ವೆಂಕಟಸುಬ್ಬರಾವ್‌ ವರ್ಷದ ವ್ಯಕ್ತಿ

ಬೆಂಗಳೂರು: ಸಾಮಾಜಿಕ ಕಾರ್ಯಕರ್ತ ವೆಂಕಟಸುಬ್ಬರಾವ್‌ ಅವರಿಗೆ ನಮ್ಮ ಬೆಂಗಳೂರು ಪ್ರತಿಷ್ಠಾನದ 2013ನೇ ಸಾಲಿನ ‘ವಾರ್ಷಿಕ ವ್ಯಕ್ತಿ ಪ್ರಶಸ್ತಿ’ ಪ್ರದಾನ ಮಾಡಲಾಯಿತು. ನಮ್ಮ ಬೆಂಗಳೂರು ಪ್ರತಿಷ್ಠಾನ ನಗರದಲ್ಲಿ ಶನಿವಾರ ಆಯೋಜಿಸಿದ್ದ 2013ನೇ ಸಾಲಿನ ‘ನಮ್ಮ ಬೆಂಗಳೂರು ಪ್ರಶಸ್ತಿ’ ಪ್ರದಾನ ಸಮಾರಂಭದಲ್ಲಿ ಸ್ವಾತಂತ್ರ್ಯ ಹೋರಾಟಗಾರ ಎಚ್‌.ಎಸ್‌.­ದೊರೆಸ್ವಾಮಿ ಅವರು ಪ್ರಶಸ್ತಿ ಪ್ರದಾನ ಮಾಡಿದರು.

ನಾಗರಿಕ ವೈಯಕ್ತಿಕ ವಿಭಾಗದಲ್ಲಿ ಕರುಣಾಶ್ರಯ ಸಂಸ್ಥೆಯ ಸ್ಥಾಪಕ ಜಿ.­ಮನೋಹರ್‌ ರೋ, ಯುವಜನ ವಿಭಾ­ಗ­ದಲ್ಲಿ ಗುಡ್‌ಹಾರ್ಟ್‌ ಸೋಲ್‌ ಸಂಸ್ಥೆಯ ಈಶ್ವರ್‌ ಮಹದೇವನ್‌, ವಿ.­ಸುಭಾಷ್‌ ಚಂದ್ರ, ಅಮೃತ್‌ ಚರ್ಮನ, ನಾಗರಿಕ ಸಂಘಟನೆ ವಿಭಾಗ­ದಲ್ಲಿ ದಿ ಅಸೋಸಿಯೇಷನ್‌ ಆಫ್‌ ಪೀಪಲ್‌ ವಿತ್‌ ಡಿಸಬಿಲಿಟಿ, ಉದ್ದಿಮೆಗಳ ಸಾಮಾಜಿಕ ಹೊಣೆಗಾರಿಕೆ ವಿಭಾಗದಲ್ಲಿ ವಿಪ್ರೊ ಕಂಪೆನಿಗೆ ಪ್ರಶಸ್ತಿ ದೊರೆತಿದೆ.

ಸರ್ಕಾರಿ ಅಧಿಕಾರಿ ವಿಭಾಗದಲ್ಲಿ ಶಾಲಾ ಶಿಕ್ಷಕಿ ಟಿ.ಆರ್‌.ನಾಗಮಣಿ, ಸರ್ಕಾರಿ ಸಂಸ್ಥೆಗಳ ವಿಭಾಗದಲ್ಲಿ ಬೆಂಗಳೂರು ಒನ್‌, ಮಾಧ್ಯಮ ಸಂಸ್ಥೆ ವಿಭಾಗ­ದಲ್ಲಿ ಅಂತರ್ಜಾಲ ಪತ್ರಿಕೆ ಸಿಟಿಜನ್‌ ಮ್ಯಾಟರ್ಸ್‌, ಮಾಧ್ಯಮ ವೈಯಕ್ತಿಕ ವಿಭಾ­ಗದಲ್ಲಿ ನ್ಯೂಸ್‌9 ವರದಿಗಾರ ಹೇಮಂತ್‌ ಕಶ್ಯಪ್‌ ಮತ್ತು ಸಾಮಾಜಿಕ ಉದ್ದಿಮೆ ವಿಭಾಗದಲ್ಲಿ ಪೂನಂ ಬಿರ್‌ ಕಸ್ತೂರಿ ಅವರಿಗೆ ಪ್ರಶಸ್ತಿ ಪ್ರದಾನ ಮಾಡಲಾಯಿತು.

ಸಮಾರಂಭದಲ್ಲಿ ಮಾತನಾಡಿದ ಲೋಕಾ­ಯುಕ್ತ ನಿವೃತ್ತ ನ್ಯಾ. ಸಂತೋಷ್‌ ಹೆಗ್ಡೆ, ‘ನಗರದ ಸಮಸ್ಯೆಗಳು ಹೆಚ್ಚಾಗುತ್ತಿವೆ. ಸಂಚಾರ ಸಮಸ್ಯೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಕೆರೆಗಳು ಒತ್ತುವರಿಯಾಗುತ್ತಿವೆ. ನಗರದ ಸಮಸ್ಯೆ­ಗಳ ಪರಿಹಾರಕ್ಕಾಗಿ ಪ್ರಾಮಾಣಿಕ ಪ್ರಯತ್ನ ಮಾಡುತ್ತಿರು­ವವರನ್ನು ಗುರುತಿ­ಸುವ ಕೆಲಸವನ್ನು ನಮ್ಮ ಬೆಂಗಳೂರು ಪ್ರತಿಷ್ಠಾನ ಮಾಡುತ್ತಿದೆ’ ಎಂದರು. ಪ್ರಶಸ್ತಿಯು ₨ 1 ಲಕ್ಷ ಮತ್ತು ಸ್ಮರಣಿಕೆಯನ್ನು ಒಳಗೊಂಡಿದೆ.