ ಹುನಗುಂದ ತಾಲ್ಲೂಕಿನ ಕಮತಗಿ ಪಟ್ಟಣದ ಕೈಮಗ್ಗ ನೇಕಾರ ಲಕ್ಷ್ಮಣ ಕಕ್ಕಣ್ಣವರ ಅವರಿಗೆ 2025ರ ಕೈಮಗ್ಗ ನೇಕಾರಿಕೆಯಲ್ಲಿ ರಾಜ್ಯಮಟ್ಟದ ಪ್ರಶಸ್ತಿ ದೊರಕಿದೆ.

ಪ್ರತಿ ವರ್ಷ ಕೈಮಗ್ಗ ಮತ್ತು ಜವಳಿ ಇಲಾಖೆ ವತಿಯಿಂದ ನಡೆಯುವ ರಾಷ್ಟ್ರೀಯ ಕೈಮಗ್ಗ ದಿನಾಚರಣೆಯ ಕಾರ್ಯಕ್ರಮದಲ್ಲಿ ಕೈಮಗ್ಗ ನೇಕಾರಿಕೆಯಲ್ಲಿ ವಿನೂತನ ಶೈಲಿಯ ಕೌಶಲದಲ್ಲಿ ತಯಾರಾದ ಕೈಮಗ್ಗ ಸೀರೆಯನ್ನು ಆಯ್ಕೆ ಮಾಡಿ ಸಾಧಕರಿಗೆ ಗೌರವ ಪುರಸ್ಕಾರ ನೀಡಿ ಪ್ರೋತ್ಸಾಹಿಸುತ್ತದೆ.

ಈ ಬಾರಿಯ ಹತ್ತಿ ಉತ್ಪನ್ನದಲ್ಲಿ ಕೈಮಗ್ಗ ನೈಕಾರಿಕೆಯಲ್ಲಿ ರಾಜ್ಯಮಟ್ಟದ ದ್ವಿತೀಯ ಸ್ಥಾನದ ಪ್ರಶಸ್ತಿಯು ಪಟ್ಟಣದ ಲಕ್ಷ್ಮಣ ಕಕ್ಕಣ್ಣವರ ಅವರಿಗೆ ಮೊಮೆಂಟೊ ಸೀರೆ (ಇಳಕಲ್ ಮಾದರಿಯ ಕಾಟನ್ ಸೀರೆ) ಇದರಲ್ಲಿ ಅರಳಿದ ಕೂಡಲಸಂಗಮದ ಐಕ್ಯ ಮಂಟಪ ಶೈಲಿಗೆ ರಾಜ್ಯಮಟ್ಟದ ದ್ವಿತೀಯ ಸ್ಥಾನ ಲಭಿಸಿದೆ.

ಲಕ್ಷ್ಮಣ ದೈಹಿಕವಾಗಿ ಎಡಗಾಲಿನ ನ್ಯೂನ್ಯತೆ ಹೊಂದಿದ್ದರೂ ನೇಕಾರಿಕೆ ವೃತ್ತಿಯನ್ನು ನಂಬಿಕೊಂಡು ಜೀವನ ಸಾಗಿಸುತ್ತಿದ್ದಾರೆ. ಕೈಮಗ್ಗ ನೇಕಾರಿಕೆಯನ್ನೇ ನಂಬಿಕೊಂಡು ಪತ್ನಿಯ ಜೊತೆ ಮೂರು ಜನ ಮಕ್ಕಳೊಂದಿಗೆ ಬಡತನದಲ್ಲಿಯೇ ಜೀವನ ಸಾಗಿಸುತ್ತಿರುವ ಇವರಿಗೆ ಸರ್ಕಾರ ನೆರವಾಗಬೇಕಿದೆ.

ಆಗಸ್ಟ್ 7ರಂದು ಪ್ರಶಸ್ತಿ ಪ್ರದಾನ:

ಬೆಂಗಳೂರಿನ ಕಬ್ಬನ್ ಪಾರ್ಕ್ ಕರ್ನಾಟಕ ರಾಜ್ಯ ಸರ್ಕಾರಿ ನೌಕರರ ಭವನದಲ್ಲಿ ಬೆಳಗ್ಗೆ 11 ಗಂಟೆಗೆ ನಡೆಯುವ ರಾಷ್ಟ್ರೀಯ ಕೈಮಗ್ಗ ದಿನಾಚರಣೆ ಕಾರ್ಯಕ್ರಮದಲ್ಲಿ ಪ್ರಶಸ್ತಿ ಪ್ರದಾನ ನಡೆಯಲಿದೆ.