ಆರ್‌.ವಿ. ಕಾಲೇಜು ಹಿಂಭಾಗದ ಮೋರಿಯಲ್ಲಿ ಶವ ಪತ್ತೆ: ಗುರುತು ಪತ್ತೆಯಾಗಿಲ್ಲ

ಬೆಂಗಳೂರು: ನಗರದ ಆರ್‌.ವಿ. ಕಾಲೇಜು ಹಿಂಭಾಗದ ಮೋರಿಯಲ್ಲಿ ಪತ್ತೆಯಾಗಿರುವ ಅಪರಿಚಿತ ವ್ಯಕ್ತಿಯ ಶವದ ಗುರುತು ಇನ್ನೂ ಪತ್ತೆಯಾಗಿಲ್ಲ.

ಸುಮಾರು 40 ರಿಂದ 45 ವರ್ಷದ ಪುರುಷನ ಎದೆಯ ಎಡಭಾಗದಲ್ಲಿ ತಮಿಳಿನಲ್ಲಿ ‘ಎಸ್‌. ಜಯ’ ಹೆಸರಿನ ಹಚ್ಚೆ ಇದೆ. ಕಾಲೇಜಿನ ಭದ್ರತಾ ವಿಭಾಗದ ಮೇಲ್ವಿಚಾರಕ ಲೋಕೇಶ್ ಅವರು ಶವವನ್ನು ಗಮನಿಸಿ, ಪೊಲೀಸರಿಗೆ ದೂರು ನೀಡಿದ್ದರು.

ಸ್ಥಳಕ್ಕೆ ಕೆಂಗೇರಿ ಠಾಣೆ ಪೊಲೀಸರು ಭೇಟಿ ನೀಡಿ, ಪರಿಶೀಲನೆ ನಡೆಸಿದರು. ಶವವನ್ನು ಹೊರತೆಗೆದು ಆಸ್ಪತ್ರೆಗೆ ರವಾನಿಸಿ, ಮರಣೋತ್ತರ ಪರೀಕ್ಷೆ ನಡೆಸಲಾಯಿತು.

ಮುಖದ ಭಾಗ ಕೊಳೆತ್ತಿದ್ದು, ದೇಹದ ಭಾಗ ಊದಿಕೊಂಡಿತ್ತು. ಯಾವುದೇ ಗಾಯಗಳು ಕಂಡು ಬಂದಿಲ್ಲ. ಮೃತ ವ್ಯಕ್ತಿ ಹಾಗೂ ವಾರಸುದಾರರ ಬಗ್ಗೆ ಮಾಹಿತಿಗಳನ್ನು ಕಲೆ ಹಾಕಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.