ನಗರದಲ್ಲಿ ಶೇ 45ರಷ್ಟುಮಳೆ ಕೊರತೆ

ಬೆಂಗಳೂರು:ರಾಜ್ಯದಲ್ಲಿ ಮುಂಗಾರು ಕ್ಷೀಣಿಸಿರುವ ರೀತಿಯಲ್ಲೇ ರಾಜಧಾನಿಯಲ್ಲೂ ಮಳೆ ಕೈಕೊಟ್ಟಿದೆ.ಜುಲೈ ತಿಂಗಳಿನಲ್ಲಿ ವಾಡಿಕೆಗಿಂತ ಶೇ 45ರಷ್ಟು ಕಡಿಮೆ ಮಳೆಯಾಗಿದೆ.

ಕಳೆದ 6 ವರ್ಷಗಳ (2014ರಿಂದ) ಜೂನ್ ಮತ್ತು ಜುಲೈನಲ್ಲಿ ಸುರಿದ ಮಳೆಯ ಅಂಕಿ–ಅಂಶಗಳನ್ನು ಗಮನಿಸಿದರೆ 2016ನೇ ಸಾಲಿನಲ್ಲಿ ಉತ್ತಮವಾಗಿ ಮಳೆಯಾಗಿದೆ. ಉಳಿದ ವರ್ಷಗಳಲ್ಲಿ ವಾಡಿಕೆಗಿಂತ ಕಡಿಮೆ ಮಳೆಯಾಗಿದೆ.

ಈ ವರ್ಷವೂ ಇದೇ ಪರಿಸ್ಥಿತಿ ಮುಂದುವರಿದಿದ್ದು, ಎರಡು ತಿಂಗಳಲ್ಲಿ 136 ಮಿಲಿ ಮೀಟರ್ ಮಳೆಯಾಗಬೇಕಿತ್ತು. ಆದರೆ, 94 ಮಿ.ಮೀ ಮಾತ್ರ ಮಳೆಯಾಗಿದ್ದು, ಶೇ 31ರಷ್ಟು ಕಡಿಮೆಯಾಗಿದೆ.

2016ರಲ್ಲಿ ಮಾತ್ರ ಜೂನ್‌ನಲ್ಲಿ ವಾಡಿಕೆಗಿಂತ ಶೇ 122 ಮತ್ತು ಜುಲೈನಲ್ಲಿ ಶೇ 105ರಷ್ಟು ಹೆಚ್ಚು ಮಳೆಯಾಗಿತ್ತು. ಇನ್ನುಳಿದ ವರ್ಷಗಳಲ್ಲಿ ಉದ್ಯಾನ ನಗರಿಯನ್ನು ಮಳೆ ಕೊರತೆಯೇ ಕಾಡಿದೆ. ಹೀಗಾಗಿ ಅಂತರ್ಜಲ ಮಟ್ಟ ಪಾತಾಳ ಸೇರಿದೆ. ಆಗಸ್ಟ್‌ನಲ್ಲಿಯಾದರೂ ಉತ್ತಮ ಮಳೆಯಾಗಬಹುದು ಎಂಬ ನಿರೀಕ್ಷೆಯಲ್ಲಿ ನಗರದ ಜನರಿದ್ದಾರೆ.