ಮುಧೋಳ: ಮಳೆಗೆ ಸಂಪೂರ್ಣ ಹಾಳಾದ ಈರುಳ್ಳಿ

ಮುಧೋಳ: ತಾಲ್ಲೂಕಿನಲ್ಲಿ 12 ಸಾವಿರ ಹೆಕ್ಟೇರ್ ಪ್ರದೇಶದಲ್ಲಿ 16 ಸಾವಿರಕ್ಕೂ ಅಧಿಕ ರೈತರು ಈರುಳ್ಳಿ ಬೆಳೆದಿದ್ದಾರೆ. ಪ್ರಾಥಮಿಕ ವರದಿಯಂತೆ 9,727 ಹೆಕ್ಟೇರ್ ಪ್ರದೇಶದಲ್ಲಿ ಮಳೆಯಿಂದ ಬೆಳೆ ಹಾನಿಯಾಗಿದೆ.

ಮಳೆ ಮುಂದುವರೆದರೆ ಶೇ100ರಷ್ಟು ಹಾನಿಯಾಗಲಿದೆ. ಕಟಾವು ಹಂತದಲ್ಲಿ ಮಳೆಯಾಗಿರುವುದರಿಂದ ಈರುಳ್ಳಿ ಕೊಳೆಯುತ್ತಿದೆ. ಕೈಗೆ ಬಂದ ತುತ್ತು ಬಾಯಿಗೆ ಬರದಂತಾಗಿದೆ. ಹೊಲವೆಲ್ಲ ಕೆಸರಾಗಿದೆ. ಹೊಲದಲ್ಲಿ ಕೊಳೆತ ಈರುಳ್ಳಿ ವಾಸನೆ ಬರುತ್ತಿದೆ.

‘ಒಂದು ಎಕರೆ ಪ್ರದೇಶದಲ್ಲಿ 100 ರಿಂದ 150 ಚೀಲ ಈರುಳ್ಳಿ ಬರುತ್ತಿತ್ತು. ಬೀಜ, ರಸಗೊಬ್ಬರ  ಸೇರಿ ಎಕರೆಗೆ ₹35 ರಿಂದ ₹40 ಸಾವಿರ ವೆಚ್ಚವಾಗುತ್ತದೆ. ಹಾಕಿದ ಬೀಜ, ರಸಗೊಬ್ಬರದ ಹಣ ಬರುತ್ತಿಲ್ಲ’ ಎಂದು ರೈತರು ಗೋಳಾಡುತ್ತಿದ್ದಾರೆ.

‘ತಾಲ್ಲೂಕಿನ ರೂಗಿ ಗ್ರಾಮದ ರೈತ ಸದಾಶಿವ ಬಟಕುರ್ಕಿ 15 ಎಕರೆ ಪ್ರದೇಶದಲ್ಲಿ ಈರುಳ್ಳಿ ಬೆಳೆದಿದ್ದಾರೆ. ಬೆಳೆ ಬಂಪರ್ ಬಂದಿತ್ತು. ಈಗ ಮಳೆಗೆ ಕೊಳೆತು ಹೋಗಿದೆ. ₹6 ಲಕ್ಷ ವೆಚ್ಚವಾಗಿದೆ’ ಎಂದರು.

‘10 ಎಕರೆಯಲ್ಲಿ ಈರುಳ್ಳಿ ಬೆಳೆದಿದ್ದೆ. ₹3 ಲಕ್ಷ ವೆಚ್ಚ ಮಾಡಿದ್ದೇನೆ. ಒಂದು ರೂಪಾಯಿ ಕೂಡಾ ಆದಾಯ ಇಲ್ಲದಂತಾಗಿದೆ’ ಎನ್ನುತ್ತಾರೆ ಮುದ್ದಾಪುರ ಗ್ರಾಮದ ಫಕೀರಪ್ಪ ಶಿರಸಂಗಿ.

ಈರುಳ್ಳಿ ಸಂಪೂರ್ಣವಾಗಿ ನಾಶವಾಗಿದೆ. ಸರ್ಕಾರ ಕೂಡಲೇ ಸೂಕ್ತ ಪರಿಹಾರ ನೀಡಬೇಕು. ಇಲ್ಲದಿದ್ದರೆ, ರೈತರ ಸಂಕಷ್ಟ ಹೆಚ್ಚುತ್ತದೆ ಎಂದು ತಾಲ್ಲೂಕಿನ ಬೊಮ್ಮನಬುದ್ನಿ ಗ್ರಾಮದ ಬಸವರಾಜ ಹ್ಯಾವಗಲ್‌ ಅಳಲು ತೋಡಿಕೊಂಡರು.