ದುರಂತದ ಕರಿನೆರಳು: ಅತ್ತಿಬೆಲೆ ಗಡಿಯಲ್ಲಿ ಕುಗ್ಗಿದ ಪಟಾಕಿ ಸದ್ದು

ಆನೇಕಲ್: ದೀಪಾವಳಿಗೂ ಮುನ್ನವೇ ತಾಲ್ಲೂಕಿನ ಗಡಿಭಾಗ ಅತ್ತಿಬೆಲೆ ಸುತ್ತಮುತ್ತ ಪಟಾಕಿ ಮಾರಾಟದ ಅಬ್ಬರ ಪಟಾಕಿ ಸದ್ದಿಗಿಂತ ಜೋರಾಗಿರುತ್ತದೆ.

ತಮಿಳುನಾಡಿನ ಶಿವಕಾಶಿ ಹಾಗೂ ಸುತ್ತಮುತ್ತಲ ಕಾರ್ಖಾನೆಗಳಿಂದ ಬಗೆ, ಬಗೆಯ ಪಟಾಕಿ ನೇರವಾಗಿ ಇಲ್ಲಿಗೆ ಬರುತ್ತವೆ. ದೀಪಾವಳಿಯಲ್ಲಿ ಲಕ್ಷಾಂತರ ರೂಪಾಯಿ ಪಟಾಕಿ ವಹಿವಾಟು ನಡೆಯುತ್ತದೆ. ಆದರೆ, 2023ರ ಪಟಾಕಿ ದುರಂತದ ನಂತರ ಅತ್ತಿಬೆಲೆಯಲ್ಲಿ ಪಟಾಕಿಗಳ ಮಾರಾಟ, ಅಬ್ಬರ ಕಳೆಗುಂದಿದೆ.

ಪಟಾಕಿ ಅಂಗಡಿ ಮತ್ತು ಸಗಟು ವಹಿವಾಟು ಅತ್ತಿಬೆಲೆ ಗಡಿಯಿಂದ ಹೊಸೂರಿನ ಜೂಜುವಾಡಿ, ಸರ್ಜಾಪುರ ಪಕ್ಕದ ಕಗ್ಗನೂರಿಗೆ ಸ್ಥಳಾಂತರವಾಗಿದೆ.

2023ರ  ಅಕ್ಟೋಬರ್‌ 7ರಂದು ನಡೆದ ಪಟಾಕಿ ದುರಂತದಲ್ಲಿ 10ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದರು. ಆ ದುರಂತದ ಕರಿಛಾಯೆ ಅತ್ತಿಬೆಲೆಯಲ್ಲಿ ಪಟಾಕಿ ವಹಿವಾಟು ಮೇಲೆ ಬಿದ್ದಿದೆ. ಪಟಾಕಿ ಮಳಿಗೆ, ಗೋದಾಮು ತೆರೆಯಲು ಹಲವು ಇಲಾಖೆಗಳಿಂದ ಅನುಮತಿ ಪಡೆಯಬೇಕಾಗಿದೆ. 

2024ರಲ್ಲಿಯೂ ಪಟಾಕಿ ಅಂಗಡಿಗಳ ಸಂಖ್ಯೆ ಕಡಿಮೆ ಇತ್ತು. ಸ್ಥಳೀಯ ಸಂಸ್ಥೆ, ಕಂದಾಯ, ಪೊಲೀಸ್‌, ಮಾಲಿನ್ಯ ನಿಯಂತ್ರಣ ಮಂಡಳಿ, ಅಗ್ನಿ ಶಾಮಕ ದಳ ಸೇರಿದಂತೆ ವಿವಿಧ ಇಲಾಖೆಗಳಿಂದ ಅನುಮತಿ ಪಡೆಯಬೇಕಾಗಿದೆ.

ಪರಿಸರ ಸ್ನೇಹಿ ದೀಪಾವಳಿ ಆಚರಣೆಗಾಗಿ ಮಾಲಿನ್ಯ ನಿಯಂತ್ರಣ ಮಂಡಳಿ ಹಸಿರು ಪಟಾಕಿ ಮಾರಾಟಕ್ಕೆ ಅನುಮತಿ ನೀಡಿದೆ.  ಅತ್ತಿಬೆಲೆಯಲ್ಲಿ ಪಟಾಕಿ ಸಿಗದಿದ್ದಾಗ ಪಕ್ಕದ ತಮಿಳುನಾಡಿನ ಗಡಿಯಿಂದ ಪಟಾಕಿ ತರಲಾಗುತ್ತಿದೆ. ಈ ಭಾಗದಲ್ಲಿ ವರ್ಷ ಪೂರ್ತಿ ಪಟಾಕಿ ಅಂಗಡಿಗಳು ತೆರೆದಿರುತ್ತವೆ.

ಹೆಸರಿಗಷ್ಟೇ ಸೀಮಿತ