ಕೊಪ್ಪ: ಹರಿಹರಪುರ ತೂಗು ಸೇತುವೆ; ಎಚ್ಚರ ತಪ್ಪಿದರೆ ಅಪಾಯ

ಕೊಪ್ಪ: ತಾಲ್ಲೂಕಿನ ಹರಿಹರಪುರದ ಬಳಿ ಅದ್ದಡ ಗ್ರಾಮದ ಚಿತ್ರಕೂಟಕ್ಕೆ ಸಂಪರ್ಕ ಕಲ್ಪಿಸಲು ತುಂಗಾ ನದಿಗೆ ದಶಕಗಳ ಹಿಂದೆ ನಿರ್ಮಿಸಿರುವ ನಿರ್ಮಿಸಿರುವ ತೂಗು ಸೇತುವೆ ಈಗ ಅಪಾಯಕಾರಿ ಸ್ಥಿತಿಯಲ್ಲಿದೆ. ಸೇತುವೆಗೆ ಅಳವಡಿಸಿರುವ ಕಾಂಕ್ರಿಟ್ ಹಲಗೆ ಅಲ್ಲಲ್ಲಿ ಒಡೆದಿವೆ.

ಹರಿಹರಪುರದಿಂದ ಪ್ರಬೋಧಿನಿ ಗುರುಕುಲ, ಬೊಮ್ಮಲಾಪುರದ ಸೇರಿದಂತೆ ಹಲವು ಗ್ರಾಮಗಳಿಗೆ ಸಂಚರಿಸಲು ಜನರು ಸೇತುವೆಯನ್ನೇ ಅವಲಂಬಿಸಿದ್ದಾರೆ. ತೂಗು ಸೇತುವೆ ಬಳಸಿಕೊಂಡು ಜನರು ಬೈಕ್ ಮೂಲಕ ಪ್ರತಿನಿತ್ಯ ಈ ಮಾರ್ಗದಲ್ಲಿ ಓಡಾಡುತ್ತಾರೆ. ಬೊಮ್ಮಲಾಪುರದಿಂದ ನಾಲ್ಕೈದು ಕಿ.ಮೀ ಕ್ರಮಿಸಿದರೆ ಸೂರ್ಯದೇವಸ್ಥಾನದ ಬಳಿ ರಾಷ್ಟ್ರೀಯ ಹೆದ್ದಾರಿ 169ಕ್ಕೆ  ಈ ಮಾರ್ಗ ಸಂಪರ್ಕ ಕಲ್ಪಿಸುತ್ತದೆ.

ಈ ಸೇತುವೆಯನ್ನು ಶಾಸಕರ ಪ್ರದೇಶಾಭಿವೃದ್ಧಿ ನಿಧಿ ಬಳಸಿಕೊಂಡು 1998ರಲ್ಲಿ ನಿರ್ಮಿಸಲಾಗಿತ್ತು. ಐದಾರು ಕಿ.ಮೀ ಸುತ್ತಿಬಳಸಿ ಓಡಾಡುತ್ತಿದ್ದ ಅಪಾರ ಸಂಖ್ಯೆಯ ಜನರಿಗೆ ಇದು ಹತ್ತಿರದ ದಾರಿ. ಇದೀಗ ನಿರ್ವಹಣೆ ಇಲ್ಲದೆ ಸಂಪರ್ಕ ಕಡಿತದ ಆತಂಕ ಎದುರಾಗಿದೆ.

ಸೇತುವೆಯ ಕೈಪಿಡಿಗೆ ಹೊಂದಿಕೊಂಡಂತೆ ಅಳವಡಿಸಿದ್ದ ಮೆಷ್‌ ಅಲ್ಲಲ್ಲಿ ಕಿತ್ತು ಬಂದಿದೆ. ಕೆಲವರು  ಸೇತುವೆಯಲ್ಲಿ ನಿಂತು ಮಕ್ಕಳೊಂದಿಗೆ ಸೆಲ್ಫಿ ತೆಗೆದುಕೊಳ್ಳುತ್ತಾರೆ. ಈಗ ಮೆಷ್‌ ಕಿತ್ತುಬಂದಿರುವುದರಿಂದ ತುಸು ಎಚ್ಚರ ತಪ್ಪಿದರೂ ಅಪಾಯ ಕಟ್ಟಿಟ್ಟ ಬುತ್ತಿ.  ಸ್ಥಳೀಯ ಪಂಚಾಯಿತಿ, ಸೇತುವೆ ನಿರ್ವಹಣೆ ಜವಾಬ್ದಾರಿ ಹೊತ್ತಿರುವ ಪಂಚಾಯತ್ ರಾಜ್ ಎಂಜಿಯರಿಂಗ್ ಇಲಾಖೆಯ ಅಗತ್ಯ ದುರಸ್ತಿ ಕಾರ್ಯವನ್ನು ತುರ್ತಾಗಿ ಕೈಗೊಳ್ಳಬೇಕು ಎನ್ನುವುದು ಜನರ ಆಗ್ರಹ.