ಮಾಸ್ಕ್ ಇಲ್ಲದೇ ಓಡಾಟ | ಬಿಬಿಎಂಪಿಯಿಂದ ₹ 51 ಸಾವಿರ ದಂಡ ವಸೂಲಿ

ಬೆಂಗಳೂರು: ಕೋವಿಡ್-19 ನಿಯಂತ್ರಣ ಸಲುವಾಗಿ ಸಾರ್ವಜನಿಕ ಪ್ರದೇಶಗಳಲ್ಲಿ ಮುಖಗವಸು ಧರಿಸುವುದನ್ನು ಕಡ್ಡಾಯ ಮಾಡಿದರೂ ಕೆಲವರು ಈ ನಿಯಮಪಾಲಿಸುತ್ತಿಲ್ಲ. ಮಾಸ್ಕ್ ಧರಿಸದ 86 ಮಂದಿಗೆ ಬಿಬಿಎಂಪಿ ಶನಿವಾರ ದಂಡ ವಿಧಿಸಿದೆ. ಒಂದೇ ದಿನ ಒಟ್ಟು ₹ 51 ಸಾವಿರ ದಂಡ ಸಂಗ್ರಹಿಸಲಾಗಿದೆ.

ನಗರದ ನಾಗರೀಕರು ಸಾರ್ವಜನಿಕ ಸ್ಥಳಗಳಲ್ಲಿ ಮಾಸ್ಕ್ ಧರಿಸದೇ ಇದ್ದರೆ ದಂಡ ವಿಧಿಸುವುದಾಗಿ ಪಾಲಿಕೆ ಗುರುವಾರ ಅಧಿಸೂಚನೆ ಹೊರಡಿಸಿತ್ತು.

ಯಲಹಂಕ ವಲಯ ಹೊರತುಪಡಿಸಿ ಉಳಿದ ಏಳು ವಲಯಗಳಲ್ಲೂ ದಂಡ ಹಾಕಲಾಗಿದೆ. ಬಿಬಿಎಂಪಿಯ ಹಿರಿಯ ಆರೋಗ್ಯ ನಿರೀಕ್ಷಕರು, ಕಿರಿಯ ಆರೋಗ್ಯ ನಿರೀಕ್ಷಕರು ಹಾಗೂ ಮಾರ್ಷಲ್‌ಗಳಿಗೆ ದಂಡ ವಿಧಿಸುವ ಅಧಿಕಾರವನ್ನು ನೀಡಲಾಗಿದೆ.

ಜೆ.ಸಿ.ಗಳಿಗೆ ಮೆಜಿಸ್ಟೀರಿಯಲ್‌ ಅಧಿಕಾರ
ಬಿಬಿಎಂಪಿಯ ಎಲ್ಲ ವಲಯಗಳ ಜಂಟಿ ಆಯುಕ್ತರಿಗೆ ಮೆಜಿಸ್ಟೀಯಲ್‌ ಅಧಿಕಾರವನ್ನು ನೀಡಲಾಗಿದೆ. ಈ ಕುರಿತು ನಗರಾಭಿವೃದ್ಧಿ ಇಲಾಖೆ ಶನಿವಾರ ಆದೇಶ ಹೊರಡಿಸಿದೆ.