ಸಂಜೀವಿನಿ ಮಾಸಿಕ ಸಂತೆ

ಗುಡಿಬಂಡೆ: ದಸರಾ ಪ್ರಯುಕ್ತ ಸೆಪ್ಟೆಂಬರ್ 30 ರಂದು ಮಹಿಳಾ ಸಂಘಗಳಿಂದ ಸೋಮೇನಹಳ್ಳಿ ಗ್ರಾಮ ಪಂಚಾಯಿತಿ ಮುಂಭಾಗದಲ್ಲಿ ಮಾಸಿಕ ಸಂತೆ ಹಮ್ಮಿಕೊಳ್ಳಲಾಗುತ್ತದೆ ಎಂದು ಕಾರ್ಯನಿರ್ವಾಹಕ ಅಧಿಕಾರಿ ನಾಗಮಣಿ ಎಂ ತಿಳಿಸಿದ್ದಾರೆ.

ಕೌಶಲ್ಯಾಭಿವೃದ್ಧಿ ಉದ್ಯಮಶೀಲತೆ ಮತ್ತು ಜೀವನೋಪಾಯ ಇಲಾಖೆ, ಸಂಜೀವಿನಿ ಕರ್ನಾಟಕ ರಾಜ್ಯ ಗ್ರಾಮ ಜೀವನೋಪಾಯ ಸಂವರ್ಧನ ಸಂಸ್ಥೆ, ಜಿಲ್ಲಾ ಪಂಚಾಯಿತಿ, ತಾಲ್ಲೂಕು ಪಂಚಾಯಿತಿ, ಗ್ರಾಮ ಪಂಚಾಯಿತಿ ಸೋಮೇನಹಳ್ಳಿ ಹಾಗೂ ಸ್ವಸಹಾಯ ಸಂಘದ ಆಶ್ರಯದಲ್ಲಿ ಸಂತೆ ನಡೆಯಲಿದೆ.

ಗ್ರಾಮೀಣ ಭಾಗದ ಸ್ವಸಹಾಯ ಸಂಘಗಳ ಮಹಿಳೆಯರು ತಯಾರಿಸಿರುವ ಉತ್ಪನ್ನಗಳಿಗೆ ಮಾರುಕಟ್ಟೆ ವ್ಯವಸ್ಥೆ ಕಲ್ಪಿಸಿ ಅವರ ಆರ್ಥಿಕ ಪ್ರಗತಿಗೆ ಉತ್ತೇಜನ ನೀಡಲು  ಮಾಸಿಕ ಸಂತೆ ಆಯೋಜನೆ ಮಾಡಲಾಗಿದೆ.

ಸಂತೆಯಲ್ಲಿ ಬೂದು ಕುಂಬಲಕಾಯಿ, ಸೊಪ್ಪು, ತರಕಾರಿ, ಹೂವು, ಸಾಂಬಾರ್ ಪದಾರ್ಥ, ಹಣ್ಣು, ಪೂಜೆ ಸಾಮಗ್ರಿ, ತೋರಣ, ಅಲಂಕಾರಿಕ ವಸ್ತು, ಬಳೆ, ವೀಳ್ಯದೆಲೆ, ಜೇನುತುಪ್ಪ, ತುಪ್ಪ, ಬತ್ತಿ, ನುಗ್ಗೆಸೊಪ್ಪು ಇತ್ಯಾದಿ ವಸ್ತುಗಳನ್ನು ಮಾರಾಟ ಮಾಡಲಾಗುವುದು ಎಂದು ತಿಳಿಸಿದರು.