ಬಸವಕಲ್ಯಾಣ: ‘ದೆಹಲಿಯಲ್ಲಿ ಬಸವತತ್ವ ಸಮ್ಮೇಳನಕ್ಕೆ ಸಿದ್ಧತೆ’

ಬಸವಕಲ್ಯಾಣ: ‘ರಾಜ್ಯ ಮಠಾಧೀಶರ ಒಕ್ಕೂಟದಿಂದ ಶೀಘ್ರ ದೆಹಲಿಯಲ್ಲಿ ಬಸವತತ್ವ ಸಮ್ಮೇಳನ ಆಯೋಜಿಸಲು ನಿರ್ಣಯಿಸಲಾಗಿದೆ’ ಎಂದು ಒಕ್ಕೂಟದ ಅಧ್ಯಕ್ಷರೂ ಆಗಿರುವ ಅನುಭವ ಮಂಟಪದ ಅಧ್ಯಕ್ಷ ಬಸವಲಿಂಗ ಪಟ್ಟದ್ದೇವರು ಹೇಳಿದ್ದಾರೆ.

ನಗರದಲ್ಲಿ ಶನಿವಾರ ನಡೆದ 46ನೇ ಶರಣ ಕಮ್ಮಟ ಮತ್ತು ಅನುಭವ ಮಂಟಪ ಉತ್ಸವದ ಉದ್ಘಾಟನಾ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

‘ಕೆಲವರು ಸಮಾಜ ವಿಭಜಿಸುವ ಕಾರ್ಯ ನಡೆಯುತ್ತಿದೆ ಎಂದು ಟೀಕಿಸುತ್ತಾರೆ. ಆದರೆ ನಾವು ಒಂದಾಗಿಸುವುದಕ್ಕೆ ಪ್ರಯತ್ನಿಸುತ್ತಿದ್ದೇವೆ. ಒಕ್ಕೂಟದಿಂದ ಈಚೆಗೆ ರಾಜ್ಯಾದ್ಯಂತ ನಡೆದ ಬಸವ ಸಂಸ್ಕೃತಿ ಯಾತ್ರೆ ಯಶಸ್ವಿಯಾಗಿದೆ. ಎಲ್ಲರೂ ಅದಕ್ಕೆ ಸಹಕರಿಸಿದ್ದಾರೆ’ ಎಂದರು

ಜಿಲ್ಲಾ ಉಸ್ತುವಾರಿ ಸಚಿವ ಈಶ್ವರ ಖಂಡ್ರೆ ಮಾತನಾಡಿ, ‘ವರ್ಗ, ವರ್ಣ, ಲಿಂಗಭೇದದ ಆಧಾರದಲ್ಲಿ ಸಮಾಜ ಒಡೆಯುತ್ತಿದೆ. ಆದ್ದರಿಂದ ಬಸವತತ್ವದ ನಿಜ ಅನುಯಾಯಿಗಳಾಗಿ ಐಕ್ಯತೆ ಮೂಡಿಸುವುದಕ್ಕೆ ಪ್ರಯತ್ನಿಸಬೇಕು. ಅದಕ್ಕಾಗಿಯೇ ಹೊಸ ಅನುಭವ ಮಂಟಪದಲ್ಲಿ 770 ಕಂಬಗಳ ಮೇಲೆ ಎಲ್ಲ ಜಾತಿ ಸಮುದಾಯಗಳ ಶರಣರ ಹೆಸರು, ಅವರ ಕಾಯಕ ಬರೆಸಲಾಗುತ್ತಿದೆ. ದುಶ್ಚಟದಿಂದ ಯುವಶಕ್ತಿ ದುರ್ಬಲ ಆಗುತ್ತಿದೆ. ಈ ಬಗ್ಗೆಯೂ ಜಾಗೃತಿ ಅಗತ್ಯ. ಆಯವ್ಯಯದಲ್ಲಿ ವಚನವಿಶ್ವವಿದ್ಯಾಲಯಕ್ಕೆ ಮಂಜೂರಾತಿ ದೊರಕುವುದು ನಿಶ್ಚಿತ’ ಎಂದರು.

ಆದಿಚುಂಚನಗಿರಿ ನಿರ್ಮಲಾನಂದನಾಥ ಸ್ವಾಮೀಜಿ ಮಾತನಾಡಿ, ‘ಬಸವತತ್ವದ ನಿಜ ಆಚರಣೆಯಿಂದ ಸಮಾಜದಲ್ಲಿ ಶಾಂತಿ, ನೆಮ್ಮದಿ ಸಾಧ್ಯ’ ಎಂದರು.

ಶಾಸಕ ಶರಣು ಸಲಗರ ಮಾತನಾಡಿ, ‘ಅನುಭವ ಮಂಟಪದ ಕಟ್ಟಡ ಕಾರ್ಯ ತೀವ್ರಗೊಳಿಸಬೇಕು. ಪ್ರಧಾನಮಂತ್ರಿ ಅವರಿಂದ ಅದರ ಉದ್ಘಾಟನೆ ಆಗಬೇಕು’ ಎಂದರು.

ಆಂಧ್ರಪ್ರದೇಶದ ರಾಜ್ಯಪಾಲ ಎಸ್.ಅಬ್ದುಲ್ ನಜೀರ್, ರಾಜ್ಯ ಮಕ್ಕಳ ಹಕ್ಕುಗಳ ಆಯೋಗದ ಅಧ್ಯಕ್ಷ ಶಶಿಧರ ಕೋಸಂಬೆ, ನವಲಿಂಗಕುಮಾರ ಪಾಟೀಲ ಮಾತನಾಡಿದರು.

ಹಾರಕೂಡ ಚನ್ನವೀರ ಶಿವಾಚಾರ್ಯರು, ಹುಲಸೂರ ಶಿವಾನಂದ ಸ್ವಾಮೀಜಿ, ಹರಳಯ್ಯ ಪೀಠಾಧ್ಯಕ್ಷೆ ಅಕ್ಕ ಗಂಗಾಂಬಿಕಾ, ಭಾಲ್ಕಿ ಗುರುಬಸವ ಪಟ್ಟದ್ದೇವರು, ಉಪ ವಿಭಾಗಾಧಿಕಾರಿ ಪ್ರಕಾಶ ಕುದರಿ, ತಹಶೀಲ್ದಾರ್ ದತ್ತಾತ್ರೇಯ ಜೆ.ಗಾದಾ, ಬಸವರಾಜ ಧನ್ನೂರ್ ಉಪಸ್ಥಿತರಿದ್ದರು. ಶಿವಕುಮಾರ ಪಂಚಾಳ ಸಂಗೀತ ಪ್ರಸ್ತುತಪಡಿಸಿದರು. ವಿವಿಧ ಸಾಧಕರಿಗೆ ಪ್ರಶಸ್ತಿ ನೀಡಲಾಯಿತು.

‘ಚೌಡಯ್ಯನ ವಚನ ಹೇಳಿದರೆ ಮಠ ಬಿಡಬೇಕಾದೀತು’

ಅನುಭವ ಮಂಟಪ ಉತ್ಸವದ ಮಧ್ಯಾಹ್ನದ ‘ಬಸವತತ್ವದ ಪ್ರಸ್ತುತತೆ’ ಗೋಷ್ಠಿಯಲ್ಲಿ ಬಸವಬೆಳವಿ ಶರಣಬಸವ ಸ್ವಾಮೀಜಿ ಮಾತನಾಡಿ ‘ಬಸವತತ್ವದ ಮಠಾಧೀಶರಿಗೆ ಕೆಲವರು ಬುದ್ಧಿ ಇಲ್ಲ ಅನ್ನುತ್ತಿದ್ದಾರೆ. ಅಪಶಬ್ದ ಬಳಸುತ್ತಿದ್ದಾರೆ. ಆದರೆ ಬಸವಣ್ಣ ಹಾಗೂ ಇತರೆ ಶರಣರು ಮಾನವೀಯ ಮೌಲ್ಯ ಬಿತ್ತರಿಸಿದ್ದಾರೆ. ಸಮಾಧಾನದಿಂದ ಇರಲು ಹೇಳಿದ್ದಾರೆ. ಅವರಲ್ಲಿ ದಯಾಗುಣ ಇದ್ದುದರಿಂದಲೇ 12ನೇ ಶತಮಾನದಲ್ಲಿ ಕಲ್ಯಾಣ ಬಿಟ್ಟು ಹೋದರು. ನಮ್ಮಲ್ಲೂ ನಿಜಶರಣ ಅಂಬಿಗರ ಚೌಡಯ್ಯನ ವಚನಗಳು ಬಹು ಕಠಿಣ ಶಬ್ದ ಹೊಂದಿವೆ. ಅವುಗಳನ್ನು ಹೇಳಲು ಹೊರಟರೆ ಕೇಳಲಾಗದೆ ಮಠವನ್ನೇ ಬಿಡಬೇಕಾದೀತು’ ಎಂದರು. ರಾಷ್ಟ್ರೀಯ ಬಸವದಳದ ತಾಲ್ಲೂಕು ಅಧ್ಯಕ್ಷ ರವೀಂದ್ರ ಕೊಳಕೂರ ಮಲ್ಲಿಕಾರ್ಜುನ ಸಂಗಮಕರ್ ಮಾತನಾಡಿದರು. ‌ಗೋರಟಾ ಪ್ರಭುದೇವ ಸ್ವಾಮೀಜಿ ಬಸವ ಮಹಾಮನೆ ಸಿದ್ದರಾಮ ಸ್ವಾಮೀಜಿ ಮಂಠಾಳ ಅಭಿನವ ಚನ್ನಬಸವ ಸ್ವಾಮೀಜಿ ಖೇಳಗಿ ಶಿವಲಿಂಗ ಸ್ವಾಮೀಜಿ ಕುಪೇಂದ್ರ ಪಾಟೀಲ ಸಾಹಿತಿ ಸೋಮನಾಥ ಯಾಳವಾರ ಕನ್ನಡ ಸಾಹಿತ್ಯ ಪರಿಷತ್ತಿನ ಜಿಲ್ಲಾ ಘಟಕದ ಅಧ್ಯಕ್ಷ ಸುರೇಶ ಚೆನ್ನಶೆಟ್ಟಿ ರಾಜೇಂದ್ರಕುಮಾರ ಗಂದಗೆ ಸೋಮಶೇಖರ ಪಾಟೀಲ ಉಪಸ್ಥಿತರಿದ್ದರು.