ಕೆ.ಆರ್.ಪುರದಲ್ಲಿ ರಾಜ್ಯೋತ್ಸವ ಸಡಗರ

ಕೆ.ಆರ್.ಪುರ: ಕ್ಯಾಲಸನಹಳ್ಳಿಯ ಪೂರ್ವ ಪಾಮ್ ಬೀಚ್ ಅಪಾರ್ಟ್‌ಮೆಂಟ್‌ ಸಮುಚ್ಚಯದಲ್ಲಿ ಕನ್ನಡ ಸಾಂಸ್ಕೃತಿಕ ಸಮಿತಿ ಝೇಂಕಾರ ತಂಡದಿಂದ 70ನೇ ಕನ್ನಡ ರಾಜ್ಯೋತ್ಸವವನ್ನು ಆಚರಿಸಲಾಯಿತು.

ಡೊಳ್ಳು ಕುಣಿತ, ಜನಪದ ನೃತ್ಯ, ಕನ್ನಡ ಭಾವಗೀತೆ, ಚಲನಚಿತ್ರ ಗೀತೆಗಳು, ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆದವು. ಮಕ್ಕಳಿಂದ ಹಿರಿಯ ನಾಗರಿಕರು ಕಾರ್ಯಕ್ರಮದಲ್ಲಿ ಕುಣಿದು ಕುಪ್ಪಳಿಸಿ ಸಂಭ್ರಮಿಸಿದರು. ಥೀಮ್ ನಾರೀಶಕ್ತಿ ಮಹಿಳೆಯರ ತಂಡ ಕಾರ್ಯಕ್ರಮ ನಡೆಸಿಕೊಟ್ಟಿದ್ದು ವಿಶೇಷವಾಗಿತ್ತು.

ಶಾಸಕ ಬೈರತಿ ಬಸವರಾಜ ಮಾತನಾಡಿ, ‘ಅಪಾರ್ಟ್‌ಮೆಂಟ್‌ನಲ್ಲಿ ಹಲವು ಭಾಷಿಕರಿದ್ದರೂ ಕನ್ನಡದ ಬಗ್ಗೆ ಅಪಾರ ಕಾಳಜಿ ಹೊಂದಿ ರಾಜ್ಯೋತ್ಸವ ಆಚರಣೆ ಮಾಡುತ್ತಿರುವುದು ಭಾಷಾಭಿಮಾನ ತೋರಿಸುತ್ತದೆ’ ಎಂದರು.

ಝೇಂಕಾರ ತಂಡದ ಸದಸ್ಯ ವಿಜಯಕುಮಾರ್ ಘನಶ್ಯಾಮ್ ಮಾತನಾಡಿ, ‘ಬೆಂಗಳೂರು ನಗರದಲ್ಲಿ ಪರಭಾಷಿಕರು ವಾಸಿಸುತ್ತಿರುವ ಹಿನ್ನೆಲೆಯಲ್ಲಿ ಅವರಿಗೆ ಕನ್ನಡ ಭಾಷೆ ಕಲಿಸುವ ಯೋಜನೆ ರೂಪಿಸಿಕೊಂಡಿದ್ದೇವೆ’ ಎಂದರು.

ಕನ್ನಡ ಸಾಂಸ್ಕೃತಿಕ ಸಮಿತಿಯ ಸದಸ್ಯರಾದ ದೀಪಕ್ ಬೇಂಗ್ರೆ, ಶಿಲ್ಪಾ ಪಾಟೀಲ್, ಅಶ್ವಿನಿ ಕಿಶೋರ್, ದೀಪ್ತಿ ತರುಣ್, ಸೌಮ್ಯ, ಮಧು ಮನಮೋಹನ್, ಪ್ರೀತಿ ಬೇಂಗ್ರೆ, ಡಾ.ಸುದರ್ಶನ್, ಕರ್ಣ ನಾಟಿಕರ್, ಪ್ರದೀಪ್ ಉಪಸ್ಥಿತರಿದ್ದರು.