91 ಮನೆಗಳ ಅನಧಿಕೃತ ನೀರು ಸಂಪರ್ಕ ಕಡಿತ

ಬೆಂಗಳೂರು: ಅನಧಿಕೃತವಾಗಿ ನೀರು ಪಡೆಯುತ್ತಿದ್ದ 91 ಮನೆಗಳ ಸಂಪರ್ಕಗಳನ್ನು ಜಲಮಂಡಳಿಯು ಕಡಿತಗೊಳಿಸಿದೆ. ಅಲ್ಲದೆ, ದಂಡವನ್ನೂ ವಿಧಿಸಲಾಗಿದೆ.

ಮಾಪಕದ (ಮೀಟರ್‌) ನೀರು ಹರಿಯುವಿಕೆಯನ್ನು ತಪ್ಪಿಸಿ, ಅನ್ಯ ಮಾರ್ಗದ ಮೂಲಕ ಸಂಪರ್ಕ ಪಡೆಯಲಾಗಿತ್ತು. ಗ್ರಾಹಕರ ಮಾಸಿಕ ನೀರಿನ ಬೇಡಿಕೆಯನ್ನು ಆಧರಿಸಿ, ಪರಿಶೀಲನೆ ನಡೆಸಿದಾಗ ಬಳಸಿದ ನೀರಿಗೂ, ಮೀಟರ್‌ನಲ್ಲಿ ದಾಖಲಾದ ನೀರಿನ ಪ್ರಮಾಣಕ್ಕೂ ವ್ಯತ್ಯಾಸವಿರುವುದು ಕಂಡು ಬಂದಿತ್ತು ಎಂದು ಜಲಮಂಡಳಿ ಹೇಳಿದೆ. ‌

ಪೂರ್ವ ವಲಯದಲ್ಲಿ 41 ಹಾಗೂ ಪಶ್ಚಿಮ ವಲಯದಲ್ಲಿ 50 ಇಂತಹ ಪ್ರಕರಣಗಳು ಪತ್ತೆಯಾಗಿವೆ. ಮಾಪಕದ ಮೂಲಕ ನೀರು ಹರಿಯುವುದನ್ನು ತಪ್ಪಿಸಿ, ಸಂಪರ್ಕ ಪಡೆಯುವುದು ಕಾನೂನುಬಾಹಿರ. ಗ್ರಾಹಕರು ಈ ಪ್ರಯತ್ನ ಮಾಡಬಾರದು ಎಂದೂ ಮಂಡಳಿ ಎಚ್ಚರಿಸಿದೆ.