BMTC: ರಜತ ಮಹೋತ್ಸವದ ಸಂಭ್ರಮದಲ್ಲಿ ಬಿಎಂಟಿಸಿ

ಬೆಂಗಳೂರು: ಕೆಎಸ್‌ಆರ್‌ಟಿಸಿಯಿಂದ ಪ್ರತ್ಯೇಕಗೊಂಡು ಬಿಎಂಟಿಸಿ ಉದಯವಾಗಿ 25 ವರ್ಷಗಳು ಕಳೆದಿವೆ. ಅದರ ನೆನಪಲ್ಲಿ ರಜತ ಮಹೋತ್ಸವವನ್ನು ಅದ್ದೂರಿಯಾಗಿ ನಡೆಸಲು ಬಿಎಂಟಿಸಿ ನಿರ್ಧರಿಸಿದೆ.

1997ರ ಆ.15ರಂದು ಕೆಎಸ್‌ಆರ್‌ಟಿಸಿಯನ್ನು ನಾಲ್ಕು ನಿಗಮಗಳನ್ನಾಗಿ ಮಾಡಲಾಯಿತು. ಕೆಎಸ್ಆರ್‌ಟಿಸಿ, ಎನ್‌ಡಬ್ಲ್ಯುಆರ್‌ಟಿಸಿ, ಕೆಕೆಆರ್‌ಟಿಸಿ ಜೊತೆಗೆ ಬಿಎಂಟಿಸಿ ಉದಯವಾಯಿತು. 

ಮೂರು ಪಟ್ಟು ಹೆಚ್ಚಿದ ಬಸ್‌ಗಳ ಸಂಖ್ಯೆ: ಬಿಎಂಟಿಸಿ ಸ್ವತಂತ್ರ ಸಂಸ್ಥೆಯಾಗಿ ಆರಂಭಗೊಂಡಾಗ 2,088 ಬಸ್‌ಗಳು ಇದ್ದವು. ಈಗ 6,570 ಬಸ್‌ಗಳಿವೆ. ಅದರಲ್ಲಿ 6,180 ಡೀಸೆಲ್‌ ಬಸ್‌ಗಳಾದರೆ, 390 ವಿದ್ಯುತ್‌ ಚಾಲಿತ ಬಸ್‌ಗಳಾಗಿವೆ.

49 ಘಟಕಗಳು, 4 ಕಾರ್ಯಾಗಾರಗಳನ್ನು ಹೊಂದಿರುವ ಬಿಎಂಟಿಸಿಯಲ್ಲಿ ಒಟ್ಟು 29,019 ಸಿಬ್ಬಂದಿ ಕೆಲಸ ಮಾಡುತ್ತಿದ್ದಾರೆ. ನಿತ್ಯ 57,002 ಸುತ್ತುವಳಿಗಳಲ್ಲಿ ಬಸ್‌ಗಳು ಪ್ರಯಾಣಿಸುತ್ತಿವೆ. ಆಗ ಇದ್ದ ಬಸ್‌ಗಳಿಗೂ ಈಗಿನ ಬಸ್‌ಗಳಿಗೂ ಗುಣಮಟ್ಟದಲ್ಲಿಯೂ ಭಾರಿ ವ್ಯತ್ಯಾಸ ಇದೆ. ಪ್ರಯಾಣಿಕರ ಸ್ನೇಹಿ, ಪರಿಸರ ಸ್ನೇಹಿ ಬಸ್‌ಗಳ ಸಂಖ್ಯೆ ಈಗ ಹೆಚ್ಚಾಗಿದೆ.

ಬೆಂಗಳೂರು ಮಹಾನಗರದ ಜನರ ಸಂಪರ್ಕನಾಡಿಯಂತೆ ಕಾರ್ಯನಿರ್ವಹಿಸುತ್ತಿರುವ ಬಿಎಂಟಿಸಿಯಲ್ಲಿ ನಿರೀಕ್ಷಿತ ಮಟ್ಟದಲ್ಲಿ ಪ್ರಯಾಣಿಕರ ಸಂಖ್ಯೆ ಏರಿರಲಿಲ್ಲ. ಮೆಟ್ರೊ ರೈಲು ಸಂಚಾರ ಆರಂಭವಾಗಿದ್ದು, ಖಾಸಗಿ ವಾಹನಗಳನ್ನು ಹೆಚ್ಚು ಅವಲಂಬಿಸಿದ್ದು ಇದಕ್ಕೆ ಕಾರಣವಾಗಿತ್ತು.  25 ವರ್ಷಗಳನ್ನು ಪೂರೈಸುವ ಹೊತ್ತಿಗೆ ಮಹಿಳೆಯರಿಗೆ ಉಚಿತ ಪ್ರಯಾಣದ ‘ಶಕ್ತಿ’ ಯೋಜನೆ ಜಾರಿಯಾಗಿ ಮತ್ತೆ ಪ್ರಯಾಣಿಕರ ಸಂಖ್ಯೆ ಹೆಚ್ಚಿದೆ. ಜೂನ್‌ವರೆಗೆ ನಿತ್ಯ ಪ್ರಯಾಣಿಸುವವರ ಸಂಖ್ಯೆ 27.34 ಲಕ್ಷ ಇದ್ದಿದ್ದು, ಈಗ 35.20 ಲಕ್ಷಕ್ಕೆ ಏರಿದೆ ಎಂದು ಬಿಎಂಟಿಸಿ ಅಧಿಕಾರಿಗಳು ಮಾಹಿತಿ ನೀಡಿದರು.

ಉತ್ತಮ ಅನುಭವ: ‘ನಾನು ಜೂನಿಯರ್‌ ಅಸಿಸ್ಟೆಂಟ್‌ ಆಗಿ ಉದ್ಯೋಗಕ್ಕೆ ಸೇರಿದ 10 ವರ್ಷಗಳ ಬಳಿಕ ಬಿಎಂಟಿಸಿ ಎಂದು ಪ್ರತ್ಯೇಕ ನಿಗಮವನ್ನಾಗಿ ಮಾಡಲಾಯಿತು. ಅಲ್ಲಿವರೆಗೆ ನಗರ ಸಾರಿಗೆಗೆ ಬಿಟಿಎಸ್‌ ಎಂಬ ಹೆಸರಿತ್ತು. ಅದು ಕೆಎಸ್‌ಆರ್‌ಟಿಸಿ ಅಡಿಯಲ್ಲಿತ್ತು. ಅಲ್ಲಿಂದ ಇಲ್ಲಿವರೆಗೆ ಬಿಎಂಟಿಸಿಯಲ್ಲಿ ಕೆಲಸ ಮಾಡುತ್ತಿದ್ದೇನೆ. ಉತ್ತಮ ಅನುಭವವನ್ನು ನೀಡಿದೆ. ಆಗ ಕೆಂಪು ಬಸ್‌ಗಳು ಮಾತ್ರ ಇದ್ದವು. ಈಗ ವಿವಿಧ ರೀತಿಯ ಹೈಟೆಕ್‌ ಬಸ್‌ಗಳು ಬಂದಿವೆ. ಆಗ ಸಾಮಾನ್ಯ ಸೀಟುಗಳು ಮಾತ್ರ ಇದ್ದವು. ಈಗ ಪುಶ್‌ಅಪ್‌ ಸೀಟುಗಳು ಬಂದಿವೆ’ ಎಂದು ಬಿಎಂಟಿಸಿ ಹಿರಿಯ ಸಹಾಯಕರಾಗಿರುವ ಪುಟ್ಟರಾಜು ಬಿ. ಅವರು ‘ಅನುಭವ ಹಂಚಿಕೊಂಡರು.

‘ಉತ್ತಮ ಅಧಿಕಾರಿಗಳನ್ನು, ಉತ್ತಮರಲ್ಲದವರನ್ನು ಹೀಗೆ ಎಲ್ಲ ರೀತಿಯ ಅಧಿಕಾರಿಗಳನ್ನು ನೋಡಿದ್ದೇನೆ. ಇನ್ನು ನಾಲ್ಕು ವರ್ಷಗಳಲ್ಲಿ ನಿವೃತ್ತನಾಗುತ್ತೇನೆ. ಹಿಂದೆಲ್ಲ ಯಾವುದೇ ಗಲಾಟೆಗಳಾದರೂ ಮೊದಲು ಬಸ್‌ಗಳಿಗೆ ಕಲ್ಲು ಬೀಳುತ್ತಿದ್ದವು. ಬಹಳ ನಷ್ಟಗಳಾಗುತ್ತಿದ್ದವು. ಈಗ ಅದೆಲ್ಲ ನಿಯಂತ್ರಣವಾಗಿದೆ. ಸಂಸ್ಥೆ ಮುನ್ನಡೆಯುತ್ತಿದೆ. ಇನ್ನಷ್ಟು ಅಭಿವೃದ್ಧಿಯಾಗಬೇಕಿದೆ. ಸರ್ಕಾರದ ಪ್ರೋತ್ಸಾಹ ಹೆಚ್ಚಬೇಕಿದೆ’ ಎಂದರು.

ಅನೇಕ ಕಾರ್ಯಕ್ರಮ: ರಾಮಲಿಂಗಾರೆಡ್ಡಿ ಬಿಎಂಟಿಸಿ ಆರಂಭವಾಗಿ 25 ವರ್ಷಗಳು ಆಗಿರುವ ಹಿನ್ನೆಲೆಯಲ್ಲಿ ಸೆ.26ರಂದು ರಜತ ಮಹೋತ್ಸವ ಕಾರ್ಯಕ್ರಮ ನಡೆಸಲಾಗುವುದು. ಅಪಘಾತವಾಗದಂತೆ ಬಸ್‌ಗಳನ್ನು ಚಲಾಯಿಸಿರುವ ಹಿರಿಯ ಚಾಲಕರಿಗೆ ಸನ್ಮಾನ ಮೃತಪಟ್ಟ ಸಿಬ್ಬಂದಿಯ ಕುಟುಂಬದ ಒಬ್ಬರಿಗೆ ಅನುಕಂಪದ ಆಧಾರದಲ್ಲಿ ಉದ್ಯೋಗ ನೀಡುವುದು ಸೇರಿದಂತೆ ಅನೇಕ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿದೆ ಎಂದು ಸಾರಿಗೆ ಸಚಿವ ರಾಮಲಿಂಗಾರೆಡ್ಡಿ ತಿಳಿಸಿದರು.