ಶಿಡ್ಲಘಟ್ಟ: ಮಧುರ ನೆನಪು ತೆರೆದಿಡುವ ಕಪ್ಪು ಬಿಳುಪು ಚಿತ್ರ

ಶಿಡ್ಲಘಟ್ಟ: ಕಪ್ಪು ಬಿಳುಪಿನ ಛಾಯಾ ಚಿತ್ರಗಳು ಇಂದಿಗೂ ಕಣ್ಮನ ಸೆಳೆಯುತ್ತವೆ. ಕೆಲವರಿಗಂತೂ ಕಪ್ಪು ಬಿಳುಪಿನ ಚಿತ್ರಗಳು ಎಂದೊಡನೆಯೇ ಗತಕಾಲದ ಮಧುರ ನೆನಪುಗಳ ಮೆರವಣಿಗೆ.

ಅವು ಹಿಂದಿನವರ ಸಾಮಾಜಿಕ, ಸಾಂಸ್ಕೃತಿಕ, ಅಭಿರುಚಿ, ವೇಷಭೂಷಣ ಮುಂತಾದವುಗಳನ್ನು ನೆನಪಿಸುವ ಮತ್ತು ಆಗಿನ ಕಾಲದರ್ಶನ ಮಾಡಿಸುವ ಸುಂದರ ಪ್ರವೇಶ ದ್ವಾರಗಳು. ಇಂತಹ ಅಪರೂಪದ ಕಪ್ಪುಬಿಳುಪಿನ ಛಾಯಾಚಿತ್ರಗಳ ಸಂಗ್ರಹಗಳು ವಿರಳ.

ಶಿಡ್ಲಘಟ್ಟದ ಇತಿಹಾಸದ ತುಣುಕುಗಳಂತೆ ಕಾಣುವ ಹಲವು ಚಿತ್ರಗಳು ಈಗಲು ಅಲ್ಲಲ್ಲಿ ಕೆಲವಿವೆ. ಶಿಡ್ಲಘಟ್ಟಕ್ಕೆ ಕನ್ನಡ ಚಿತ್ರರಂಗದ ಭೀಷ್ಮರೆಂದು ಪ್ರಖ್ಯಾತಿ ಪಡೆದ ಆರ್.ನಾಗೇಂದ್ರರಾವ್, ಹಾಸ್ಯನಟ ನರಸಿಂಹರಾಜು, ಗಿರಿಜಾ ಲೋಕೇಶ್ ಮುಂತಾದವರು ಬಂದಾಗಿನ ಚಿತ್ರಗಳು, ಗೆಳೆಯರೊಂದಿಗೆ, ಕುಟುಂಬ ಸಮೇತ, ಗೆದ್ದ ಪ್ರಶಸ್ತಿ ಫಲಕದೊಂದಿಗಿನ ಚಿತ್ರಗಳು, ನಾಟಕದ ವೇಷಧಾರಿಯಾಗಿ, ಸೂಟುಬೂಟು ಧರಿಸಿರುವ ಚಿತ್ರಗಳನ್ನು ಕಂಡಾಗ ಆಗಿನ ಜನರ ಬದುಕು ಸಿನಿಮಾ ರೀಲಿನಂತೆ ಕಣ್ಣ ಮುಂದೆ ಸಾಗುತ್ತದೆ.

1956ರಲ್ಲಿ ರಾಷ್ಟ್ರಭಾಷೆಯಾದ ಹಿಂದಿಯನ್ನು ಮಕ್ಕಳಿಂದ ಹಿರಿಯರವರೆಗೂ ಉಚಿತವಾಗಿ ಕಲಿಸುವ ಕೆಲಸವನ್ನು ಶಿಡ್ಲಘಟ್ಟದ ಹಿಂದಿ ಪ್ರಚಾರ ಸಮಿತಿ ಮಾಡುತ್ತಿತ್ತು. ಸ್ವಾತಂತ್ರ್ಯ ಬಂದು ಕೆಲವೇ ವರ್ಷಗಳಾಗಿದ್ದರಿಂದ ರಾಷ್ಟ್ರೀಯತೆಯನ್ನು ಬಿಂಬಿಸುವ ಉದ್ದೇಶದಿಂದ ಹಿಂದಿ ಪಂಡಿತರಾಗಿದ್ದ ಎಚ್.ವಿ.ರಾಮಚಂದ್ರರಾವ್ ನೇತೃತ್ವದಲ್ಲಿ ಹಿಂದಿ ತರಗತಿ ನಡೆಸಲಾಗುತ್ತಿತ್ತು. ಮುಂದೆ ಎಚ್.ವಿ.ರಾಮಚಂದ್ರರಾವ್ ಆಕಾಶವಾಣಿ ನಿರ್ದೇಶಕರಾದರು. 1991 ರಲ್ಲಿ ಇವರನ್ನು ಶಿಡ್ಲಘಟ್ಟದಲ್ಲಿ ನಡೆದ ತಾಲ್ಲೂಕು ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷರನ್ನಾಗಿ ಗೌರವಿಸಲಾಯಿತು.

ಕಪ್ಪು ಬಿಳುಪು ಚಿತ್ರವನ್ನು ಕ್ಯಾಬಿನೆಟ್ ಆಕಾರದ ಚಿತ್ರವನ್ನು ಕಟ್ಟು ಹಾಕಿಸಿ ಮನೆಗೆ ಬಂದವರೆಲ್ಲರಿಗೂ ಕಾಣುವಂತೆ ನೇತು ಹಾಕಿ ಹೆಮ್ಮೆ ಪಟ್ಟುಕೊಳ್ಳುವ ಕಾಲ ಈಗ ಕೇವಲ ಮಧುರ ನೆನಪಷ್ಟೇ.